Tuesday 28 June 2011

လင်္ကာတလင်း၊ စစ်ခင်းရာဝယ်

မြန်မာစာပေလောကမှာ စာတွေ၊ ကဗျာတွေ၊ လင်္ကာတွေနဲ့ အပြန်အလှန် တိုက်ပွဲဆင်ကြတဲ့ ဖြစ်ရပ်လေးတွေ ရှိပါတယ်။ ဗန်းမော်ဆရာတော်နဲ့ သီလရှင် မယ်ကင်း၊ မာန်လည်ဆရာတော်နဲ့ ဦးပဒုမ၊ အစရှိသဖြင့်ပါ ... ဒီအထဲကမှ ကုန်းဘောင်ခေတ်နှောင်း စာဆိုအကျော်နှစ်ဦးဖြစ်တဲ့ အချုပ်တန်းဆရာဖေနဲ့ ဦးပုညတို့ရဲ့ စိတ်ဝင်စားဖွယ် ကဗျာလင်္ကာတိုက်ပွဲအကြောင်းကို တင်ဆက်လိုက်ပါတယ်။ ရတနာပုံနေပြည်တော်ရဲ့ ဇာတ်သဘင်လောကအတွက် စာတွေဖွဲ့သီကြရင်းက ပြိုင်ဆိုင်မှုလေးတွေ၊ ဂုဏ်ရည်ပြမှုလေးတွေ ရှိလာကြပါတယ်။
တနေ့မှာ နန်းတွင်းဇာတ်ခေါင်းဆောင် မင်းသမီးကြီး ယင်းတော်မလေး ကြင်ဖော်ကွဲခန်းမှာ သီဆိုဖို့ ငိုချင်းကို ဆရာဖေက အောက်ပါ အတိုင်း ရေးပေးခဲ့ပါတယ် ...

သည်ဘဝ၊
သည်မျှနှင့် တန်ရချေ။

နောင်ဘဝခါမှ၊
မောင်လှကိုပိုလို့ချစ်မယ်၊
မျိုးစစ်တဲ့ဆွေ။

ဗုဒ္ဓဟေ၊
ညောင်ရွှေကွဲ့ သဖန်း။

ပွင့်ဝတ်ညှာတံကြွေမှ၊
လွှဲသွေကြတမ်း။ ။

အဲဒါကို ဦးပုညကတွေ့တဲ့အခါကျတော့ ...

သည်တည၊
ညီမနှင့်တန်ရလေ။

နောင်တညခါမှ၊
အမကိုပိုလို့ချစ်မယ်၊
စိုးရစ်နဲ့ဆွေ။

ရှုတ်ပလေ၊
မင်းအမေ တခန်း။

ရင်ဝတ်ဟာ အတန်ကျေမှ၊
ဖွားအေကိုဖမ်း။ ။ ...
ဆိုပြီး အချိုးမပျက် ဖျက်ရေးလိုက်ပါတယ် ...
သက္ကရာဇ် ၁၂၂၆-ခုနှစ်အရောက်မှာတော့ ဆရာဖေဟာ မက္ခရာမင်းသားကြီးရဲ့ အိမ်တော်မှာ အဆောင်ကိုင်ဖြစ်လာပါပြီ။ ဦးပုည နဲ့လည်း အပြိုင်အဆိုင် စာတွေ ချိုးနေကြပါပြီ။ ဒါပေမဲ့ ဦးပုညရဲ့ အရှိန်အဝါက ကြီးလွန်းတော့ မန္တလေးသူ မန္တလေးသားတွေက စာကောင်းပြီဆို ဦးပုညရေးတာလို့ပဲ ထင်ကြ၊ ပြောကြပါတော့တယ်။ တခြားစာဆိုတွေရဲ့ စာတွေ ဘယ်လောက်ပဲ ကောင်းကောင်း၊ ဦးပုညရေးတယ်ပဲ ဖြစ်ကုန်ကြပါတယ်။ ဥပမာပြရရင် ပန်းစပယ်၊ နန်းအလယ် မပေါ်ခိုက်ဟာမို့ ... ဆိုတဲ့ ဦးစံသူ မှာတမ်းထဲက ဒွေးဆစ်ကလေးကိုတောင် ဦးပုညရေးတာလို့ အမှတ်မှားနေကြတာ အခုထိပါပဲ။ ဒါကြောင့်လည်း ဝန်စာရေး ဦးသာက လွမ်းချင်းတပုဒ်ထဲမှာ ...

စာမကုံးချင်ဘု၊
လုံးလုံးကြီးစိတ်နာ။

ခုအခါ၊
တို့သူငါ သေအောင်ကောင်းစေတော့၊
ရှေးကြောင်းရင်းကုသိုလ်ဖန်၊
နိုင်ငံမှာ ကိုပုညတဲ့၊
သူမှသာ စာပြောင်၊
ပြည်ဘောင်အံ့တဲ့ မင်းပေလေး။

စီပြန်ပါလည်း၊
ဤစာဘယ်က ကိုပုညလို့၊
ဖြစ်ရတော့သာ၊
လွန်ကျော်စောတဲ့ သာပြောဟာ၊
ဆိုရှာသမျှ ကိုပုညတဲ့၊
ခုမှနောက်ပေါ်
ယင်းတော်ခြူးအုံ၊
က, မျိုးစုံတဲ့၊
ပုံတပဲသာ၊
အမူတုံးတို့ သုံးပြန်ရှာ။

ဆရာစလေ၊
သူ့နှုတ်ထွက် သူ့ချက်ပေဟု၊
တည်နေဝန့်ရှင်၊
ခြီးမွမ်းပုံတင်ကြ၊
ဟိုရင်ကစာတွေကို၊
ကိုစလေ သူသီကုံးရော့ထင့်၊
ရွှေမန်းသူ အမူတုံးတို့ရယ်၊
ငြင်းကြအုံးကွယ်လေး ....
ရယ်လို့ စိတ်နာနာနဲ့ ခပ်ငေါ့ငေါ့လေး ရေးဖွဲ့ခဲ့ဖူးပါတယ်။
ဆရာဖေကတော့ နဂိုကတည်းကို သတ္တိကောင်းပြီး မဟုတ်မခံ ခပ်ဘွင်းဘွင်း၊ ခပ်ရှင်းရှင်းပြောတတ်တဲ့သူမို့ စာလေး ကဗျာလေး ကောင်းပြီဆိုရင် ဦးပုည ရေးတာလို့ စွတ်ပြောတတ်တဲ့သူတွေကို ကဗျာ့အာဘော်နဲ့ ဒီလို ကလော်ဆဲ လိုက်ပါတယ်။

စလေဉာဏ် တောပါးစပ်က၊
ပြောစမှတ် နန်းမူ၊
လောကဓာတ်ဘလန်းဆူပြီ၊
မန်းပြည်သူအများ၊
နဘေက ခြေမပါတယ်၊
စလေစာ ကြိုက်ကြလေငြား။

ဆန်းအနုယဉ်ရာတွင်၊
ပညာရှင်အများ၊
လင်္ကာယဉ်စာသွားမတော့၊
မညှာအား နှိပ်နယ်၊
စာကောင်းရင် မအေပေးတွေက၊
စလေရေး ဆိုကြပြန်တယ်။

တို့များဖြင့် မှန်တကယ်၊
ဉာဏ်မငယ်ကံစောင်းလို့၊
ပြန်ပြောင်းလို့ မပြောချင်၊
ဟော ခုခေတ်တွင်၊
တောပါးစပ် ရိုင်းမယဉ်ကို၊
မနှိုင်းချင်ပြီဘူးကွဲ့လေး။ ။

ဆရာဖေက ဒီတေးထပ်ကို ရေးရတာဟာ တပယ်မင်းသားက ခိုင်းလို့ရေးတာ လို့ ဆိုကြပါတယ်။ တခါက တပယ်မင်းသား ဟာ ဦးပုညကို ကဗျာတပုဒ်ရေးခိုင်းချင်လို့ အခေါ်လွှတ်ပါတယ်။ အဲဒီအခါ ဦးပုညက “မင်းသားအစစ်တွေခိုင်းတာကို ရေးနေရသေးတယ် ...၊ ယမနေမင်းသား ရေးခိုင်းတာ မရေးအားသေးဘူး ...” လို့ လာခေါ်တဲ့သူကို ပြန်ပြော လွှတ်လိုက်ပါတယ်။ ဒါကြောင့် တပယ်မင်းသားက စိတ်ဆိုးပြီး ဆရာဖေ့ကို ဒီလိုမျိုး တေးထပ်ရေးခိုင်းတာလို့ အဆိုရှိပါတယ်။
ဒီတေးထပ်ဟာ တစ တစ ပျံ့နှံ့သွားရာက ဦးပုည ဆတ်ဆတ်ခါ နာပါတော့တယ်။ အချုပ်တန်းဆရာဖေဟာ အင်းဝမြို့မှာ မွေးဖွားတယ်လို့ ဆိုပါတယ်။ ဦးပုညကတော့ စလေမြို့မှာ မွေးဖွားတာပါ။ အဲဒီအချိန်ကတော့ စလေဟာ မြို့ငယ်လေး မျှ သာဖြစ်ပြီး အင်းဝကတော့ မြို့တော်ဖြစ်တဲ့အတွက် (ရတနာပုံ နေပြည်တော် မတည်ရသေးချိန်) ဆရာဖေက ဦးပုညကို တောပါးစပ် လို့ ခပ်နှိမ်နှိမ် ဆိုလိုက်တာပါ။ ဒါနဲ့ ဦးပုညကလည်း စိတ်ပေါက်ပေါက်နဲ့ ဆရာဖေရဲ့ ရုပ်ရည်ကို ဖော်ပြီး ပြန်တွယ်လိုက်ပါတယ်။

ခါးတောင်းကျိုက် ပိတုန်းပိတ်ကယ်နှင့်၊
ကျုံးထိပ်က ငဖေ၊
ကုန်းပြိတ္တ တစ္ဆေလို၊
အသရေ ဟိတ်နွမ်း၊
အသွင်နှင့်အမြင်မှန်တယ်၊
ဘဝင်္ဂံ (ဘဝင်ခံ) မဲတဲ့စိတ်နှမ်း။

မနှိုင်းအပ် မယှဉ်သာ၊
နင်ဘာပြု သော့သွမ်း (ဟော့ရမ်း)၊
ဝင်္ကာခု ဟော့ရမ်း (သော့သွမ်း)လို့၊
ကြော့ကြမ်းလိုက်လေတယ်၊‎
ကြောင်းမတန် စောင်းမာန်ခက် (တက်)၊
ပြောင်းပြန်ရှက် ရှက်ရချေမယ် (ရှက်ဖို့ဆိုမယ်)။‎

ဆီးစေ့နှင့်မြင်းမိုရ်ရွယ်သလို၊‎
ခင်းဆိုဘွယ် ကြောင်ကျားနှင့်၊‎
ဖားခြင်္သေ့ ရွှေဟင်္သာ၊‎
ကျီးနက် (ကျီးမိုက်) ပြိုင်လာ၊‎
နဂါးနှင့် တီလောက်ကွာတယ်၊‎ (နဂါးနဲ့ တီပမာနှယ်)၊
ရီစရာ သောက်ရူးမို့လေး (ခြေထောက်တာ လွန်လွန်းလို့လေး)။ ။‎

အချုပ်တန်းဆရာဖေက အသားမည်းမည်း၊ အရပ်ပုပျပ်ပျပ်နဲ့ လက်ပြင်နည်းနည်းကုန်းတာမို့ ဦးပုညက ကုန်းပြိတ္တ တစ္ဆေလို၊ အသရေ ဟိတ်နွမ်း ... ဆိုပြီး ဆော်လိုက်တာ ဖြစ်ပါတယ်။ ဒါကို ဆရာဖေ ကြားတော့ သူကလည်း ဦးပုညရဲ့ ရုပ်ပိုင်းဆိုင်ရာ ချွတ်ယွင်းချက်ဖြစ်တဲ့ ကုတ်ခွင် သေးသိမ်နေတဲ့ လက်ကလေးကို ဖော်ပြီး မခံချင်အောင် ပြန်စပ်ပါတယ် ...

ကဗျာစီ မောင်ပုည၊
ဆောင်ဂုဏ်ပြ ထုတ်လျှင်၊
တောင်ခြုံက ပုတ်သင်လို၊
ကုတ်ခွင်သိမ် လက်သေး။
မင်းမြှောက်လို့ သင်းလောက်ကျော်တယ်၊
ထွင်းဖောက်ကော် ဉာဏ်မျိုးနှင့်ဝေး။ ။

ဒီကဗျာလေးဟာ ဒွေးချိုးလို့ ဆိုနိုင်သလို တေးထပ်ရဲ့ ပထမအပိုဒ်ကြီး စပ်နည်းအတိုင်း (တက်ပိုဒ်၊ ခံပိုဒ်၊ အုပ်ပိုဒ် နဲ့စပ်ထားတာဖြစ်ပါတယ်။
ဒါတွင်မကသေးပါဘူး၊ ဆရာဖေက နောက်ထပ် တေးထပ် တပုဒ်နဲ့ ထပ်နှက်လိုက်ပြန်ပါတယ်။

ဇဇ္ဇန္ဒာ ဧဠ၊ (အမိဝမ်းတွင်းပါ ကိုယ်အင်္ဂါချို့တဲ့သူ)
စလေက ပုညံ၊
အခြေက ဂုဏ်ခံသော်၊
ပုံသဏ္ဌာန်ဆိုပြ၊
ကုသလ ဥပေက္ခာ၊
လူဖြစ်လာ သန္တီရဏ။

သန္ဓေချင်း မတူပါ၊
အယူမှာ ကွာလှ၊
နမူနာစာအရကိုတော့၊
ကမ္ဘာက အသိပါ၊
ဝိပါက်မှာ မဟာတပ်ပါလို့၊
လာကပ်တဲ့ မန်းမြို့ဆရာ။

သန္ဓေချင်း တာလောက်ကွာတယ်၊
ဝါမောက်ကာ ဆိုင်မတုချင်နဲ့၊
ပြိုင်ပြုက မနုဿဌာနီ၊
မုချကွာမည်၊
ဥက္ကဋ္ဌ အာဇာနည်ကို၊
စာပလီ ရေးလာနှင့်လေး။ ။

ဒါနဲ့ ဦးပုညက သူ လက်ခွင်နေရတာဟာ မွေးရာပါ မဟုတ်ကြောင်း ဒီလို ပြန်ချေပပြီး ရေးလိုက်ပါတယ် ...
ကရုဏေ ရွယ်ကာလ၊ (နုပျိုသူ)
ငယ်ခါက ကျောင်းနေ၊
ဘယ်ညာချ စောင်းအနေမှာ၊
လောင်းကဝေ ငါ့အား၊
အိပ်ပျော်ခိုက် (ဘ)အလာမှာ၊
မ, ကာသာ တွန်းချလေငြား။

သို့အတွက် ပညာသိမ်သည်၊
ငါကဝိန် သူ့အား၊
တာလနိန် လူ့ငနွားက၊
အရှုမှားလေတယ်၊
ငဖေရယ် စလေတုပေမဲ့၊
မေရုနဲ့ မြင့်မိုရ်ကွာမယ်။

သူရာနှင့်သိကြားနှယ်၊
ဘုရားဝယ် မာရ်နတ်သို့၊
စာတတ်နှင့် အ,သူပမာ၊
အဲတာလောက်ကွာ၊
ကေဝဋ်နှင့် မဟော်သဓာလို၊
အတော်ကွာ ခြားလှပါလေး။ ။

(ဒီနေရာမှာ ဒီတေးထပ်နှစ်ပုဒ်ဟာ ဦးပုည နဲ့ ဆရာဖေ ရေးတာမဟုတ်ဘဲ တခြား မလိုသူတွေက တမင်ရေးတာလို့လည်း ဆိုပါတယ်။ ဦးပုည လက်သိမ်တာဟာ မွေးရာပါသာဖြစ်ကြောင်း ဟံသာဝတီ ဦးဘရင်နဲ့ နော်ရထာသီရိတို့ရဲ့ မှတ်တမ်းတွေအရ သိနိုင်ပါတယ်။ အဲဒီမှာ ရေးထားတာက ဦးပုညရဲ့ ညာဘက်လက် ငါးချောင်းမှာ လက်မ တခုသာ အကောင်းဖြစ်ပြီး ကျန်တဲ့လက်ချောင်းလေး ၄-ချောင်းစလုံး အလယ်အဆစ်ကနေ ပြတ်ပြီး ဝမ်းတွင်းပါ မွေးလာတယ် လို့ ဆိုပါတယ်။ နောက်ပိုင်းမှာ ဆက်ဖော်ပြမယ့် တေးထပ်မှာလည်း “မူဆန်းလို့ ဂူနန်းချောင်မှာ၊ ဆူကျွမ်းလောင် တေဇကြောင့်၊ လေ,ခ လို့ ဘယာချွေ၊ ဘွားခဲ့ မေမေ ...” လို့ ဦးပုညကိုယ်တိုင် ရေးဖွဲ့ထားတယ် လို့ ဆိုပါတယ်။)

အဲဒီအခါ ဆရာဖေက ဒွေးချိုးလေးနဲ့ ဒီလို ထပ်ပြီး နှိပ်ကွပ်လိုက်ပါတယ်။

လောကေ ဟတ္ထေချို့လျှင်ဖြင့်၊
လူဘို့မကောင်း။

မန်းကနက်မှာလ၊
စန်းလက် ဇာတာပြောင်လို့၊
ကဗျာလှောင် နဘေတေးကိုလ၊
ဆရာယောင် စလေရေးတယ်၊
တွေးဆသင့်ကြောင်း။ ။

ကိုယ်လက်အင်္ဂါချို့တဲ့နေရင်တော့ (ဝမ်းတွင်းပါဖြစ်စေ၊ မွေးဖွားပြီးမှ အကြောင်းတခုခုကြောင့်ဖြစ်စေ) လူအဖို့ မကောင်းတာ အမှန်ပဲ လို့ နှိပ်လိုက်တာပါ။ အဲဒီအခါ ဦးပုညဟာ အလွန်ဒေါသထွက်သွားတယ် လို့ ဆိုပါတယ်။ ဒါကြောင့် ဂမ္မဒေါသသင့်တဲ့ အရေးအသားတွေနဲ့ ခပ်ကြမ်းကြမ်း နှိပ်ကွပ်ရာမှာ ပြောင်မြောက်လှတဲ့ ဗန်းမော်ဆရာတော်ကြီးရဲ့ တပည့်ရင်းပီပီ ဂမ္မဒေါသနဲ့ မဖွယ်မရာ ရုန့်ရင်းကြမ်းတမ်းတဲ့ စကားလုံးတွေ သုံးပြီး ပြန်လည်ချေပ ရေးသားလိုက်တဲ့ ဟောဒီ နာမည်ကျော် တေးထပ် ထွက်ပေါ်လာပါတော့တယ်။

ဂျပ်ကောင်နှယ် ပန်းကြားက၊‎
သန်းစကားသု (ခု) ဝါ၊‎
ရမ်းကားလို့ တုလာလျှင်၊‎
ဥပမာဆိုစို့၊‎
ချေးပုံနှင့်မြင်းမိုရ်တောင်၊‎
ခင်းဆိုရောင် နှိုင်းကြပါစို့။‎

သေးကွက်နှင့်ပင်လယ်၊‎
နင်တကယ်ထင်လို့၊‎
သဘင်ဝယ် ယှဉ်မတို့လေနဲ့၊‎
သခင်တို့ ဦးချီ၊‎
အုန်းမှုတ်လိုအနေစားတွေက၊‎
ရွှေဖလား မနှိုင်းသင့်ပြီ။‎

ဥတုနှင့်ပုစွန်ဆီ၊‎
‎ဒွန်ပီပီ ယှဉ်တွဲလို့၊‎
စပ်ဖဲ အတွင်းခံ၊‎
‎ရိုင်းမိုက်တဲ့ဉာဏ်၊‎
မိုးကြိုးနှင့် အီးသံလို၊‎
ခရီးမှန်ကွာလွန်းလှလေး။ ။‎ ...

ဒီလို ကြမ်းရမ်းလိုက်ရုံနဲ့ အားမရသေးတဲ့အတွက် အချုပ်တန်းဆရာဖေဟာ မုသားပြောတဲ့နေရာမှာတော့ စေတီယမင်းနဲ့ ဖွားဖက်တော်ဖြစ်တဲ့အကြောင်း၊ မမှန်တဲ့နေရာမှာတော့ ကုန်းဘောင်ခေတ်တုန်းက သင်္ဘောနဲ့လာတဲ့ “မှန်” တွေကို ရောင်းတဲ့အခါမှာတောင် “မှန်” လို့ မခေါ်ဘဲ “မှား” ခေါ်ဆိုပြီးရောင်းမယ့်သူဖြစ်ကြောင်း၊ ယောင်ပြီးများ “မှန်” လို့ ခေါ်မိရင် အာခေါင်ကို ဖဲ့လိုက်ပါလို့တောင် မောင်းလှည့်ကြေညာကာ ရောင်းမယ့် လူစားမျိုးဖြစ်ကြောင်း တေးထပ်လေးနဲ့ ထပ်ပြီး ဆော်လိုက်ပါတယ် ...

စေတီယလက်ထက်က၊‎
ဖွားဖက်တော်ရဲဗိုလ်၊‎
မဟုတ်မှသူဆိုတယ်၊‎
တကိုယ်လုံးမုသား၊‎
အလွဲမျာ့းဘုရင့်ငယ်၊‎
အလိမ်တွင် မင်းတရာ့ဖျား။‎

အမှားမျာ့း ဥသျှောင်ငယ်၊‎
အကောက်တောင် ပိုင်စား (သား)၊‎
သင်္ဘောပါ မှန်ကုန်များကို၊‎
မှားခေါ်လို့ရောင်းစေ၊‎
မှန်ဆိုလျှင် အာကိုဖဲ့စေဟု၊‎
မောင်းလှည့်မယ့် လူစားပါပေ။‎

တမိုးအောက်လူ့ပြည်မှာ၊‎
သည်မောင်ဖေ (သည်တဖေ) တပါးသာဖြင့်၊‎
မုသားစောင်ဖြူ(ကို) ခြုံ၊‎
ပိန်းပိတ်လို့မှုန်၊‎
မျက်လှည့်ကြီး ဉာဏ်(မျိုး) စုံတယ်၊‎
လှည့်စားပုံဆန်းပေငဲ့လေး။ ။‎

ပြီးတော့မှ ပွဲသိမ်းတိုက်ကွက် အနေနဲ့ သူ့ကိုယ်သူ ကိုယ်ရည်သွေး ဂုဏ်ပြ တေးထပ်တပုဒ် ထပ်ပြီးရေးလိုက်ပါတော့တယ်။

သပြေမှာ ကဝေမြောက်၊
စလေရောက်သူပါ၊
မင်းလှဘွဲ့သင်္ခယာ၊
ရွာစည်ရွာ ပိုင်စား၊
မောင်ပုည ခေါ်ဆိုသည်၊
ညာရွှေကို လက်ကမအား။

တွက်စစ်တော့ ဆစ်တတောင်ဟာ၊
သူမအောင် သွေရှား၊
ဖန်ရဝေ သန္ဓေဘွားစဉ်က၊
ကံခေညား လူ့ဘောင်၊
သဏ္ဌာန်အမှန်ယုတ်သော်လဲ့၊
ဉာဏ်အဂ္ဂ ထွန်းတဲ့အရောင်။

မူဆန်းလို့ ဂူနန်းချောင်မှာ၊
ဆူကျွမ်းလောင် တေဇကြောင့်၊
လေ,ခ လို့ ဘယာချွေ၊
ဘွားခဲ့ မေမေ၊
သောင်းဒီပ ဇမ္ဗူမြေမှာ၊
တူသူလေ ရှားပါလိမ့်လေး။ ။

အဲဒီနောက်ပိုင်း ဆရာဖေက ပြန်လည်ချေပတဲ့ စာတွေ မတွေ့ရတော့တာကြောင့် ဒီမှာပဲ ဦးပုညက ပွဲသိမ်းလိုက်တယ်လို့ ဆိုနိုင်ပါတယ်။ ဦးပုညရဲ့ စာတွေဟာ ပိုပြီးသာတယ်လို့တော့ ပညာရှင်အများက မှတ်ချက်ချကြပါတယ်။ ကျနော်ကတော့ သူတို့ နှစ်ယောက်လုံးရဲ့ စာတွေကို ကြိုက်တာပါပဲ။ စကားလုံးပြောင်မြောက်မှုနဲ့ နဘေအရေးအသားမှာတော့ ဦးပုညက ပိုသာတယ်လို့ ကျနော်လည်းထင်ပါတယ်။ ဒါပေမဲ့ ဦးပုညရဲ့စာတွေဟာ ဘုန်းတော်ဘွဲ့တွေသာ များနေသလိုဖြစ်နေပြီး ဆရာဖေရဲ့ စာတွေကတော့ သာမန်ပြည်သူတွေနဲ့ ပိုနီးစပ်ပြီး ဇာတိသွေး၊ ဇာတိမာန်လည်း တက်ကြွစေတဲ့ စာတွေ ပိုရေး ခဲ့တယ်လို့ ကျနော်ယူဆမိပါတယ်။ ဦးပုညဟာ လွတ်လပ်ရေးမဆုံးရှုံးခင်မှာ ကွပ်မျက်ခံလိုက်ရတာကြောင့် ဇာတိမာန် စာပေတွေ ရေးခွင့်မရခဲ့တာလည်း ဖြစ်နိုင်တယ်လို့ပဲ အတွေးနယ်ချဲ့နေမိပါတယ် ...
ဘယ်လိုပဲဖြစ်ဖြစ် ကုန်းဘောင်ခေတ်နှောင်း စာဆိုအကျော် နှစ်ဦးရဲ့ ကဗျာလင်္ကာတိုက်ပွဲကို နှစ်သက်ကြလိမ့်မယ်လို့ မျှော်လင့်မိပါတယ် ...

ဖတ်ရှုခံစား အားပေးတဲ့အတွက် ကျေးဇူးအထူးပါ ခင်ဗျာ ...
ဟယ်ရီ

Read More...

Tuesday 21 June 2011

ခင်ခင့်ကိုပြောချင်သော ပုံပြင်များ (၁) - စောင်းညှို့သံချီ လင်္ကာစီ၍

ခင်ခင်ရေ ...
ခင်ခင်နဲ့စကားမပြောဖြစ်တာလည်းကြာပြီ ... ဒါကြောင့်မို့ အခု ခင်ခင်ကိုပြောပြချင်တဲ့ ပုံပြင်တွေကို ဒီမှာပဲ ပြောပြတော့ မယ်နော် ...
ညချမ်းအခါတွေမှာ ချစ်သူရဲ့ အိမ်ရှေ့ ... ပြတင်းပေါက် အောက်နားကနေ ဂစ်တာလေးနဲ့ သီချင်းသံလေးတွေ သီကျူး ပြတတ်ကြတာကို ခင်ခင် ကြုံဖူးလိမ့်မယ် ထင်ပါရဲ့။ ခင်ခင်တို့ အိမ်နားမှာလည်း ဒီလိုပဲ လာပြီး တေးသီခဲ့ကြလိမ့်မယ် ထင်တယ်နော်။ အဲဒါကို သိုးဆောင်းဘာသာစကားနဲ့တော့ Serenade လို့ ခေါ်တာပေါ့။ အဲဒီလို ချစ်ခြင်းဖွဲ့ သံစဉ်တေးတွေ သီခဲ့ကြတာ လူ့ပြည်မှာတင်မဟုတ်ဘူး ခင်ခင်ရဲ့။ ဟိုး ထက်မိုးယံက တာဝတိံသာ နတ်ပြည်မှာလည်း ဒီလိုပဲတဲ့။ Serenade ဟာ လက်စသတ်တော့ တာဝတိံသာနတ်ပြည်က စခဲ့တာကိုး ...။
ကဲ ... ပုံပြင်ဆိုတော့လည်း ဟိုး ... ရှေးရှေးတုန်းက လို့ပဲ စရမှာပေါ့။

ဟိုး ... ရှေးရှေးတုန်းက တာဝတိံသာ နတ်ပြည်ကြီးမှာ နတ်သားလေး တပါး ရှိသတဲ့။ အဲဒီနတ်သားလေးရဲ့နာမည်က “ပဉ္စသီခ” တဲ့။ သူက အရမ်းလှတဲ့ နတ်သမီးလေးတပါးကို ချစ်မိပါရောတဲ့။ ဒါပေမဲ့ သူ့ရဲ့ဆရာသမား သိကြားမင်းကြီးက ချစ်သူကို စစ်ခင်းပြီး အရယူနိုင်သလို သူကတော့ စစ်ခင်းနိုင်စွမ်းမရှိရှာဘူးလေ။ အဲဒီတုန်းက သူက သာမန်နတ်သားလေးပဲကိုး။ သူချစ်မိတဲ့ နတ်သမီးလေး က “သူရိယဝစ္ဆသာ” တဲ့။ ရွှေမန်းတင်မောင်ကြီး ဟဲသွားတဲ့ “အို ဒေဝစ္ဆရာ .... ရွှေနတ်ကညာ အလှတကာတို့ ... ပေါင်းကာ စုဝေး ... လှဟန်ပေး လှရေးခြယ်ကာ ...” ဘာညာ ဆိုတဲ့ သီချင်းထဲက ဒေဝစ္ဆရာ ဆိုတာ အဲဒီ နတ်သမီးပဲပေါ့ ခင်ခင်ရယ်။ သူက တိမ္ဗရု နတ်စစ်သူကြီးရဲ့သမီးတော်လေးပေါ့။ ဒီတော့ကာ ဂုဏ်ရည်ချင်းကမတူလေတော့ နတ်သားလေးခမျာ နတ်သမီးလေး နားကို မကပ်နိုင်ဘူးပေါ့လေ။ ယောက္ခမလောင်း နတ်မင်းကြီးကလည်း သာမန်နတ်သားလေးဆိုတော့ သဘောမတူဘူး ထင်ပါရဲ့။ ဒါပေမဲ့ နတ်သားလေးက စောင်းတီး အလွန်တော်သတဲ့။ ဒီဇိုင်းကလည်း လန်းတယ်နဲ့တူတယ်။ သူက ဥသျှောင်ငါးခုနဲ့လေ။ လန်ထွက်နေမှာပဲနော်။ ပဉ္စ ဆိုတာက ငါးခု၊ သီခ ဆိုတာက ဦးစွန်းလို့ အနက် ရတယ်တဲ့။ သူ့မှာ နတ်စောင်းတလက်လည်း ရှိတယ် ခင်ခင်ရဲ့။ အဲဒီစောင်းကတော့ တခါတီးလိုက်ရင် လေးလကျော်မှ အသံစဲတယ် ဆိုတဲ့ ဗေလုဝ နတ်စောင်း ပါပဲ။ Sustain သိပ်ကောင်းတော့ ဒီခေတ် instrument တွေလို electronic effect တွေ ဘာတွေ မလိုဘူးပေါ့။ စောင်းရဲ့ နာမည် အပြည့်အစုံက “ဗေလုဝပဏ္ဍု” တဲ့။ ပါဠိတော်တွေမှာတော့ “ဗေလုဝပဏ္ဍုဝီဏ” လို့ ပြထားတယ်။ ဒီစောင်းကြီးက အသံရှိန် သိပ်ရှည်သလို စောင်းကလည်း အကြီးကြီးပဲကိုး၊ စောင်းလက်ရုံးကတင် သုံးဂါဝုတ်ရှိတယ်ဆိုပဲ။ စောင်းက ဥသျှစ်သီးမှည့် အရောင်ရှိတယ်ဆိုတော့ အဝါဖျော့ဖျော့ပေါ့နော်။ ပါဠိလို ဗေလုဝ ဆိုတာ ဥသျှစ်သီးလို့အဓိပ္ပာယ် ရသတဲ့။ စောင်းအိုးကရွှေနဲ့လုပ်ထားပြီး စောင်းလက်ရုံးက ဣန္ဒနီလာ ကျောက်၊ စောင်းကြိုး(ညှို့) တွေက ငွေကြိုးတွေ၊ စောင်းကြိုးရစ်တဲ့ ခင်တံလို့ခေါ်တဲ့ မှင်ရိုးက သန္တာနဲ့ လုပ်ထားတာတဲ့၊ ရွှေစောင်းအိုးမှာ ငွေညှို့တပ်ပြီး ဣန္ဒနီလာကျောက်တွေ၊ သန္တာကျောက်တွေနဲ့ ဆင်ယင်ထားတဲ့ စောင်းကြီးဟာ အရမ်းလှ မှာပဲနော်။
ဒီစောင်းကလည်း ရာဇဝင်နဲ့နော်။ မြတ်စွာဘုရားကို အမြဲတမ်းလိုက်ပြီး အနှောက်အယှက်ပေးနေတဲ့ မာရ်နတ်မင်းကြီးကို သိတယ်မဟုတ်လား။ အဲဒီ ပရနိမ္မိတ ဝဿဝတ္တီနတ်ပြည်က မာရ်နတ်မင်းကြီးဟာ မြတ်စွာဘုရားကို ခုနစ်နှစ် လုံးလုံး မျက်ခြေမပြတ် တကောက်ကောက်လိုက်ပြီး အမြဲတမ်းစောင့်ကြည့်အပြစ်ရှာတာတောင် ဘာအပြစ်မှ ဆိုစရာ မတွေ့လို့ စိတ်လေပြီး မြတ်စွာဘုရားအနားကနေ ထွက်ခွာသွားတော့သတဲ့။ ဘယ်လောက်တောင် စိတ်ပျက်သွားသလဲ ဆိုတော့ မာရ်နတ်မင်းကြီးဟာ သူ့ချိုင်းကြားမှာ ညှပ်ထားတဲ့ ဗေလုဝနတ်စောင်းကြီး လျှောကျကျန်ရစ်ခဲ့တာတောင်မှ သတိမထားမိ တော့ဘူးလို့ ခုဒ္ဒကနိကာယ်၊ သုတ္တနိပါတ်ပါဠိတော်၊ မဟာဝဂ်၊ ဂါထာ ၄၅၂ မှာ ပါတယ်လေ။ အဲဒီ စောင်းကြီးကို သိကြား မင်းကြီးက အသာလေးသွားကောက်ပြီး စောင်းတီးကောင်းတဲ့ သူ့တပည့် ပဉ္စသီခ နတ်သားလေးကို ပေးလိုက်တာတဲ့ ခင်ခင်ရဲ့။ သိကြားမင်းကြီးကလည်း စတုမဟာရာဇ်နဲ့ တာဝတိံသာနတ်ပြည်ကြီး နှစ်ခုလုံးကို အစိုးရတဲ့ နတ်ဘုရင်ကြီး ဖြစ်နေတာတောင် ကိုယ်ပိုင်စောင်းကလေး မှ မရှိရှာဘူးနော် ... သူများကျကျန်ရစ်တဲ့ စောင်းကို သွားကောက်ရသတဲ့ ...
ဒါနဲ့ပဲ နတ်သားလေးက ဂုဏ်ရည်မတူတဲ့ ချစ်သူကို စောင်းသီချင်း ၁၅-ဂါထာ နဲ့ သူတို့ဗိမာန်ရှေ့မှာ ဆိုတီးလေးတီးပြီး သွားကြွေပြခဲ့တာပေါ့။ သူ့ စောင်းချင်းဂါထာ ၁၅-ပုဒ်ထဲမှာ ယောက္ခမလောင်းကြီးကို ဖားထားတဲ့ စာသားတွေလည်း ပါသေးတယ် ခင်ခင်ရဲ့။ သီလက္ခန္ဓ ဝဂ္ဂပါဠိတော်မှာ ပါတဲ့ ဂါထာတွေကို ကဗျာသာရတ္ထသင်္ဂြိုဟ်ကျမ်းထဲမှာ ဆရာကြီး သခင်ကိုယ်တော်မှိုင်း အနက်ပြန်ပြီး ရှင်းပြထားတဲ့အတိုင်း ပြောပြမယ်နော် ...

(၁) စောင်းညှိသီချင်း

ဗုဒ္ဓူ ပသံဟိတာ
ဓမ္မူ ပသံဟိတာ
သံဃူ ပသံဟိတာ
အရဟန္တူ ပသံဟိတာ
ကာမူ ပသံဟိတာ။

အကြင်စောင်းသံတျာ၊ ဂါထာ သီချင်းတို့သည်၊ ဘုရားဂုဏ်အထူးကို ချီးကျူးစွဲမှီ၍ ဖြစ်ကုန်၏။ တရားကျေးဇူးဂုဏ်အထူးကို ချီးကျူးစွဲမှီ၍ ဖြစ်ကုန်၏။ သံဃကျေးဇူး ဂုဏ်အထူးကို ချီးကျူးစွဲမှီ၍ ဖြစ်ကုန်၏။ ရဟန္တာကျေးဇူးဂုဏ်အထူးကို ချီးကျူးစွဲမှီ၍ ဖြစ်ကုန်၏။ ကာမဂုဏ်ကျေးဇူးဂုဏ်အထူးကို ချီးကျူးစွဲမှီ၍ ဖြစ်ကုန်၏။ အရှင်ဘုရား၊ အရှင်ဘုရားအား၊ ထိုစောင်းသံတျာ၊ ဂါထာသီချင်းတို့ဖြင့်၊ တပည့်တော် ပဉ္စသီခသည်၊ ရွှေနားတော်သွင်းပါအံ့။

(၂) စောင်းသံ
ဝန္ဒတေ ပိတရံ ဘဒ္ဒေ။
တိမ္ဗရုံ သူရိယဝစ္ဆသေ၊
ယေန ဇာတာသိကလျာဏီ၊
အာနန္ဒ ဇနနီမမ။

နှမ သူရိယဝစ္ဆ။ အကြင် အကြောင်းကြောင့်။ ကောင်းခြင်းငါးဖြာ၊ လက္ခဏာရှိထသော။ ကျွန်ုပ်၏ချစ်ကြိုက်မှုကြီးကို ဖြစ်စေတတ်ထသော။ သင် သူရိယဝစ္ဆာ နတ်ကညာသည်။ အကြင် တိမ္ဗရုနတ်မင်း၊ ခမည်းတော်မင်းကို။ မှီ၍၊ ဖွားမြင်သည့်။ ဖြစ်၏။ သင် သူရိယဝစ္ဆာ နတ်ကညာ၏။ တိမ္ဗရု မည်သော။ ထိုခမည်းတော် နတ်မင်းကို၊ အကျွန်ုပ်သည်၊ ရှိခိုးပါ၏။ ။
(ဤကား တိမ္ဗရုနတ်မင်းကြီး၏ သမီးတော် သူရိယဝစ္ဆာ နတ်သမီးကို အလိုရှိသဖြင့် ပဉ္စသီခနတ်သားသည် ဒုတိယ အကြိမ်မြောက် စောင်းချင်းဂါထာဖြင့် သာယာချေငံစွာ ပဏာမိတဗ္ဗ၊ ပဏာမ အားလျော်စွာ၊ ဝန္ဒနာ ပြုလုပ်ချက် ပေတည်း။)

(၃) စောင်းသံ
ဝါတောဝ သေဒတံ ကန္တော၊
ပါနိယံဝ ပိပါသတော။
အင်္ဂီရသိံ္မ ပိယာမေသိ၊
ဓမ္မော အရဟတံ ဣဝ။

နှမ။ အပူဖိစီး၍ ချွေးဒီးဒီးကျကုန်သောသူတို့သည်၊ လေညင်းကို၊ နှစ်သက်အပ် သကဲ့သို့လည်းကောင်း၊ ရေငတ်မွတ်သောသူသည်၊ သောက်ရေကို၊ နှစ်သက်အပ် သကဲ့သို့လည်းကောင်း၊ ရဟန္တာပုဂ္ဂိုလ်သည်၊ တရားကို၊ နှစ်သက်အပ် သကဲ့သို့ လည်းကောင်း၊ အလျှံပြိုးပြက် ထွက်သော ကိုယ်ရောင်ဖြင့် တောက်ပသော၊ သင်ချစ်ဆွေနှမကို၊ အကျွန်ုပ်အား၊ ချစ်အပ်ကြိုက်အပ်သည်၊ ဖြစ်ပြီ။ ။
(ဤကား သူရိယဝစ္ဆာနတ်သမီး၏ ကိုယ်ရောင်ကိုယ်ဝါ ကြောင့် ချစ်ကြိုက်ရပုံတည်း။)

(၄) စောင်းသံ
အာတုရေဿဝ ဘေသဇ္ဇံ၊
ဘောဇနံဝ ဇိဂစ္ဆတော။
ပရိနိဗ္ဗာယိ မံ ဘဒ္ဒေ၊
ဇလန္တမိဝ ဝါရိနာ။

ရောဂါစွန်းငြိ၊ အနာရှိသောသူအား၊ ဆေးကို၊ ပေး၍၊ ရောဂါပျောက်တိမ်း ငြိမ်းစေသကဲ့သို့လည်းကောင်း၊ ဆာလောင်သော သူအား၊ အစာကို၊ ပေး၍၊ ဆာလောင်မရှိ ငြိမ်းစေဘိသကဲ့သို့လည်းကောင်း။ ရေသည်၊ ထိန်ထိန်ညီးညီး တောက်လောင် သော မီးကို၊ ငြိမ်းစေသကဲ့သို့လည်းကောင်း၊ ချစ်ဆွေနှမ နတ်မယ်လျ၊ ချစ်ရပေရှာ၊ မယ့်မောင်ငါ၏၊ ကျုပ်နှမကြောင့်၊ ဒုက္ခဆူသီး၊ အပူကြီးကို၊ သင်ချစ်ဆွေနှမသည်၊ မြန်မြန်အသော့ငြိမ်းစေလော့။ ။
(ဤကား သင်နတ်သမီးကို အကြိုက်ကြီး ကြိုက်ရသော ဒုက္ခမီးကို ဖြေဖျောက်ပါ ဆိုလိုသည်)။

(၅) စောင်းသံ
သီတောဒကံ ပေါက္ခရဏိံ၊
ယုတ္တံ ကိဉ္ဇက္ခရေဏုနာ၊
နာဂေါ ဃမ္မာဘိတတ္တောဝ၊
သြဂဟေ တေ ထနုဒ္ဓရံ။

အပူလွန်မင်း နှိပ်စက်ခြင်းရှိသော၊ ဆင်ပြောင်သည်။ ရွှေကြာပဒုံ ပန်းဝတ်မှုံနှင့်၊ ပြည့်စုံသော။ ဧးမြချမ်းကြည်သော ရေလည်းရှိထသော။ ရေကန်သို့။ ဆင်းသက်၍။ ဧးကြည်လှစွာ ချမ်းသာခြင်းကို။ ရလေသကဲ့သို့။ ထိုနှင့်တမူ ထပ်တူထပ်မျှ။ မယ့်မောင်ငါသည်။ သင်ချစ်ဆွေနှမ၏။ သားမြတ်နှစ်ခုအကြား ရွှေရင်သားကို။ ဝါ၊ ရင်ဦးရတနာ ပန်းနှစ်မြွှာတို့၏ အကြားကို။ သက်ဝင်အာရုံ၊ ရင်ငွေ့ကိုလှုံရမှ။ စိတ်ရောကိုယ်ပါ၊ ချမ်းသာခြင်းကို၊ ရပါအံ့တကား။
(ဤကား ချစ်ဆွေနှမ၏ သားမြတ်နှစ်ခုတို့အကြားမှာ ကစားပျော်မွေ့ရမှ သုခချမ်းသာ ဖြစ်နိုင် ပါတော့မည် ဆိုလိုသည်။)

(၆) စောင်းသံ
အစ္စင်္ကုသောဝနာဂေါဝ၊
ဇိတံမေ တုတ္တတောမရံ၊
ကာရဏံ န ပဇာနာမိ၊
သမေတ္တာ လက္ခဏူရုယာ။

ချစ်ဆွေနှမ။ ချိတ်ငင်ဆွဲကြောင်း သံချွန်းတောင်းဖြင့်၊ ကောင်းစွာငင်နှိပ်၊ မချိတ်နိုင်သော။ ဆင်ပြောင်သည်။ ငါသည်။ နားရင်းထိုးစူး၊ ဒူးခြေလက်ထွင်း၊ ထိုခက်ရင်းကို။ အောင်အပ်ပြီ။ ဤသို့။ အဟုတ်ထစ်ထစ်၊ အမုန်ယစ်၍။ တစုံတခုသော အကြောင်းကို။ မသိသကဲ့သို့။ ပမာသို့မူ၊ ထို့အတူ။ မယ့်မောင်ငါသည်။ သင်ချစ်ဆွေနှမ၏။ ရွှေစိုင် တမွတ်၊ ပွတ်မှချွတ်သို့၊ ချောမွတ်လှဟန်၊ ရွှေပေါင်တန်စုံ၊ လက္ခဏာဂုဏ်ရှိသောကြောင့်။ ရာဂအမုန်၊ သုန်သုန် ယစ်မူး၊ အရူးကြီးကဲ့သို့ဖြစ်၍။ တစုံတရာသောအကြောင်းကို။ ဉာဏ်ရောင်ကင်းကွာ၊ မသိနိုင်တော့ပါ။
(ဤကား သူရိယဝစ္ဆသ နတ်သမီး၏ လက္ခဏာကြန် ပေါင်တန်နေပုံကောင်းသောကြောင့် ချစ်ရူးကြိုက်ရူး၊ အရူးကြီး ရူးရ သော ကျွန်ုပ် ပဉ္စသီခသည် ဘာကိုမျှ မသိနိုင်ပါဘူးဟု ဆိုလိုသည်။)

(၇) စောင်းသံ
တယိ ဂဓိတ စိတ္တောသ္မိ၊
စိတ္တံ ဝိပရိနာမိတံ၊
ပဋိဂန္တု န သက္ကောမိ၊
ဝင်္ကဃသ္တော အမ္ဗုဇော။

နတ်မေနှမ။ မယ့်မောင်ငါသည်။ သင်ချစ်ဆွေနှမ၌။ အမြဲသက်သက် စွဲမက်သော စိတ်ရှိသည်၊ ဖြစ်ပြီ။ အဖျားကော့ညိတ်၊ သံမျှားချိတ်ကို၊ စိတ်ရှိတိုင်း မျိုမှားသော။ ရေ၌ဖြစ်ပွားသော ငါးသည်။ တဖန်အသစ်၊ ပြန်နစ်ခြင်းငှာ။ ရုန်းအံ့ကြိုးပမ်း၊ မစွမ်းနိုင်ရှာသကဲ့သို့။ ပမာသို့မူ၊ ထို့အတူ။ မယ့်မောင်ငါ၏၊ စိတ်သည်။ ဘောက်ပြန်၏။ ဆုတ်နစ် တဖန်၊ ပြကတေ့ ဖြစ်ပြန်ခြင်းငှာ။ လုံ့လကြံ့ခိုင်၊ မစွမ်းနိုင်။ ။
(ဤကား သံမျှားချိတ်ကို မျိုမိမှားသော ငါးကဲ့သို့၊ ချစ်ရကြိုက်ရသော လောဘ ဘဝင်စိတ်တို့သည်၊ ငင်ချိတ်ဆွဲငင်အပ် သဖြင့် ရှေးကသဘောမျိုး မဖြစ်နိုင်တော့ပြီ ဟု ဆိုလိုသည်။)

(၈) စောင်းသံ
ဝါမူရု သဇမံ ဘဒ္ဒေ၊
သဇမံ မန္ဒလောစနေ။
ပလိသဇမံ ကလျာဏီ၊
ဧတံမေ အဘိ ပတ္တိတံ။

ပွတ်မှာတင်ချွတ်၊ တမွတ်ရွှေစိုင်၊ ရောင်ပြိုင်လှမော၊ ရွှေငှက်ပျောတုံးဟန်ပန်၊ ရွှေပေါင်တံရှိသော။ ချစ်ဆွေနှမ။ မယ့်မောင်ငါ့ကို။ ရွှေမုရိုးစည်ပုံမယွင်း၊ ရွှေလည်ပင်းကို ချက်ခြင်းသိမ်းယှက်၊ ဖက်လှည့်ပါလော။ မထေ့တထေ့နှင့်၊ သိမ်မွေ့စွာ ကြည့်ရှုလေ့ရှိသော။ ချစ်ဆွေနှမ။ မယ့်မောင်ငါ့ကို။ ရွှေမုရိုးစည်ပုံမယွင်း၊ ရွှေလည်ပင်းကို ချက်ခြင်းသိမ်းယှက်၊ ဖက်လှည့်ပါလော။ ကောင်းခြင်းငါးဖြာ၊ လက္ခဏာများနှင့် ပြည့်စုံသော။ ချစ်ဆွေနှမ။ မယ့်မောင်ငါ့ကို။ ပေါင်ပေါ်ထက်ဖျား၊ ကိုယ်လုံးထား၍၊ ပိုက်ဖြားမကြွင်း၊ မောင့်လည်ပင်းကို၊ ညှင်းညှင်းသာသာ၊ ဖက်လှည့်ပါလော့။ ဤသို့ ဖက်ခြင်းကို။ မယ့်မောင်ငါသည်။ အလွန်အလိုရှိအပ်ပြီ။ ။
(ဤကား ပေါင်တန်လှသော ချစ်ဆွေနှမသည် ကျွန်ုပ်လည်ပင်းကို ဖက်လှည့်ပါလော့။ ။ ကောင်းပုံငါးမျိုးနှင့် ပြည့်စုံသော ချစ်ဆွေနှမ၏ ပေါင်ပေါ်၌ ကျွန်ုပ်ကိုယ်လုံးကိုထား၍ လည်ပင်းကို ဖြည်းညင်းသာယာစွာ ပွေ့ပါ ဖက်ပါဟု ဆိုလိုသည်။)

(၉) စောင်းသံ
အပ္ပကော ဝတ မေသန္တော၊
ကာမော ဝလ္လိတ ကေသိရာ။
အနေကဘာဝေါ သမပါဒိ၊
အရဟန္တောဝ ဒက္ခိဏာ။

ညွန့်ဖျားကော့ကော့၊ ကြော့ရှင်းကောင်းစွာ၊ ဆံကေသာရှိသော။ လှပုံတင့်တယ်၊ မောင့်သက်လယ်။ သင်နှမ၌။ မယ့်မောင်ငါ၏။ ချစ်ရကြိုက်ရသော ကာမဆန္ဒသည်။ များစွာအပုံ၊ ရှိပါတုံလျက်။ ချစ်ဆွေနှမက။ ငါ၌။ ချစ်ကြိုက်မေတ္တာ၊ နည်းလှပါတကား။ ရဟန္တာပုဂ္ဂိုလ်၌။ သဒ္ဓါကြည်ဖြူ၊ ပေးလှူအပ်သောအလှူသည်။ အပုံကြီးများသော အကျိုးရှိသည်။ ဖြစ်သည်သာလျှင်တည်း။ ။
(ဤကား ဆံပင်ကောင်းသော ချစ်ဆွေနှမ၊ နှမအပေါ်မှာ မေတ္တာသက်ရောက်ပါသော မောင်၏ ချစ်ခြင်းတရားများများကြီး ရှိပါလျက်၊ နှမ၏ ချစ်ပုံနည်းလှချေတကား။ ရဟန္တာကို လှူရသောအကျိုးသည် အပုံကြီးများသည်ဟု ဆိုလိုသည်။)

(၁၀) စောင်းသံ
ယံမေအတ္ထိ ကတံပုညံ၊
အရဟန္တေသု တာဒိသု။
တံမေ သဗ္ဗကလျာဏီ၊
တယာ သဒ္ဓိံ ဝိပစ္စတံ။

တကိုယ်လုံးချောသော။ နတ်မေနှမ။ သည်းခံနိုင်သော ဂုဏ်ထူးရှိကုန်သော။ ရဟန္တာပုဂ္ဂိုလ်တို့၌။ မယ့်မောင်ငါ၏။ ပြုအပ်သော။ အကြင်ကောင်းမှုသည်။ ရှိ၏။ ထိုကောင်းမှုသည်။ သင်ချစ်ဆွေနှမနှင့်။ အတူတကွ။ ရွှေလည်ဘက်နွှဲ၊ လက်တော်ဆွဲ၍၊ ခပဲရောယု၊ အကျိုးစုကို ယခုခံစားရပါစေ။ ။
(ဤကား တကိုယ်လုံးချောသော၊ လှသော ချစ်ဆွေနှမ။ ရဟန္တာပုဂ္ဂိုလ်တို့၌ ကျွန်ုပ်ပြုရသောကောင်းမှုကြောင့်၊ ချစ်ဆွေနှမ နတ်မယ်လျနှင့်၊ တကွရွှင်ကြည်၊ ရွှေလည်ဘက်နွှဲ၊ လက်ကိုဆွဲ၍၊ အမြဲပေါင်းဘော်ရပါစေသောဟု ဆိုလိုသည်။)

(၁၁) စောင်းသံ
ယံမေအတ္ထိ ကတံပုညံ၊
အသ္မိံ ပထဝီ မဏ္ဍလေ။
တံမေ သဗ္ဗကလျာဏီ၊
တယာ သဒ္ဓိံ ဝိပစ္စတံ။

တကိုယ်လုံးလှသော။ ချစ်ဆွေနှမ။ ဤမြေအပြင်၌။ မယ့်မောင်ငါ၏။ ပြုအပ်သော။ အကြင်ကောင်းမှုသည်။ ရှိ၏။ ထိုကောင်းမှုသည်။ သင်ချစ်ဆွေနှမနှင့်။ အတူတကွ။ အတူအမျှ ခံစားရပါစေ။ ။
(ဤကား မြေအပြင်၌ ကျွန်ုပ်ပြုအပ်သော ကောင်းမှုအကျိုးအားဖြင့် တကိုယ်လုံးလှသော ချစ်ဆွေနှမနှင့် ထပ်တူထပ်မျှ ခံစားရပါစေဟု ဆိုလိုသည်။)

(၁၂) စောင်းသံ
သကျပုတ္တောစ ဈာနေန၊
ဧကောဒိ နိပကောသတော။
အမတံ မုနိ ဇိဝိသာနော၊
တမဟံ သူရိယဝစ္ဆသေ။

သူရိယဝစ္ဆ အမည်ရသော။ ချစ်ဆွေနှမ။ သာကီဝင်မင်းသားလည်း ဖြစ်ထသော။ ဈာန်ဖြင့်။ မြတ်သောအဖြစ်သို့ ရောက်ထသော။ ရင့်သောပညာလည်း ရှိထသော။ သတိနှင့်လည်း ပြည့်စုံထသော။ မြတ်စွာဘုရားသည်။ များစွာမြင့်ကြာ၊ သံသရာပတ်လုံး။ နိဗ္ဗာန်ကို။ ရှာမှီးလျက်။ ကျင်လည်တော်မူ၏သို့။ ထို့အတူ။ မယ့်မောင်ငါသည်လည်း။ ထိုအလှဆန်းကြယ်၊ နတ်မိမယ်ကို။ ရင်ငွေ့ပန်းမှုံ၊ လှုံရပါကြောင်း။ အောက်မေ့ရှာကြံလျက်။ ကျင်လည်သွားလာ၊ မြင့်ကြာလှလေပြီ။ ။
(ဤကား သံသရာ ဘဝဘဝက၊ ဘုရားလောင်းသည် နိဗ္ဗာန်ကို ရှာသကဲ့သို့၊ ချစ်ဆွေနှမနှင့် ပေါင်းဘော်ရအောင် ရှာကြံ ရသည် ဟု ဆိုလိုသည်။)

(၁၃) စောင်းသံ
ယထာပိ မုနိနန္ဒေယျ၊
ပတွာ သမ္ဗောဓိ မုတ္တမံ။
ဧဝံ နန္ဒေယျံ ကလျာဏီ၊
မိဿဘာဝံ ဂတော ယထာ။

ကိုယ်အင်္ဂါငါးပါး၊ လက္ခဏာများနှင့် ပြည့်စုံသော။ နှမ။ မြတ်စွာဘုရားသည်။ မြတ်သော၊ သဗ္ဗညုတဉာဏ်တော်သို့။ ရောက်၍။ နှစ်သက်တော်မူ၏သို့။ ထို့အတူ။ မယ့်မောင်ငါသည်။ သင်နတ်မယ်နှင့်။ ရောနှောရွှင်ပျော်၊ ပေါင်းဘော်ရခြင်းသို့။ ရောက်သည်ရှိသော်။ နှစ်သက်ရွှင်ဖိန်း၊ ရှိန်းရအံ့တကား။ ။
(ဤကား မုနိငါးပါးတို့ကို အစိုးရတော်မူသော မြတ်စွာဘုရားသည်၊ ထူးကဲလွန်မြတ်လှစွာသော သဗ္ဗညုတဉာဏ်တော်ကို ရ၍၊ ဝမ်းမြောက်နှစ်သက်တော်မူလှသဖြင့် အနေကဇာတိ သံသာရံ စသော ဂါထာဥဒါန်းကို ကျူးရင့်သည်နှင့်အတူ၊ ငါတမူ လည်း၊ ချစ်ဆွေနှမ၊ နတ်မယ်လျနှင့်၊ တကွရွှင်ပျော်၊ ပေါင်းဘော်ယှဉ်တွဲ ရသည်ရှိသော်၊ အလွန်အကြူး၊ အထူးနှစ်သက် ရလိမ့်မည် ဟု ဆိုလိုသည်။)

(၁၄) စောင်းသံ
သက္ကော စေမေ ဝရံဒဇ္ဇာ၊
တာဝတိံသာ နမိဿရော။
တာဟံဘဒ္ဒေ ဝါရေယျာဟေ၊
ဧဝံ ကာမော ဒဠော မမ။

အို သူရိယ ဝစ္ဆ၊ နာမဆန်းကြယ်၊ နတ်မိမယ်။ တာဝတိံသာနတ်တို့ကို။ အစိုးရသော။ သိကြားမင်းသည်။ မယ့်မောင်ငါ့အား။ နတ်ပြည်နှစ်ထပ်၊ နတ်စည်းစိမ်ဆုမြတ်ကို။ အကယ်မသွေ၊ ပေးခဲ့ချေအံ့။ ဤသို့ပေးစေကာမူ၊ ထိုစည်းစိမ်ဆုမြတ်ကို။ မယ့်မောင်ငါသည်။ မလိုတားမြစ်၊ ပယ်ရှားပစ်လိမ့်။ သင်ချစ်ဆွေနှမ၌သာလျှင်၊ မယ့်မောင်ငါ၏။ ရမ္မက်ယစ်ပိုး၊ ချစ်နှောင် ကြိုးသည်။ ဖြေချွတ်နိုင်ဘဲ၊ မြဲလေစွတကား။ ။
(ဤကား၊ အိုသူရိယဝစ္ဆ၊ နာမဆန်းကြယ်၊ မောင့်သယ်လှယ်။ သိကြားမင်းသည်၊ တာဝတိံသာနတ်ပြည်ကြီး၏ စည်းစိမ်ကို၊ အကယ်၍ ပေးစေကာမူ မလိုချင်၊ သင်နတ်မယ်ကိုသာလျှင် လိုချင်သည် ဟု ဆိုလိုသည်။)

(၁၅) စောင်းသံ
သာလံ ဝ နစိရံ ဖုလ္လံ၊
ပိတရံ သ သုမေဓသေ။
ဝန္ဒမာနော နမဿာမိ၊
ကဿတေ တာဒိသီပဇာတိ။

လောကွတ်ပျူငှာ၊ အရာရာ၌၊ လိမ္မာသော ဉာဏ်အမြင်ရှိသော၊ ချစ်ဆွေနှမ။ သင်နတ်မယ်သည်။ အကြင်အဘ၏။ ဤသို့ပြင်လျာ၊ လက္ခဏာများနှင့်ပြည့်စုံသော။ ချစ်သမီးသည်။ ဖြစ်ချေ၏။ မပြတ်။ ပွင့်သော။ နတ်မိမယ်တို့၊ စံပျော်ပျို့သည်၊ မြို့၏အနီး၊ အင်ကြင်းပင်ကြီးနှင့် တူသော။ သင်နတ်မယ်၏။ ခမည်းတော် တိမ္ဗရုနတ်မင်းကို။ ပဉ္စသီခ၊ မည်ရသညာ၊ မယ့်မောင်ငါသည်။ ချီးမွမ်းရွှင်မောလျက်။ တုံ့ဝပ်ရိုကျိုး၊ ရှိခိုးပါ၏။ ။
(ဤကား လောကွတ်ပျူငှာကောင်းသော ချစ်ဆွေနှမ၏ အဘကို ရှိခိုးပါ၏ဟု ဆိုလိုသည်။)

ကိုင်း ... စာသားတွေကတော့ လန်ထွက်နေတာပဲ မဟုတ်လား ခင်ခင် ...
အဲဒီ စောင်းချင်းဂါထာ ၁၅-ပုဒ်နဲ့လည်း ကြွေပြပြီးရော ပဉ္စသီခနတ်သားကို သူရိယဝစ္ဆ နတ်သမီးလေးက မေတ္တာတုံ့ပြန် လိုက် သတဲ့။ တိမ္ဗရုနတ်စစ်သူကြီးကလည်း သမီးတော်နဲ့သဘောတူကြည်ဖြူသွားတယ် ဆိုတော့ အဲဒီအချိန်ကနေစပြီး အခုထက်ထိ ပျော်ရွှင်စွာ ပေါင်းဖော် ကြလေသတည်းပေါ့ ခင်ခင်ရယ် ...
ပုံပြင်လေးကတော့ ဒါပါပဲကွယ် ...


ဟယ်ရီ

Read More...

Wednesday 8 June 2011

နာကြင်နေဆဲပါ - Still Got the Blues

Rock and Blues Legend ဖြစ်တဲ့ အိုင်ယာလန်လူမျိုး ဂစ်တာသမား၊ အဆိုတော် Gary Moore ဟာ အခုနှစ်၊ ဖေဖော်ဝါရီလ၊ ၆-ရက်နေ့ မနက်အစောပိုင်းမှာ စပိန်နိုင်ငံ၊ Estepona မြို့က Kempinski ဟိုတယ်ရဲ့ အခန်း တခုထဲမှာ အပန်းဖြေခရီးထွက်ရင်း နှလုံးရောဂါလို့ ယူဆရတဲ့ ရောဂါနဲ့ ကွယ်လွန်သွားခဲ့ပါပြီ ...


Gary Moore ကို မြောက်အိုင်ယာလန်၊ ဘဲလ်ဖတ်စ်မြို့မှာ ၁၉၅၂-ခုနှစ်၊ ဧပြီလ ၄-ရက်နေ့မှာ မွေးဖွားခဲ့တာမို့ ကွယ်လွန်ချိန်မှာ အသက် ၅၉-နှစ်နီးပါး ရှိပြီဖြစ်ပါတယ်။ နာမည်အပြည့်အစုံက Robert William Gary Moore ဖြစ်ပေမဲ့ Gary Moore လို့ပဲ လူသိများကြပါတယ်။
တမျိုးထူးခြားတဲ့ သူ့ရဲ့ လိဒ်ဂစ်တာ တီးလုံးတွေကြောင့် ကျော်ကြားလာခဲ့သူဖြစ်ပြီး နာမည်ကျော် ဂီတပညာရှင်အများ အပြားနဲ့လည်း တွဲဖက်တီးခတ် ဖျော်ဖြေမှုတွေ ပြုလုပ်တင်ဆက်ခဲ့သူဖြစ်ပါတယ်။

သူ့ရဲ့ ဂီတဘဝ အစဦးပိုင်းမှာ ရော့ခ်ဂီတသမားတဦးအဖြစ် ကျင်လည်ခဲ့ပြီး Gibson ဂစ်တာကို အသုံးများပါတယ်။ ၁၉၉၀-ဝန်းကျင်မှာ ဘလူးစ်ဂီတသမားအဖြစ် ကူးပြောင်းခဲ့ပါတယ်။ Still got the blues အယ်လ်ဘမ်ဟာ သူ့ရဲ့ အောင်မြင် ကျော်ကြားတဲ့ အယ်လ်ဘမ်ဖြစ်ပြီး Billboard Hot 100 မှာ နံပါတ် ၉၇-အဖြစ် စာရင်းဝင်ခဲ့ပါတယ်။ ဒီ အယ်လ်ဘမ်ရဲ့ Title song ဖြစ်တဲ့ Gary ကိုယ်တိုင် ရေးသားတီးခတ် သီဆိုထားတဲ့ Still got the blues သီချင်းဟာ ကျနော့်နှလုံးသားထဲမှာ စွဲနေပါတယ်။

ပင်ကိုယ်က အသံချိုမြတဲ့ Gibson ဂစ်တာပေါ်မှာ Blues ဂီတရဲ့ Style အတိုင်း အလူးအလှိမ့်၊ အဆွဲအငင်တွေ ထည့်ပြီး လေးလေးပင်ပင်နဲ့ စတင်ထားတဲ့ Intro အပိုဒ်ကိုပဲ main theme အဖြစ် တပုဒ်လုံးယူထားပြီး solo မှာ အလှည့်အပြောင်း အမွမ်းအမံလေးတွေနဲ့ဖြည့်ထားပါတယ်။ တကယ်တမ်းကောင်းတာက Stage show မှာပါ။ သီချင်းအဆုံး outro solo (ending လို့လည်း ခေါ်ကြပါတယ်) မှာ improvisation တွေထည့်ပြီး mood အပြည့်နဲ့ လက်စွမ်းပြ တီးခတ်သွားတဲ့ Gary ရဲ့ performance ဟာ တကယ့်ကို စွဲမက်လောက်ပါတယ်။ လှိုင်းထနေတဲ့ ဂစ်တာသံ၊ အသံမြင့် (high pitch) တွေကြားမှာ လက်ကွက်စိပ်စိပ်နဲ့ အမြန်တီးသွားတဲ့ တေးသွားတွေကနေ ဂစ်တာသံဟာ နိမ့်လိုက်မြင့်လိုက်နဲ့ လှိုင်းစီးနေရသလို၊ ပိရိသေသပ်တဲ့အကူးအပြောင်း၊ အလှည့်တွေနဲ့အတူ Climax ကိုရောက်လိုက်၊ sequence တွေလှည့်လိုက် လုပ်ရင်းကနေမှ မူရင်းတေးသွားပိုဒ်ကို ပြန်ခေါ်ပြီး အသံချိုချိုလေးနဲ့ ဖြည်းဖြည်းချင်း ချသွားပုံလေးက အရမ်းကို လှလွန်းပါတယ်။ အလွန်အကျွံ “တီး” လွန်းတယ် လို့ ဝေဖန်ကြတာတွေလည်း ရှိပါတယ်။ ဒါပေမဲ့ ကျနော်ကတော့ အရမ်းကြိုက်ပါတယ်။

တီးခတ်မှုပိုင်းကောင်းသလို စာသားကိုလည်း ခံစားကြည့်ပါ ... တစုံတယောက်သောသူအတွက် ယနေ့တိုင် စွဲစွဲလန်းလန်းနဲ့ ဆွေးမြေ့နာကြင်ခံစားနေရဆဲ သူတွေရဲ့ နှလုံးသားကို တိုက်ရိုက်ထိခိုက်စေတဲ့ စာသားတွေပဲဖြစ်ပါတယ်။ အချစ်ဆိုတာဟာ တချို့သူတွေအတွက် လွယ်ကူပေမဲ့ တချို့သူတွေအတွက်တော့ ခက်ခက်ခဲခဲနဲ့ တန်ဖိုးကြီးကြီး ပေးဆပ် ခဲ့ရတဲ့ အရာတခုပါပဲ ... တချို့အတွက်တော့ အချစ်ဟာ မိတ်ဆွေမဟုတ်ခဲ့ပါဘူး ... ဒါပေမဲ့ ဒီလိုသိရဖို့အတွက် အချိန်အများကြီး ရင်းခဲ့ရပါတယ် ... ကစားပွဲတခုလိုပဲပေါ့ ... နိုင်ဖို့ ကစားကြပေမဲ့ အရှုံးနဲ့လည်း ရင်ဆိုင်ရတာပဲ မဟုတ်ပါလား ... တချို့တွေက တယောက်မကောင်း တယောက်ပြောင်းပြီး လွယ်လွယ်လေး ချစ်နိုင်ကြပေမဲ့ တချို့ကတော့ တသက်မှာ တချစ်ဆိုသလိုပဲ တစုံတယောက်ကိုသာ စွဲစွဲလမ်းလမ်းနဲ့ ခိုင်ခိုင်မြဲမြဲ လေးလေးနက်နက် ချစ်ခဲ့ကြရသူတွေ အဖို့တော့ အချစ်ဆိုတာ နာကျင်မှုတွေဆီ ဦးတည်နေတဲ့ လမ်းတခုသာ ဖြစ်ပါတယ် ...
ဒါပေမဲ့ ... အချိန်တွေ များစွာ ကြာခဲ့ပြီ ဆိုပေမဲ့ ... မေ့မရတဲ့ အဖြစ်တွေနဲ့အတူ နှောင်းတမြေ့မြေ့ နာကျင်ခံစားနေကြရဆဲ အချစ်ကြီးသူများအတွက် ...

Still got the blues
နာကြင်နေဆဲပါ


Verse 1
Used to be so easy to give my heart away
But I found out the hard way
There's a price you have to pay
I found out that love, was no friend of mine
I should have known time after time

နှလုံးသားကို အပ်နှင်းဖို့
သိပ်လွယ်ခဲ့ဖူးတယ် ဆိုပဲ
ကိုယ့်အတွက်တော့ ခဲယဉ်းခဲ့ပါတယ်
ဒါဟာ ပေးဆပ်ခဲ့ရတဲ့တန်ဖိုးတခုပဲပေါ့

ဒီအချစ်ဆိုတာဟာ ...
ကိုယ့်အတွက် မိတ်ဆွေမဟုတ်မှန်း
သိခဲ့ရပြီလေ
အချိန်တွေကြာလာတာနဲ့အမျှ
ဒါကို သိခဲ့သင့်တာပေါ့

So long, it was so long ago
But I've still got the blues for you

ကြာခဲ့ပါပြီ ...
သိပ်ကို ကြာခဲ့ပြီ ဆိုပေမဲ့
မင်းအတွက် ကိုယ်နာကြင်နေရဆဲပါ

Verse 2
Used to be so easy to fall in love again
But I found out the hard way
It's a road that leads to pain
I found that love, was more than just a game
You're playin' to win, but you lose just the same

ထပ်ချစ်ဖို့ဆိုတာ
သိပ်လွယ်ခဲ့ဖူးတယ်ဆိုပဲ ...
ကိုယ့်အတွက်တော့ ခဲယဉ်းခဲ့ပါတယ်
ဒါဟာ နာကျင်မှုတွေဆီ ဦးတည်နေတဲ့ လမ်းပါပဲ
အချစ်ဆိုတာ ...
ကစားပွဲတခုထက်ပိုမှန်း သိခဲ့ရပြီ
နိုင်ဖို့ကစားပေမဲ့ ရှုံးခဲ့ရတာလည်း အတူတူပါပဲ

So long, it was so long ago
But I've still got the blues for you

ကြာခဲ့ပါပြီ ...
သိပ်ကို ကြာခဲ့ပြီ ဆိုပေမဲ့
မင်းအတွက် ကိုယ်နာကြင်နေရဆဲပါ

Cho:
So many years, since I've seen your face
But here in my heart, there's an empty space
Where you used to be

နှစ်တွေအများကြီး ကြာခဲ့ပြီနော် ...
မင်းမျက်နှာလေးကို နောက်ဆုံးမြင်ခဲ့ရတာလေ ...
ကိုယ့်နှလုံးသားထဲမှာတော့ နေရာလပ်တနေရာ ရှိနေဆဲပါ
တချိန်က အဲဒီမှာ မင်းရှိခဲ့ဖူးလေရဲ့

Refrain:
Though the days come and go
There is one thing I know
I've still got the blues for you

နေ့ရက်တွေ ဝင်လိုက်ထွက်လိုက် ရှိနေလည်း
ကိုယ်သိတာ တခုတည်း ...
မင်းအတွက် ကိုယ်နာကြင်နေရဆဲပါ



Well, I’ve still got the blues for you, Gary. မြင့်မြတ်ရာ ဘုံဘဝမှာ စံစားနိုင်ပါစေ ...

ဟယ်ရီ

Read More...

Friday 3 June 2011

တိမ်လှိုင်းတို့၏ဝှက်ဖဲ .... (၂)

ပြီးခဲ့တဲ့ ပို့စ်မှာ တင်ခဲ့တဲ့ "တိမ်လှိုင်းတို့၏ ဝှက်ဖဲ" ဆိုတဲ့ ကဗျာလေးရဲ့ comment ထဲမှာ မခင်ခင်က ကဗျာလေးတပုဒ်နဲ့ comment ပေးသွားခဲ့ပါတယ် ...
မြန်မာကဗျာတွေမှာ ဒီလိုပဲ အပြန်အလှန် ရေးလေ့ရှိကြပါတယ် ... ကျနော်လည်း မမေဓာဝီရဲ့ ကဗျာလေးတချို့ကို အပြန်အလှန် ရေးပေးခဲ့ဖူးပါတယ် ...
အခု မခင်ခင် ပြန်ရေးပေးတဲ့ ကဗျာလေးဟာ နူးညံ့လှပတဲ့ အပြန်အလှန်ကဗျာလေးတပုဒ်မို့ အမှတ်တရလည်းဖြစ်စေဖို့ comment ထဲမှာပဲ ချန်မထားခဲ့ဘဲ လာရောက်လည်ပတ်ကြသူများလည်း ခံစားနိုင်ကြစေဖို့ ပို့စ်တခု အဖြစ် ပြန်လည် မျှဝေလိုက်ပါတယ် ... နှစ်သက်ကြမယ် လို့လည်း မျှော်လင့်မိပါတယ် ... မခင်ခင်ကိုလည်း ကျေးဇူးအထူးတင်ကြောင်းပါ ခင်ဗျာ ...

ဒီအချိန်ဆို
တိမ်ညိုညိုတွေ ပြိုနေပြီပဲလေ ... ။

အမြင့်ပျံငှက်တအုပ်
ခပ်သုတ်သုတ် အိမ်အပြန်
တိမ်ယံထက်က နေမင်း
နှုတ်ဆက်ရင်း အလင်းချွေ
တောင်စွယ်မှာ နေကွယ်လုပြီလေ ... ။

အိပ်မက်တွေကို ကျောခိုင်း
လေရိုင်းတွေကို စီးနင်း
ခရီးပြင်းကိုဆက်နှင်
ပြန်လာခဲ့ချင်လျက်
အတွေ့ခက်ခက်
နေ့ရက်တွေထဲမှာ
ခွဲခွါခြင်းတံတိုင်းတွေ ကာထား
ကမ္ဘာတွေလဲ ခြား … လို့ … ။

ဒီရေလှိုင်းအကျမှာ
အိမ်ပြန်ရလေမလား …
ဒီသောင်ယံအိုမှာ
ခိုလှုံရမှာလား …
စဉ်းစားရင်း မောလျ
သောကညရဲ့အလယ်မှာ
ကြယ်တွေကို ရေတွက်ရင်း
လမင်းအကြွေကို ကောက်
အိမ်အရောက်ပြန်ခဲ့ပါရစေ … ။

ဆုံတွေ့ကြတဲ့အခါ …
အမှားတွေထဲမှာ ပျော်မွေ့
အမှန်တွေကို မေ့ပစ်ရင်း
လွတ်လပ်ခြင်း တေးကိုသီ
ကာရန်ညီ ကဗျာတွေဖွဲ့ကြမယ်လေ … ။


ချက်ခြင်း ပြန်တင်ပေးချင်ပေမဲ့ အခုတလော အင်တာနက်က ပြတ်တောင်း ပြတ်တောင်း ဖြစ်နေလို့ အခု connection ကောင်းနေချိန်လေးမှာ ကမန်းကတန်းရေးပြီး တင်ပေးလိုက်ရခြင်းကို နားလည်ခွင့်လွှတ်ပေးကြဖို့လည်း တောင်းပန်ပါတယ် ခင်ဗျား ...

ဟယ်ရီ

Read More...