ပန်းကြွေလမ်းပဲလျှောက်ရအောင်

‎‎ပန်းကြွေလမ်း ... တဲ့
ကျနော် ကဗျာသိပ်မရေးနိုင်တာ ကြာပါပြီ။ သင်္ကြန်တက်ခါနီး ဘလော့ဂ်တွေ လျှောက်လည်ရင်း မမေ (မမေဓါဝီ) ဘလော့ဂ် ကို ရောက်တော့ ဒီ ကဗျာလေးတွေ့မိပါတယ်။

ပန်းကြွေလမ်း
‎***‎
မလျှောက်စမ်းပါနဲ့
ပိတောက်ပန်းကြွေ မြေခ-လမ်းကိုမှ
လှမ်းလိုလှချင်သူရယ် … ။

ပန်းသခင် …‎
နန်းဝင် ဤပန်းဟာဖြင့်
အတာချိန် ဂိမှာန်လမှာမှ
ထိန်လျံပ ရှာရလေတယ်
သာစွပေ နွေရက်များ … ။

လေနတ်သား …‎
မရပ်မနား သူလာပြန်တော့
ညှာတံမှာ ဗျာဟန်ယိမ်းကာ
ပွင့်ချပ်ဝါ လေလာလွင့်ကို
နင်းရက်ဝံ့လား … ။ … ။

အဲဒီကဗျာလေးကိုဖတ်ပြီး ပြန်ရေးချင်တဲ့ ခံစားချက်လေးတခု ပေါ်လာတာနဲ့ တြိချိုးလေးပဲ ပြန်ရေးလိုက်မိရင်းနဲ့ နှစ်ဟောင်းကို နှုတ်ဆက်ရင်း နှစ်သစ်ကို ကြိုဆိုလိုက်ပါတယ်။ အိပ်ပျော်နေတဲ့ ကျနော့်ကဗျာဝိညာဉ်ကို ပြန်နှိုးပေးခဲ့တဲ့ ပန်းကြွေလမ်းဆိုတဲ့ ကဗျာလေးနဲ့ ဒီကဗျာလေးရဲ့ ပိုင်ရှင် မမေ ကိုလည်း ကျေးဇူးအထူးပါခင်ဗျာ ...

‎ပန်းကြွေလမ်းပဲလျှောက်ရအောင်

လျှောက်ပါရစေ၊
တယောက်နှမမေ ဝေဒနာရနေလား၊
ပိတောက်အလှတွေ ကြွေကာကျလာတော့၊
ဝေဖြာလှပါတဲ့ သည်လမ်းကို၊
လှမ်းလိုလို့လေ။

ပန်းပိတောက်သခင်၊
နွမ်းခြောက်ရင်တောင် သင်းပျံ့ကြိုင်ပါလို့၊
လှမ်းလျှောက်ချင်အောင် မင်းရနံ့လှိုင်နေရဲ့၊
ရှင်းသန့်မြိုင် သင်္ကြန်အတာပွဲမှာ၊
မပန်သာဘဲ ကြွေလည်းလေ၊
မြေထဲမှာပင်မွှေး။

လေအဝင့်မှာ၊
ကြွေလွင့်ကာကျနေဆဲ၊
မြရည်ထဲ အဝါဆင်တဲ့၊
အတာသဘင်ရဲ့ ပိတောက်ပန်းကို၊
ကညာခင်နွဲ့ တယောက်မနမ်းသာပေမယ့်၊
လျှောက်စမ်းပါ လက်တွေတွဲကာပေါ့၊
မျက်ရည်လည်း မဝဲပါနဲ့မေရယ်၊
အသည်းမာ တမင်နင်းတာမဟုတ်ပါဘူး၊
ရင်တွင်းမှာ ပိတောက်ဝေဆဲပါပဲ၊
ကြွေလည်းလေ ရနံ့သင်းနဲ့၊
ဖြန့်ခင်းရာ ပိတောက်လမ်းကို၊
လျှောက်လှမ်းစို့လေး။ ။


ဖတ်ရှုခံစားအားပေးတဲ့အတွက် ကျေးဇူးအထူးပါခင်ဗျာ ...
နှစ်သစ်မှာ မင်္ဂလာအပေါင်းနဲ့ ပြည့်စုံကြပါစေ ...

ဟယ်ရီ