Sunday 18 December 2011

မြန်မာကဗျာဆိုတာ ဂျို(ချို)နဲ့လား (၂၄)

မြန်မာကဗျာဆိုတာ ဂျို(ချို)နဲ့လား (၂၄)

ရတု

အခု ဖော်ပြမှာကတော့ လူအများဆုံးမေးကြတဲ့ လေးလုံးစပ်ကဗျာလင်္ကာထဲမှာပါတဲ့ ရတု စပ်နည်းပဲ ဖြစ်ပါတယ်။ ‎ရတုဟာ လင်္ကာရဲ့ အကိုင်းအခက် တခုပဲ ဖြစ်ပါတယ်။ လင်္ကာကနေ မြစ်ဖျားခံလာတယ်လို့ မှတ်ယူနိုင်ပါတယ်။ ရတုကို ခေတ်အဆက်ဆက်မှာ စာဆိုအကျော် အများအပြားက အမျိုးမျိုးအဖုံဖုံ ဖွဲ့နွဲ့ခဲ့ကြပါတယ်။
ရတုစာဆိုရှင်တွေကို ကြည့်မယ်ဆိုရင်တော့ ရှင်မဟာသီလဝံသ၊ ရှင်မဟာရဋ္ဌသာရ၊ ရှင်တေဇောဒီပ၊ ဆီးပန်းနီဆရာတော် - တို့လို ရဟန်းပညာရှိတွေ၊ မင်းနဝဒေး၊ မင်းလက်ဝဲသုန္ဒြ၊ မင်းဥက္ကာပျံ၊ မင်းလက်ဝဲသုန္ဒရ - စတဲ့ အမတ်ပညာရှိတွေ၊ လှော်ကားသုံးထောင်မှူး၊ ထောင်သင်းမှူး၊ ဇေယျရန္တမိတ်၊ ရှင်သံကိုယ် - စတဲ့ အရာရှိအရာခံတွေ၊ ရာဇဓာတုကလျာမင်းသမီး၊ ဆင်ဖြူရှင်မင်းတရားသ္မီးတော် နဲ့ ကြံညှပ်မင်းသ္မီး စတဲ့ မဟာဆီမဟာသွေး မင်းသမီး သမီးတော်တွေအပြင် အင်းဝဘုရင် ပထမမင်းခေါင်၊ ဇင်းမယ်ဘုရင်မင်းမြတ်၊ တောင်ငူဘုရင်မင်းမြတ် (နတ်သျှင်နောင်)၊ ဟံသာဝတီရောက် မင်းတရားကြီး တို့လို ဘုရင်မင်းမြတ်စာဆိုတော်တွေပါ ရှိပါတယ်။ ဒါပေမဲ့ ဘုရင်မင်းမြတ်စာဆိုကတော့ နည်းပါးလှပါတယ်။

ရတုစပ်နည်းဟာ အတော်လေး ကျယ်ပြန့်ပါတယ်။ “မြစ်ကြီးငါးသွယ် မြစ်ငယ်ငါးရာတို့မှ စီးဆင်းသောရေသည် မဟာသမုဒ္ဒရာ ၌သာ ပေါင်းဆုံမြဲဖြစ်ကြသကဲ့သို့ စင်စစ်အားဖြင့် ခပ်သိမ်းသော စာစီစာကုံး ရေးထုံးရေးနည်းဟူသမျှတို့သည်၊ မူလအခြေခံကြီး ဖြစ်သော ထိုရတုရေးနည်းကို နားလည်လျှင်မည်သည့်အစပ်အဟပ်မျိုးမှာမှခဲယဉ်းဘွယ်မရှိပြီ ...” လို့ ဆရာကြီး သခင် ကိုယ်တော်မှိုင်းက ကဗျာသာရတ္ထသင်္ဂြိုဟ်ကျမ်းမှာ မိန့်ဆိုထားပါတယ်။ ဒါကြောင့် ရတုကဗျာရဲ့ သဘောလက္ခဏာကို ‎အကုန်အစင် သိပြီးပြီဆိုရင် ပျို့၊ မော်ကွန်း၊ ရကန်၊ အဲချင်း၊ အိုင်ချင်း၊ အန်ချင်း တို့ကိုလည်း ‎အကုန်လွယ်ကူ နားလည်နိုင်ပါလိမ့်မယ်။ ရတု ရေးနည်း ဥပဒေသတွေကိုလည်း အရင် ကဗျာပုံစံတွေလိုပဲ ဝိဘာဂ အစိတ်အပိုင်း ၈-မျိုးနဲ့ ပိုင်းခြားပြပါမယ်။ ဒီလို ပိုင်းခြားမပြခင်မှာ ရတုအကြောင်း၊ ရတုကဗျာတွေရဲ့ နောက်ခံသမိုင်းကို အလျဉ်းသင့်လို့ ဒီနေရာမှာ ဗဟုသုတအနေနဲ့ မကျဉ်းမကျယ် ရေးသားဖော်ပြပါမယ်။


ရတုဟူသည် ...

မြန်မာစာပေမှာ ပုဂံခေတ်ကတည်းက ရတုကဗျာတွေ ပေါ်ပေါက်နေတယ်လို့လည်း ထင်မြင်ယူဆဘွယ်ရှိပါတယ်။ ပုဂံခေတ်မှာ ပေါ်ပေါက်တဲ့ ရတုတွေကို မျက်ဝါးထင်ထင် မတွေ့ရှိကြရပေမဲ့လည်း ရတုသဘော သက်ဝင်တဲ့ လင်္ကာတိုကလေးတွေကို တွေ့ရှိရတာကြောင့် လည်းကောင်း၊ ပုဂံခေတ်ပေါ်ကျောက်စာများတွေမှာ ကာရန်အစပ်အဟပ်ညီတဲ့ အဖွဲ့ကလေးများကို တွေ့ရ တာကြောင့် လည်းကောင်း၊ ဒီထင်မြင်ယူဆချက်တွေဟာ မှားတယ်လို့ မဆိုနိုင်ပါဘူး။ ဥပမာ ပြရရင် သက္ကရာဇ် ၅၃၆-ခုနှစ် နရပတိစည်သူမင်းကြီးလက်ထက်မှာ မင်းယဉ်နရသိင်္ခ၏အထိန်းတော် အနန္တသူရိယအမတ်ဟာ မင်းပြစ်မင်းဒဏ် ရာဇသံကြောင့် သေရအံ့ဆဲဆဲမှာ ရေးခဲ့တဲ့ ...
"သူတည်းတယောက်၊ ကောင်းဘို့ရောက်မူ၊ သူတယောက်မှာ၊ ပျက်လင့်ကာသာ၊ ဓမ္မတာတည်း"
အစချီတဲ့ လင်္ကာတိုကလေးရယ်၊ အဲဒီခေတ်ကာလလောက်ကပဲ ဖွဲ့ဆိုတယ်လို့ ယူဆနိုင်တဲ့ ...
"သိုးကလေး။ ။ပုပ္ပါးနတ်တောင်၊ အခေါင်မြင့်မား၊ စုံတောဖျား၌၊ နံ့ရှားကြိုင်လွင့်၊ ခါတန်ပွင့်သည်၊ ရွှေနှင့်ယိုးမှား၊ ပန်းစကား"
အစရှိတဲ့ ပုပ္ပါးနတ်တောင်ဘွဲ့ လင်္ကာရယ်၊ ဒါ့အပြင် ကျစွာမင်းလက်ထက် ဖွဲ့ဆိုတယ်လို့ ယူဆအပ်တဲ့ ...
"မြကန်သာ။ ။တောင်ကျချောင်းတေး၊ ရေဝင်ပြေးလှည့်၊ ရေအေးကြည်စွာ၊ ကန်ပိုင်မာလျက်၊ ကြာပေါင်းထုံထုံ၊ ငှက်မျိုးစုံသည်၊ ဘုံဝတိံက၊ နန္ဒာလော၊ တူစွဟုတ္တာ။"
အစရှိတဲ့ ‘မြကန်ဘွဲ့’ လင်္ကာတိုကလေးရယ်မှာ ပဒလေးလုံး၊ ပဒသုံးလုံးနဲ့ အစချီလို့ လေးလုံးစပ် ကာရန်နဲ့ ဖွဲ့ဆို ထားပြီး အချပိုဒ်မှာလည်း ရှစ်လုံး၊ ခုနစ်လုံး စသည်ဖြင့် ချဆိုဖွဲ့နွဲ့တာကြောင့် လင်္ကာလို့ပဲ ခေါ်ပေမဲ့ တကယ်တော့ ရတုသဘော သက်ဝင်တယ်လို့ ဆိုရပါမယ်။
ရတုစစ်စစ်အရေးအသားကို ပုဂံခေတ်နှောင်း၊ ပင်းယခေတ်ဦးလောက်မှာ စတင်တွေ့ရတယ်လို့ ဆိုရမှာဖြစ်ပါတယ်။ ပင်းယခေတ် သက္ကရာဇ် ၇၀၀-ကျော်လောက်မှာ သက္ကတကျမ်းတတ် လောကနီတိဆရာ ပင်းယစတုရင်္ဂဗလအမတ်ကြီးက ရေးတဲ့ ...
ရွှေဘွားတော်အောက်၊ ကျွန်၏လျှောက်ဖြင့်၊ မလျှောက်ဝံ့ဝံ့၊ လျှောက်ဝံ့ဝံ့တည့်၊ ကြောက်ရွံ့လျက်ပင်၊ စက်ရွှေစင်ကို၊ ထိပ်ပြင်ပန်းနှယ်၊ ဆင်းစမ္ပယ်လျက်၊ ...
အစချီတဲ့ ရတုကဗျာအဖွဲ့မှန်လို့ ဆိုအပ်တဲ့ ပိုဒ်စုံရတုကို မြန်မာစာပေနယ်ပယ်မှာ အစောဆုံးတွေ့ရပါတယ်။ ပုဂံဆရာတော် (သို့) ဆူးတွင်းပစ်ဆရာတော် ရှင်နာဂိတ ကို မြတ်စွာဘုရား တရားတော် ပရမတ္ထအရာ အဘိဓမ္မာနည်းများအကြောင်းနှင့် စပ်လျဉ်းပြီး မေးမြန်းရေးသားထားတဲ့ အမေးပုစ္ဆာရတု ဖြစ်ပါတယ်။ တဖန် ဆရာတော်က ဖြေရတု ကိုလည်း ရေးသားခဲ့ပါတယ်။
တွေ့ရှိရသမျှ ရတုတွေထဲမှာ စတုရင်္ဂဗလအမတ် ရေးတဲ့ ဒီရတုဟာ အစဉ်အလာ အမှတ်အသားအရ လေးလုံးစပ်ကာရန်စနစ်ကို အသုံးပြုတဲ့ ပထမဆုံးသော ကဗျာလင်္ကာ ဖြစ်ကြောင်း အသိအမှတ် ပြုထားကြပါတယ်။ ရတုပီပီသသ အဟောင်းဆုံး ရတုကြီးတစ်ပိုဒ်ပဲ ဖြစ်ပါတယ်။ လောက်လို့ ဆိုရပါလိမ့်မယ်။ ဒါပေမဲ့ တခြားရတုအများစုလို မယ်ဘွဲ့၊ မောင်ဘွဲ့ မဟုတ်ဘဲ မြတ်စွာဘုရားရဲ့တရားတော်အကြောင်းနဲ့ စပ်လျဉ်းရေးသားထားတဲ့ ဓမ္မသဘောသက်ဝင်တဲ့ ရတု ဖြစ်ပါတယ်။ 
အင်းဝခေတ်ကနေ အစပြုပြီး ရတုနယ်ပယ်ဟာ ကျယ်ဝန်းလာပါတယ်။ အရေးအသားတွေလည်း တိုးတက်လာပါတယ်။ မယ်ဘွဲ့၊ မောင်ဘွဲ့၊ ကျေးစေရတုတွေ ပေါ်ပေါက်လာ ပါတယ်။ ရတုစာဆို အများအပြား ပေါ်ထွန်းခဲ့ပါတယ်။ အင်းဝဘုရင် ပထမမင်းခေါင်၊ စာဆိုတော်ရှင်သူရဲ၊ ရှင်မဟာသီလဝံသ၊ ရှင်မဟာရဋ္ဌသာရ၊ ရခိုင်သူ မိညို၊ အင်းဝသူ မိဖြူ၊ ရှင်ထွေးနာသိန် စတဲ့ စာဆိုတွေဟာ အင်းဝခေတ် ရတုစာဆိုကျော်များ ဖြစ်ကြပါတယ်။
အင်းဝခေတ်မှာ အရှိန်ရလာတဲ့ ရတုအရေးအသားဟာ တောင်ငူခေတ်မှာ တံခွန်စိုက်တယ်လို့ ဆိုရပါမယ်။ လူပုဂ္ဂိုလ် အများအပြားဖွဲ့ဆိုလာတာမို့ တောင်ငူခေတ်ကို ရတုခေတ်ကြီး လို့လည်း ခေါ်တွင်ပါတယ်။ သက္ကရာဇ် ၉၀၀-ကျော် လောက်မှာ ရတုနဝဒေးကြီးလို့ ကျော်စောထင်ရှားတဲ့ စစ်ကိုင်း ထောင်သင်းမှူး (ခေါ်) စလင်းလက်ျာ (ခေါ်) ပြည်နဝဒေးကြီးဟာ ရတုပုဒ်ရေပေါင်း ၃၀၀-နီးပါးကို စပ်ဆိုဖွဲ့နွဲ့ခဲ့ပါတယ်။ ရတုအများဆုံး ဖွဲ့နွဲ့ခဲ့တဲ့ စာဆိုရှင်ပါ။ နဝဒေး နောက် နှစ်ပေါင်း ၃ဝ-ခန့် အကြာမှာ ရတုဘုရင် နတ်သျှင်နောင် ပေါ်ခဲ့ပြန်ပါတယ်။ တောင်ငူဘုရင်မင်းမြတ် ဖြစ်တဲ့ နတ်သျှင်နောင်ဟာ မြန်မာကဗျာသမိုင်းမှာ စံတင်ရလောက်တဲ့ ရတုပုဒ်ရေ ၆၀-ကျော် ရေးသားဖွဲ့နွဲ့ခဲ့ပါတယ်။ စကားကျစ်လျစ် သိပ်သည်းပြီး လှပပြောင်မြောက်တဲ့ အဖွဲ့တွေနဲ့ မွမ်းမံထားတဲ့ ရတုတွေကြောင့် နတ်သျှင်နောင်ကို ‘‘ရတုဆိုခြင်း၌ သိမ်မွေ့၏။ ဂမ္ဘီရဉာဏ်နှင့် ပြည့်စုံ၏’’ဟု ဆိုကြပါတယ်။ နတ်သျှင်နောင်ရဲ့ ရတုတွေဟာ စာဆိုတွေရေးဖွဲ့သမျှ ရတုတွေထဲမှာ အကောင်းဆုံးလို့ အသိအမှတ်ပြုထားကြပါတယ်။ ဒါကြောင့် အဟောင်းဆုံး ရတုဆရာ ဟာ စတုရင်္ဂဗလအမတ်၊ အကောင်းဆုံး ရတုဆရာဟာ နတ်သျှင်နောင်၊ အများဆုံး ရတု ဆရာဟာ နဝဒေး လို့ ဆိုပါတယ်။ တောင်ငူခေတ်ရဲ့ ထင်ရှားတဲ့ တခြားရတုစာဆိုတွေကတော့ လှော်ကားသုံးထောင်မှူး၊ ရခိုင်စာဆို ဥက္ကာပျံ၊ မင်းဇေယျရန္တမိတ်၊ ရှင်သံခိုတို့ ဖြစ်ပါတယ်။
ညောင်ရမ်း ခေတ်မှာတော့ တောင်ငူခေတ်လောက် ရတုတံခွန်မစိုက်ပေမဲ့ ရှင်ကဝိက၊ မြင်းခွာစား မင်းရာဇာ စသော ရတုစာဆိုတွေ ရှိသေးတဲ့အတွက် ရတုအရေးအသား မပြတ်လပ်ခဲ့ပါဘူး။ ညောင်ရမ်း ၁၀-ဆက်မြောက် ဟံသာဝတီရောက် မင်းတရားကြီး ဟာ အင်းဝပျက်ပြီး ဟံသာဝတီမှာနေရတုန်း နတ်ရွာစံခါနီးမှာ ‘ပုဂ္ဂိုလ်ခြောက်မည်’ အစချီ သုံးချက်ညီ သံဝေဂပိုဒ် ရတုကို ရေးသားတော်မူခဲ့ပါတယ်။
ညောင်ရမ်းခေတ်အပြီး ကုန်းဘောင်ခေတ်မှာလည်း ရတုတွေ ဆက်လက်ရေးဖွဲ့ခဲ့ကြပြန်ပါတယ်။ “မဲဇာတောင်ခြေ” အစချီတဲ့ လက်ဝဲသုန္ဒရအမတ်ကြီးရဲ့ ပိုဒ်စုံရတုဟာ အခုထိ ထင်ရှားဆဲ ဖြစ်ပါတယ်။ ထင်ရှားတဲ့ ရတုစာဆိုတွေ ကတော့ လက်ဝဲသုန္ဒရ ဦးမြတ်စံ၊ တွင်းသွင်းတိုက်ဝန် မဟာစည်သူ၊ စိန္တကျော်သူ ဦးဩ၊ ဦးတိုး၊ စဥ့်ကူးမင်းမိဖုရား ရှင်မင်း၊ ဘိုးသူတော်ဦးမင်း၊ ဦးယာ၊ ဝက်မစွတ် နဝဒေး၊ ဦးပုည၊ ကင်းဝန်မင်းကြီး ဦးကောင်း၊ ဆီးပန်းနီ ဆရာတော် စတဲ့ ပုဂ္ဂိုလ်တွေပဲ ဖြစ်ပါတယ်။
အခုဆက်လက်ပြီး ရတု ရေးနည်း ဥပဒေသတွေအကြောင်း ဝိဘာဂအစိတ်အပိုင်း ၈-မျိုးနဲ့ ပိုင်းခြားဖော်ပြပါမယ်။

ရတု ရေးနည်း ဥပဒေသများ

(၁) အမည်အားဖြင့်

ရတုဆိုတဲ့ စာလုံး ကို အမည်အားဖြင့် ကြည့်မယ်ဆိုရင် … 
‎(က) သဘင်၊ အခမ်းအနား၊ အခြေအနေ ဆိုတဲ့ အဓိပ္ပာယ်ရတဲ့ မြန်မာပေါရာဏ (ရှေးစကား) စကားလုံး 
‎(ခ) အခါရာသီ၊ ရာသီဥတု ဆိုတဲ့အနက်ကိုဖော်ပြတဲ့ သက္ကဋဘာသာစကားလုံးဖြစ်တဲ့ ‘ရိတု’ ဆိုတဲ့စကားက ရွေ့လျောလာတဲ့ စကားလုံး၊ (ပါဠိဘာသာအနေနဲ့ ‘ဥတု’ လို့ခေါ်ပါတယ်)
‎(ဂ) ကဗျာလင်္ကာအမျိုးအစားတမျိုးရဲ့ အမည်နာမ လို့ အနက်အဓိပ္ပာယ်ရတဲ့ စကားလုံး (ဥပမာ - မဲဇာတောင်ခြေ-ရတု)
စသဖြင့် ၃-မျိုးရှိပါတယ်။ 
‎တချို့ကလည်း ‘ရတိံ၊ ဇနေတီတိ၊ ရတု’၊ လူတို့သည် မွေ့လျော်ကြကုန်သောကြောင့် ရတုဟုခေါ်၏ လို့ ဝိဂြိုဟ်ပြုခဲ့ကြပါသေးတယ်။ 
ဒီလို ရတု ဆိုတဲ့ စကားလုံးရဲ့ အဓိပ္ပာယ် ၃-မျိုးကို ဥပမာ အနေနဲ့ ကောက်နုတ်ဖော်ပြထားတာတွေကို အနည်းအကျဉ်း တင်ပြပါ့မယ် ...
‎(က) ‘သဘင်၊ အခမ်းအနား၊ အခြေအနေ’ လို့ အဓိပ္ပာယ်ရတဲ့ ရတု ဥပမာတွေကတော့ .... 
• ‎ကျူးချီပဉ္စင်၊ သဘင်ပျော်မှု၊ မင်း‘ရတု’ဖြင့်၊ ရွယ်နုထွားမွတ် ... ။ (ဇယဒိသပျို့)
• ‎ရွှင်ပြုံးပျော်ပါး၊ နဂါးတို့မှု၊ ‘ရတု’သဘင်၊ ပဉ္စင်တူရိယာ ... ။ (စမ္ပေယျပျို့)
• ‎မြစ်ခွင်အလုံး၊ မဆုံးလေမှု၊ ရေ ‘ရတု’ ဝယ်၊ ပြည်သူ့ဦးခေါင်း ... ။ (မဟာဝီရချီ - ကျေးသားခန်း)
• ‎သည်းကြားလွန်ကြင်၊ မိချစ်ရှင်အား၊ သဘင် ‘ရတု’၊ မင်းမှုပိုက်ဖြား ... ။ (သခင်ကြီး ဧးချင်း)
• ‎စမြောင်ရွှေသိုင်း၊ ရီရိုင်းရောရု၊ မင်း ‘ရတု’ ဖြင့်၊ မင်းမှုမင်းလျှောက် ... ။ (ဇနကပျို့)
‎ဒီနေရာမှာ ဗဟုသုတအနေနဲ့ ပြောရရင် ....
• အများနဲ့စပ်ဆိုင်တဲ့ အဖွဲ့မျိုးဟာ ‘သဘင်’၊
• အများနဲ့မစပ်ဆိုင်ဘဲ တဦး တယောက် အတွက်ပဲ စပ်ဆိုထားတာဆိုရင် ‘အခမ်းအနား’၊
• ပကတိဖြစ်ထွန်းတဲ့ သဘာဝဓမ္မ ဩကာသ လောက တောတောင် ရေ မြေ အခြေအနေတွေကို ပြရင် ‘အခြေအနေ’ ... 
ဆိုတဲ့ သဘောသက်ရောက်ကြောင်း ယူဆကြပါတယ်။ ရွှေရတု၊ ငွေရတု၊ စိန်ရတု စတဲ့ အခမ်းအနားကို ခေါ်ဝေါ်ကြပုံမျိုးပါ။ ရှေးဟောင်း မြန်မာဘာသာစကားသုံး သက်သက်မျှသာ ဖြစ်ပါတယ်။


‎(ခ) ‘အခါရာသီ’ လို့ အဓိပ္ပာယ်ရတဲ့ ရတု ဥပမာတွေကတော့ ....
• ‎သန်ဆောင်းခါနွေ၊ သုံးထွေဥတု၊ ‘ရတု’ ခြောက်လီ၊ ရာသီသာစွာ့၊ ဆဲ့နှစ်လတွင် ... ။ (ဣတိသိင်္ဂပျို့)
• ‎မပူမလောင်၊ မခေါင်မိုးလေ၊ သုံးထွေ ‘ရတု’၊ ညီသမှုဖြင့်၊ တောင်သူ့တောသား ... ။ (ဂုတ္တိလပျို့)
• ‎နန်းတောင်းများလျှင်၊ ငါးရာ့ခုနစ်ဆယ်၊ စွန်းကယ်သုံးခု၊ ‘ရတု’သစ်ဆင်း ... ။ (စစ်ကိုင်းမင်း - မျိုးတော်ရတု)
• ‎နယုံတွယ်တာ၊ နံကာပန်းလု၊ ‘ရတု’သစ်ဆင်း၊ တော်သလင်းလျှင် ... ။ (နဝဒေးဆို - ဟံသာဝတီဖွဲ့ရတု)
• ‘ရတု’ခြောက်မည်၊ အတည်တည်၊ မည်သို့ခွဲချမ်းပေလိမ့်နည်း။ (စွယ်စုံကျော်ထင် - ညသတ်)
• ‎ဂိမန္တဟု၊ သာလှပျော်မှု၊ သည် ‘ရတု’ ၌၊ ညွန့်နုဆဲဆဲ ... ။ (ဂါထာ ၆၀-ပျို့)
• သုံးလီဥတု၊ လက်ဝယ်လုသား၊ ‘ရတု’သာစွာ့၊ လမဏ္ဍလင်၊ သဘင်ဂိမှန် ... ။ (ကပ္ပီလဝတ်ကြွခန်း - တောလားရတု)
‎တစ်နှစ်မှာ နွေမိုးဆောင်း သုံးရာသီရှိသလို ရတုမှာလည်း များသောအားဖြင့် သုံးပိုဒ် ဖွဲ့ဆိုလေ့ရှိပါတယ်။ အကြောင်းအရာ အားဖြင့် ရာသီဘွဲ့တွေကို အထူးဖွဲ့ဆိုခဲ့ကြတာလည်း ရှိပါတယ်။

‎(ဂ) ‘ကဗျာလင်္ကာအမျိုးအစားတမျိုးရဲ့ အမည်နာမ’ လို့ အဓိပ္ပာယ်ရတဲ့ ရတု ဥပမာတွေကတော့ ....
• ‎‎အေးကြိုက်ချည်ချည်၊ ဖျည်ဖျည်ညှင်းညှင်း၊ သီချင်း ‘ရတု’၊ ပျော်မှုတသီး ... ။ (သံဝရပျို့)
• တတ်သော်ကောင်းဟု၊ ညှင်းစောင်းကဗျာ၊ လင်္ကာ ‘ရတု’၊ ရေးသားမှုနှင့် ... ။ (ရှင်မဟာရဋ္ဌသာရဆို - ကိုယ်ရည်သွေးရတု)
• ‎သိပ္ပခေါင်ထွတ်၊ တတ်ပါစေချည်း၊ ဖွဲ့နည်းကဗျာ၊ လင်္ကာ ‘ရတု’၊ ဆိုမှုရွရွ ... ။ (နန်းတွင်းသူ မယ်ဖြူဆို - ကိုယ်ရည်သွေးရတု)
• ‎ဝှန်တက်ပညာ၊ လင်္ကာ ‘ရတု’၊ ဆိုမှုရွရွ၊ ကြားကစိတ်ဝမ်း၊ သူ့နားချမ်းလိမ့် ... ။ (နန်းတွင်းသူ မယ်ညိုဆို - ကိုယ်ရည်သွေးရတု)
• ‎ပြလတ်ပိမ့်ငှါ၊ ဤအခါတည့်၊ ကဗျာရတု၊ ဆိုမှုစီကုံး၊ အစဉ်ထုံးကား ... ။ (မာန်လည်ဆရာတော်ရေး ရတုချီနည်းချနည်း လင်္ကာ)
‎စသဖြင့် ဖော်ပြထားတာ တွေ့နိုင်ပါတယ်။ ညောင်ရမ်းခေတ်မတိုင်မီက ရတုကို ‘ရမန္တိ သတ္တာ ဧတ္ထ တေနာတိဝါရတု’ ရယ်လို့ ဝိဂြိုဟ်ပြုသူက ပြုကြပါတယ်။ အနက်ကတော့ ... သတ္တာ၊ သတ္တဝါတို့သည်။ ဧတ္ထ တေနာတိ၊ ဤသီချင်းဖြင့်။ ရမန္တိ၊ မွေ့လျော်ကြကုန်၏။ ထိုကြောင့် ဝါရတု၊ ရတုဟု ခေါ်၏ ... လို့ အနက်ပြန်ထားပါတယ်။ 
အဓိက ဆိုလိုချင်တာကတော့ ရတု ဆိုတဲ့ စကားလုံးကို ‎အဓိပ္ပာယ်အမျိုးမျိုး ကွဲပြားပြီး သုံးစွဲလေ့ရှိတယ်၊ သုံးစွဲနိုင်တယ်ဆိုတာပါပဲ။‎ ရတု လို့တွေ့ရတိုင်း ကဗျာပဲ လို့ မပြောနိုင်ပါဘူး။ တခြားအဓိပ္ပာယ်တွေနဲ့လည်း သုံးနိုင်ပါတယ်။
‎“ရိုးသားလှသော အမျိုးသမီး” လို့ အဓိပ္ပာယ်ရတဲ့ “ရတူ” ဆိုတဲ့ ပါဠိဘာသာကနေ ရတု-ဖြစ်လာတယ် လို့လည်း မှတ်သားဖူး ပါတယ်။ ဒွေးချိုး၊ လေးချိုး၊ တေးထပ် စတဲ့ ကဗျာတွေလို အချိုးအဆစ် အက္ခရာလုံးရေအားဖြင့် အဆန်းတကြယ် ဖွဲ့နွဲ့စီကုံးခြင်း မဟုတ်ဘဲ အချိုး မဖက် ၄-လုံးစပ် ရိုးသားတဲ့ မိန်းမပျိုလေးလို ရိုးရိုးကလေးစီကုံးတဲ့ အဖွဲ့အနွဲ့ဟာ ရတုမည်တယ်လို့ ဆိုလို ခြင်း ဖြစ်ပါတယ်။ ရတုသွားတွေကို ကြည့်လျှင်လည်း ဒီအတိုင်းပဲ တွေ့ရပါတယ်။
မြန်မာမှုမှာ ဥတု ၃-ပါး၊ ဥတု ၆-ပါးကို ရတု ၃-ပါး၊ ရတု ၆-ပါးလို့ ဆိုလေ့ရှိသလို၊ အနံ့ကို ရနံ့ ဆိုပြီး ပြောဆိုသလို ရတုဆိုတာဟာလည်း အတုနှင့် အတူတူပဲဖြစ်တယ်။ ‘အတု’ ဆိုတဲ့ မြန်မာစကားမှာ ‘အ’ နေရာမှာ ‘ရ’ ကိုသွင်းပြီး ရတု ဖြစ်လာတယ်လို့လည်း ဆိုသင့်ကြောင်း ပြောကြပါတယ်။ ဒါ့အပြင် ရတုကို မြန်မာဝေါဟာရအနေနဲ့ စဉ်းစားကြသူတွေကတော့ ရတု ဆိုတာ ရ နှင့် တုကို ပေါင်းထားတာဖြစ်လို့ မိမိရရ တုပပြိုင်ဆိုင် စပ်ဆိုတဲ့ ကဗျာတစ်မျိုးဖြစ်ကြောင်း ဆိုကြပါတယ်။ ရကန်-ဆိုတဲ့ ကဗျာလင်္ကာစီကုံးရာမှာ တပါးသူတို့ရဲ့ စာသွားစာလာကို ကန်ကျောက်တွန်းလှန်ပြီး ရေးစပ်ရတယ်လို့ ဆိုပါတယ်။ ရတု ကတော့ ဒီလိုမဟုတ်ဘဲ ရှေးသူဟောင်းတွေရဲ့ စာသွားစာလာကို အတုယူပြီး စီကုံးဖွဲ့နွဲ့ကြရပါတယ်။ ရှေးပုဒ်အချီအချကို နောက်ပုဒ်က အတုလိုက်ပြီး ချီရ-ချရပါတယ်။ ဒါကြောင့် အတုအပ အပြိုင်အဆိုင် စပ်ဆိုတဲ့ ကဗျာတမျိုး၊ အတုယူကာ အတုပြုကာ ဖွဲ့ဆိုရတဲ့ အဖွဲ့ကို ရတု-လို့ ဆိုလိုပါတယ်။

ကျန်တဲ့ ဥပဒေသတွေကို ဆက်လက်ဖော်ပြသွားပါ့မယ် ...

ဟယ်ရီ

Read More...

Sunday 11 December 2011

သစ်တောနဲ့မြစ်

သစ်တောနဲ့မြစ်

(၁)

ကိုယ့်တိုင်းပြည် ကိုယ်ချစ်မှ၊
ကိုယ့်သစ်တော ကိုယ်ခင်မည်။

ရေဝေတောတွေ ထိမ်းသိမ်းလို့၊
စိမ်းစိမ်းညို့ ဟိုတောင်ဆီ။

သစ်တောနဲ့ရာသီ၊
မြန်မာပြည်ရဲ့ အသက်။

တောပြုန်းကာ ရာသီဆိုးမှာ၊
မိုးလေကဖျက်။ ။

(၂)

ကိုယ့်လူမျိုး ကိုယ်ချစ်မှ၊
ကိုယ့်မြစ်ချောင်း ကိုယ်ခင်တွယ်။

ဘိုးဘွားအမွေ အမှတ်မျိုး၊
မြတ်နိုးနိုင်မယ်။

ကိုယ့်မြစ်ချောင်း ကိုယ်ကာကွယ်၊
မြန်မာ ... ရယ်လို့ ကမ္ဗည်းထိုး။

ရွှေမမက်ပါဘူး၊
ငွေမမက်ပါဘူး၊
ရေတစ်စက်ကို အသွေးအသားလို၊
အလေးထားကာ ချစ်သလောက်၊
မြစ်ပျောက်မှာစိုး။ ။


မောင်စိန်ဝင်း (ပုတီးကုန်း)

Read More...

Saturday 3 December 2011

စွယ်တော်ရိပ်တို့ကျောင်းတော်မြေ

ဆရာတင်မိုးရဲ့ ရွှေညာကျေးကတက္ကသိုလ်ကို ဖတ်မိတာနဲ့ အမိ ရန်ကုန်စက်မှုတက္ကသိုလ်ကို လွမ်းဆွတ်တမ်းတမိရင်း နွယ်သာကီသံဖြတ်လေး တပုဒ်လိုက် ရေးကြည့်မိပါတယ် ...


စွယ်တော်ရိပ်တို့ကျောင်းတော်မြေ

တကယ်ပျော် ငယ်ဖော် အရွယ်တော်အတိတ်က
စွယ်တော်ရိပ်တို့ကျောင်းတော်မြေဗျ ... ။
ဖတ်ရာမှတ်ရာ တတ်စရာတို့၊
မြတ်ဆရာပို့ချ ကျောင်းတော်မြေ ... ။
ရင်မှာ ပညာ သင်ကာဖြည့်တဲ့၊
အစဉ်အလာအပြည့်နဲ့ ကျောင်းတော်မြေရှင့် ... ။
အကြံစုံ ဉာဏ်စုံ မြန်ဂုဏ်မျက်ရှု
ရန်ကုန်စက်မှုတက္ကသိုလ်ဗျ ... ။

သဘောမှာဆန်း
ပြောကာလွမ်းခဲ့
သောစရာအဆန်းကွယ့် မှတ်လောက်စရာ
သြဘာလမ်းတဲ့ ဖြတ်လျှောက်ပါလေ့၊
တိုင်ဆယ့်ရှစ်လုံး ကျောင်းဂုဏ်အင်ရယ်
လှိုင်ခဲ့ဖြစ်ထုံး နှောင်းပုံပြင်ကြွယ် ...
အစီအရီထိုင်လို့ လမ်းထိပ်မြေတွင်
ဘီပီအိုင်သို့ လွမ်းရိပ်ဝေသရှင် ... ။
မြန်မာပြည်ရဲ့ အသိကြွယ်ဖော်၊
ကမ္ဘာတည်မယ့် အမိစွယ်တော်ဗျ ...။
သုခုမလည်း စီးဝင်ကာ
ပြုစုကြမြဲ နည်းပညာလေ့ ... ။
သင်မြင်ဆရာတို့ လက်ညီစွာ
အင်ဂျင်နီယာတို့ တက္ကသီလာတော့ ... ။
ရီမောလှောင်ကြ ညညတွေဆို၊
ဂျီဟောဆောင်က မမတွေကို၊
မွှေးမြလွမ်းခဲ့ ရင်မှကဗျာ၊
တေးအလှလွှမ်းခဲ့သဇင်ညမှာ၊
ထူးခြားအောင်လို့ ထွင်လိုပေလျှင်၊
ဒူးယားဆောင်သို့ ဝင်ခိုစေချင်၊
မြူးစရာအစဉ်ကွယ့် အသင့်ယူဆောင်၊
ဦးသာဒင်ရဲ့ စဥ့်ကူဆောင်ဗျ ...
ကြည်မြအောင်ပ စိတ်တွေးမျှော်
ဇီဝကဆောင်က အရိပ်အေးသနော်၊
အလုပ်များမြောင်လို့ ကြာတဲ့အခါ
ပုပ္ပားဆောင်သို့ လာခဲ့ပါ
အောင်သတင်းမွှေးတဲ့ အကိုတွေရယ်
အဆောင်အင်းလေးက ကြိုနေမယ်
တို့ဘုန်းရောင်က ပြောင်မော်သလေ၊
ကြို့ကုန်းဆောင်က နောင်တော်တွေ၊

အို ... အင်ဂျင်နီယာအပေါင်း
ရင်ခွင်တရာ ပြောင်းသော်လည်း၊
တို့ကျောင်းတော် စွယ်တော်ရိပ်ဆီက
ငယ်စိတ်တွေ တလွင်လွင်၊
လွယ်အိတ်တွေ တပြင်ပြင်နဲ့၊
ဟိုအရင် အိပ်မက်လမ်းကို၊
တမ်းမိရင်နော် ...
ပျော်မိပါဘိတော့လေး ... ။

(နွယ်သာကီသံဖြတ်)

အမိ ရန်ကုန်စက်မှုတက္ကသိုလ်နေ့ရက်များသို့ လွမ်းဆွတ်သတိရခြင်းများစွာဖြင့် ...

ဓာတ်ပုံတွေကို google images, Myanmar Engineer Forum (www.myanmarengineer.org) နဲ့ GREATMAYNMAR website (www.greatmyanmar.com) တို့ကနေ ရရှိပါတယ် ...


ဟယ်ရီလွင်

Read More...

Tuesday 1 November 2011

ဤနေရာတွင်

ဤနေရာတွင် ...
ကာရန်တစ၊ လင်းမြမြဝေ၊
ကြယ်ကြွေပျိုးလက်၊ အိပ်မက်ရနံ့
ဆွတ်ပျံ့ဝေမူး နှင်းဆီဖူးသို့ ...

ဤနေရာတွင် ...
သံစဉ်လှုပ်နိုး၊ စောင်းကြိုးသီတင်း၊
ညှို့သွင်းခုံမင်၊ ပုံပြင်ညတို့၊
ဆွတ်ပြသီဝေ့ တရွေ့ရွေ့လွန် ...

ဤနေရာတွင် ...
ကြယ်စင်တတင်း၊ သူငယ်ချင်းဖို့၊
လမင်းမိုးစွန်၊ ပိုက်ကွန်ချည်ဖမ်း၊
တမ်းတမ်းတတ သီခဲ့ရဖူး ...

ဤနေရာတွင် ...
ဝင်ကာခိုနား၊ ပြန်ထွက်သွားလည်း၊
ချန်ထားခြေရာ၊ ဝေဒနာနှောင်း၊
အိပ်မက်ဟောင်းတို့၊ ပြန်ပြောင်းပုံပြင်၊
ပိုးအိမ်မျှင်ည လှိုက်ဖိုလျကျန် ...

ဤနေရာတွင် ...
တိမ်လွှာမြူဝေ့၊ ကြယ်ငွေ့နှင်းရိပ်၊
မှေးအိပ်လျတမ်း၊ မှော်ဝင်ပန်းနှင့်၊
နှုတ်ခမ်းဝတ်မှုံ၊ သင်းထုံပျံ့မှိတ်၊
အတိတ်တံတား၊ နှင်းကမ်းပါးအို ...

ဤနေရာတွင် ...
ရင်ခွင်ရိပ်ငြိမ်၊ စံအိမ်တည်ရာ၊
ကတ္တီပါနန်း၊ ဝတ်ရည်ဖြန်းလှုံ၊
ပန်းငုံယှက်မှေး၊ နုထွေးမွှေးမြ၊
အမတ,မှော်၊ ပျော်ဝင်လျောင်းစက်၊
အိပ်မက်ဥယျာဉ် ...
ဧဒင်မှကြိုနေဆဲပါ .... ။ ။

ဖတ်ရှုခံစားအားပေးတဲ့အတွက် ကျေးဇူးအထူးပါ ခင်ဗျာ ...

ဟယ်ရီ


Read More...

Monday 31 October 2011

မြန်မာကဗျာဆိုတာ ဂျို(ချို)နဲ့လား (၂၃)

တေးတွဲ့
‎တေးတွဲ့ကဗျာအမျိုးအစားဟာလည်း အခုခေတ်မှာ တိမ်မြုပ်နေပြီ ဖြစ်ပေမဲ့ ရေးသားစပ်ဟပ်ရာမှာ အလွန်စိတ်ဝင်စားစရာ ‎ကောင်းတဲ့ ကဗျာမျိုး ဖြစ်ပါတယ်။ ဗဟုသုတလည်း ရအောင်၊ အမျိုးအစားလည်း စုံအောင် ရည်ရွယ်ပြီး အကျဉ်းချုပ် ဖော်ပြလိုက်ပါတယ်။

တေးတွဲ့ဆိုတဲ့ အမည်ကို အရင်စကြည့်မယ်ဆိုရင် ...


တေး - ဆိုတာ ကဗျာ သီချင်း လို့ အဓိပ္ပာယ်ရပြီး သင်္ချာ ဂဏန်းအရ ၃- ဆိုတဲ့ အနက်ကို ဖော်ပြပါတယ်။
တွဲ့ - ဆိုတာကတော့ လေးကန် ဖင့်နွှဲတဲ့ အနက်သဘောကို ဖော်ပြပါတယ်။
ဒါကြောင့် ဖြေးနှေး ဖင့်နွှဲစွာ ရွတ်ဆိုရသော ကဗျာ (သို့မဟုတ်) အပုဒ် ၃-ပိုဒ်ဖြင့် ဖင့်နွှဲ ဖြည်းညင်းစွာ ‎သီဆိုရသော ကဗျာလို့ အဓိပ္ပာယ် ဖွင့်ဆိုထားပါတယ်။

နောက်တမျိုးအနေနဲ့ဆိုရင် ...
တေး - ကို ဂဏန်းသင်္ချာ ၃-ခု အနေနဲ့ယူပြီး တွဲ့ - ကိုတော့ တွဲ (ဆက်တွဲခြင်း) အနက်အဓိပ္ပာယ်လို့ ယူဆပြန်တော့ အပိုဒ် ၃-‎ပိုဒ် ဆက်တွဲ ရေးရတဲ့ ကဗျာလို့ အဓိပ္ပာယ် တမျိုးရပြန်ပါတယ်။

တေးတွဲ့ကို ရေးတဲ့အခါ အပိုဒ်သုံးပိုဒ် ရေးပြီး အချီ တူညီရမှာဖြစ်ပါတယ်။ အချီပိုဒ်ကို လဟုချီပြီး ဂရု ချပါတယ်။ နောက်ဆုံးပိုဒ်ကိုတော့ တေးထပ်လိုပဲ “လေး” ဆိုတဲ့ စကားလုံးနဲ့ ချရပါတယ်။ ရတုတွေရေးတဲ့အခါ အချီညီ၊ အချညီ ရေးကြပေမဲ့ အဲဒီလို အမြဲတမ်း ညီအောင်ရေးစပ်ဖို့ မလိုအပ်ပါဘူး။ ဒါပေမဲ့ တေးတွဲ့ကတော့ အချီ ညီကို ညီရပါမယ်။
တပိုဒ် မှာ အချိုး ၄-ချိုးစီ ‎ပါတယ်။ ရှေးလေးချိုးကြီး အသွားဆန်ဆန်၊ လေးလုံးစပ်တချို့၊ သံချို အသွားဆန်ဆန် ‎ငါးလုံး,ခြောက်လုံး တချို့ ထားပြီး စပ်ရပါတယ်။ အချီမှာတော့ ၃-လုံး ချီနည်းနဲ့ ၄-လုံး ချီနည်း ‎နှစ်မျိုးရှိတယ်လို့ ဆိုထားတာကို တွေ့ရပါတယ်။

နမူနာ တေးတွဲ့ ကဗျာတပုဒ် ကြည့်ရအောင်။

‎(၁) “ဘုံနန်းက-မှန်းဆ ချေ လျှင်
ဃောသ လေးပြန်၊ ဝေးလောက်တန်တွင်၊ နိဗ္ဗာန်ရည်မှန်းလို့၊ တည်သန်းပုံ သဗ္ဗညုလို၊ ရွှန်းနုစုံလင်
တက်, သက်,လှေကား၊ နှစ်စုံပွားလို့၊ ထူးခြားသန့်ရှင်း၊ ဘိုးတော်မင်းထက်၊ ဉာဏ်လင်းအင်၊ မမြင် ‎တောင်းပေရသေး
စူဠာမဏိ၊ မည်တော်ရှိတဲ့၊ သီရိထွေငေါ်၊ စေတီကျော်ကို၊ ပြည်တော်သူ သွတ်လှယ်ကူးလို့၊ ‎ဖူးကြတယ် လေး

‎(၂) “ထုံပန်းလှ-ပန်းက ထွေအင်
ဆွမ်းတော် ရေကြည်၊ ပွဲရံတည်သား၊ တီးစည် ခတ်ရွမ်းလို့၊ ရောင်လျှမ်း အရုဏ်ခပ်လျှင်၊ ‎ဆွမ်းကပ်လို့ တင်
တန်ဆောင်တိုင်များ၊ ရေတော်ငါးနှင့်၊ နံပါး ပန်းသင်း၊ ညနေခင်းမှာ၊ ထပ်သွင်းတင်၊ ရင် ပြင် တော် ‎လင်းထိန်လို့မွှး
ရှင်လူကစ၊ နံနက် ညတိုင်း၊ ညွတ်ခ ပူဇာ၊ စိန္တေယျာဝယ်၊ မသေရာ နိဗ္ဗာန်နန်းကို၊ မှန်းဆုပန် လေး

‎(၃) “စုံဆန်းစွ- ခန်းဝဗွေ ပြင်
ကျောင်းတော် အုတ်ဂူ၊ အဆူဆူတွင်၊ နိဗ္ဗူရည်စူးတဲ့၊ ထေရ်ထူးတွေ ကိန်းပျော်ဝပ်တယ်၊ ‎ကွက်လပ်မ မြင်
တကျောင်းတော်လုံး၊ ရေကြည်သုံးဖို့၊ ပတ်ကုံးရှင်းလင်း၊ တောင်တူးရွင်းက ရေသွင်းလျှင်၊ ကန်တွင် ‎ရေပန်း လျှံလို့ ဖွေး
သောတုဇန၊ စာသင်စ၍၊ ထေရအရာ၊ မြတ်သံဃာတို့၊ ချမ်းသာစွာ မြတ်တရားကို အားထုတ်ကြ လေး။ ‎‎... ။

ဒီပုံစံမှာ ...
‎(၁) “ဘုံနန်းက-မှန်းဆ ချေလျှင်”
‎(၂) “ထုံပန်းလှ-ပန်းက ထွေအင်”
‎(၃) “စုံဆန်းစွ- ခန်းဝ ဗွေပြင်” ...
‎ဆိုပြီး အချီ ၃-ပိုဒ် ကို နဘေကိုက်ပြီး အချီညီပိုဒ်စုံရတု လို စပ်ဆိုထားပါတယ်။ အချီ ၃-ပိုဒ်လုံးကို က-လှ-စွ ဆိုတဲ့ ‎လဟုသံ နဲ့ ချီထားပြီး လျှင်၊ အင်၊ ပြင် ဆိုတဲ့ ဂရုသံ နဲ့ ချထားပါတယ်။

နောက်အပိုဒ်တွေကို ကြည့်ရင်လည်း ရှေးလေးချိုးကြီး ရေးစပ်သလို လေးလုံးစပ်မျိုး အပြင် ‎ငါးလုံး,ခြောက်လုံး သင့်သလို ထည့်ပြီး စပ်ဆိုသွားတာတွေ့နိုင်ပါတယ်။ ပထမချိုးရဲ့ အချနဲ့ ‎ဒုတိယချိုးရဲ့အချမှာ သံလျော့ သံချင်း ညီစေပြီး တတိယချိုးနဲ့ စတုတ္ထချိုးကို (ဧး =အေး) ကာရန်နဲ့ ‎ဆုံးစေရပါတယ်။ ဘာကြောင့်ဆိုတော့ တေးတွဲ့တပုဒ်လုံးရဲ့ အချဖြစ်တဲ့ စတုတ္ထချိုးရဲ့ အဆုံးမှာ ‎‎(လေး) သဒ္ဒါနဲ့သာ အမြဲ ချရလို့ပဲ ဖြစ်ပါတယ်။

တေးတွဲ့မှာ လေးချိုးလိုပဲ တတိယချိုး၏ ဆုံးခါနီးပိုဒ်မှာ ပထမချိုး၊ ဒုတိယချိုးကို ပြန်ငဲ့တဲ့ ကာရန်ပြန် ‎တချက်စီ ရှိရပါသေးတယ်။
ပထမပိုဒ်မှာ လျှင်-လင် .. ဆိုတာကို (ဉာဏ်လင်းအင် က) အင် နဲ့ ပြန်ငဲ့တယ်။
ဒုတိယပိုဒ်မှာ အင်-တင် … ဆိုတာကို (ထပ်သွင်းတင် က) တင် နဲ့ ပြန်ငဲ့တယ်။
တတိယပိုဒ်မှာ ပြင်-မြင် .. ဆိုတာကို (ရေသွင်းလျှင် က) လျှင် နဲ့ ပြန်ငဲ့တယ်။

အထက်ဖော်ပြပါ တေးတွဲ့က အချီ ၃-ပိုဒ် ညီပြီး အချမညီတဲ့ တေးတွဲ့ဖြစ်ပါတယ်။
အချီအချ ညီတဲ့ တေးတွဲ့ နမူနာကတော့ …

ဆဋ္ဌသံဂါယနာနှင့် ပဋိဝိသောဓကဖွဲ့ တေးတွဲ့ကဗျာ
(မြန်မာပိဋကတ်တော် ပဋိဝိသောဓက-အရှင်တိလောကသာရ ဖွဲ့ဆိုသည်)

(၁) “လူပေါင်းခလို့ - ကြည်မြကော် ရော်”၊
ထေရဝါဒ၊ ဆောင်ပိုက်ကြတဲ့၊ ပဉ္စနဂိုရ်၊ ခငြောင်းခိုကြ၊ ဗဟိုမဏ္ဍိုင်မှတ်၊ မြန့်ရဌ် ပြည် တော်
သီရိမင်္ဂလာ၊ ကုန်းတော်သာနှင့်၊ ကမ္ဘာဧး ... မည်၊ မွေသရီရှင်၊ စေတီခွင်မှာ၊ စီရင်ဖန်ဆောက်၊ ဝိသုကမ်ဖောက်သည်သို့၊ ကျောက်ဂူ တော်၊ ပျံ့ ကျော်ဘဝဂ်ဝှန်တည့် ကြွေး
ဂူတော်ဝန်းကျင်၊ ဆောက်ဦပြင်သည်၊ စည်ပင်သိမ်ကျောင်း၊ ဇရပ်ပေါင်းနှင့်၊ မညောင်းအာရုံ၊ တည်ရှိဟုံငယ်၊ ကြည်ယုံသဒ္ဓါပွား...၊ “အားရဖွယ်လေး”
(၂) “တူကြောင်းပြစို့ - ရည်ဆမြော် မြော်”၊
လိုဏ်ဂူခွင်ဝယ်၊ ထေရ်ရှင်ထက်မြက်၊ ငါးထောင်ဝက်နှင့်၊ ဂုဏ်စက်ပွားလျှံ၊ နိုင်နိုင်ငံမှ၊ သံကြီးမင်းကြီး၊ ပေါင်းဆုံကာစည်းပါကြ၊ ချီးအပ်ထုတ် ဖော်
မြန်နိုင်ငံအုပ်၊ စိုးရချုပ်သည့်၊ ပြည့်ဥက္ကဋ္ဌ၊ အစိုးရနှင့်၊ ဗုဒ္ဓဘာသာ၊ ဖွဲ့ကြီးမှာလည်း၊ မဟာဝီရိ၊ စိုက်တည်ရှိလျက်၊ စုံပြည့် ဖေါ်၊ ခါ တော်ဖွင့်ခဲ့ ခြိမ့်ခြိမ့် ကြွေး
နိုင်ငံတော်သူ၊ လက်အုပ်ထူလျက်၊ တူရူချဉ်းကပ်၊ နေ့မလပ်ဘဲ၊ ပြွပ်ပြွပ်နှစ်လို၊ လွန်ကြည်ညိုသည်၊ ပိုမိုလျှံဝှန်အား ...၊ “ပွားကြတယ်လေး”
(၃) “မူကောင်းရဖို့ - ထေရ်မျာ့းပျော် ပျော်”၊
နွေနှောင်းနွယ်တာ၊ ဝါတော်ခါမို့၊ သံဂါကာရ၊ ထေရ်ရှင်လှတို့၊ ပထမသန္နိပါ၊ ဆုံးစေကာလျှင်၊ လိုရာပြန်ကြွသွား၊ နားကြလေ သော်
ပါဠိ ပဋိဝိသောဓကာ၊ သြသာနာနှင့်၊ မြန်မာပြန်ညှိ၊ ပဋိဝိသော်၊ သံဃာတော်တို့၊ ဖြော်ဖြော်အားအင်၊ လုံ့လဆင်၍၊ နေ့စဉ်မလပ်၊ တိုက်ဆိုင်ဖတ်ပါလို့၊ တည်းဖြတ် ခေါ်၊ မူ တော်မူကောင်း တည်စိမ့် တွေး
မြန်မာတိုင်းသူ၊ မြဲရှုယူဖို့၊ မြန်မူပြန်ကာ၊ ပြင်ဆင်ရာ၌၊ ကောင်းပါလေဿး၊ ချောစေရေးမှာ၊ ကြံတွေးဝေါဟာ၊ ပါဝစနာပြင်၊ ဋ္ဌကထာ,ဋီ၊ အလီလီနှင့်၊ ကိုက်ညီရပေ၊ ဤအနေငယ်၊ ထွေထွေကြံဝန်ပွား ...၊ “များလှတယ်လေး”

ဒီ တေးတွဲ့မှာ အချီသုံးပိုဒ်လုံး အချင်းချင်း ညီကြသလို အချသုံးပိုဒ်လုံးလည်း အချင်းချင်း ညီကြတာကို တွေ့ရပါမယ်။ ဒါ့အပြင် အချီပိုဒ်တွေမှာ “လူပေါင်းခလို့ - တူကြောင်းပြစို့ - မူကောင်းရဖို့” ဆိုပြီး အက္ခရာ ၄-လုံးနဲ့ ချီသွားတာကိုလည်း တွေ့နိုင်ပါတယ်။
ဒီလောက်ဆို တေးတွဲ့ကို မြင်သာလောက်ပါပြီ။ ဒီဘက်ခေတ်မှာ လုံးဝမရေးကြသလောက်ဖြစ်နေပြီမို့ ဒီလောက်နဲ့ပဲ တေးတွဲ့ အကြောင်းကို ရပ်နားလိုက်ပြီး ရတုအကြောင်းကို ဆက်ပါမယ်။

ဟယ်ရီ

Read More...

Thursday 20 October 2011

Ethic ဆိုတာ ဂျို(ချို)နဲ့လားကွယ့် ... လေသံများတောင် ဟ,ဘူးကွယ်

အဖြူရောင်သံစဉ် ဖိုရမ် မှာ တွေ့မိတာလေးနဲ့ ပတ်သက်လို့ ပြောချင်လို့ပါ ....
မြန်မာကဗျာဆိုတာ ဂျို(ချို)နဲ့လား ... ဆိုပြီး ဂန္ထဝင်မြန်မာကဗျာရေးနည်းတွေနဲ့ပတ်သက်တဲ့ အကြောင်းအရာတွေကို ကဗျာရွာမှာ ပထမဆုံး စရေးခဲ့ပါတယ်။ အဲဒီနောက်ပိုင်း ကျနော့်ဘလော့ဂ်မှာ ဆက်ပြီး အပိုင်းလိုက် ရေးတင်ထားပါတယ် ... ကြာပါပြီ ... ၂၀၀၈-ခုနှစ်ကတည်းပါ ... အခုထိ အပြီးမသတ်နိုင်သလေးသလို ဆက်လည်း ရေးနေဆဲပါပဲ ...

ဂန္ထဝင်မြန်မာကဗျာတွေကို ကျနော် အလွန်ချစ်ပါတယ် ... ဒီခေတ်မှာတော့ ဒီလိုကဗျာလေးတွေ အတော်လေး အရေးကျဲသွားတာမို့ ဂန္ထဝင်မြန်မာကဗျာရေးနည်းတွေနဲ့ပတ်သက်ပြီး အမှတ်တရလေး တခု အွန်လိုင်းပေါ်မှာ ကျန်နေအောင် ကျနော်ရေးခဲ့တာပဲဖြစ်ပါတယ် ... ဒါ့အပြင် ဂန္ထဝင်မြန်မာကဗျာဟာ ခေတ်ပေါ်ကဗျာတွေလို မဟုတ်ဘဲ ကာရန်အသံစည်းမျဉ်း၊ ရေးဖွဲ့တဲ့ပုံစံတွေနဲ့ပတ်သက်ပြီး တိကျတဲ့ စည်းမျဉ်းတွေ ရှိတာကြောင့် ဒါတွေကို မသိဘဲ ရေးလို့ မရပါဘူး။ ဒီရေးနည်းတွေနဲ့ ပတ်သက်တဲ့ စာအုပ်စာတမ်းတွေကလည်း အတော်လေး ရှားပါးသွားပါပြီ။ ဒါကြောင့် ဂန္ထဝင်မြန်မာကဗျာကို လေ့လာလိုက်စားချင်ကြတဲ့သူတွေအတွက် တတ်နိုင်သမျှ အထောက်အကူဖြစ်စေဖို့ ကိုယ်သိထားသမျှလေးတွေကို မျှဝေပေးချင်တာလည်း ပါပါတယ် ...

မော်ဒန်ကဗျာတွေပဲ အရေးများလာပြီး ဂန္ထဝင်မြန်မာကဗျာတွေ အရေးအလွန်ကျဲနေတဲ့ အခုအချိန်မှာ ဂန္ထဝင်မြန်မာကဗျာတွေကို ရေးတဲ့သူ၊ မရေးတောင် စိတ်ဝင်စားတဲ့သူတွေကို တွေ့ရရင် ကျနော် အလွန်ပဲ ဝမ်းသာမိပါတယ် ... ကြိုးစားရေးကြည့်နေတဲ့သူတွေကိုလည်း ကိုယ် တတ်သမျှ မှတ်သမျှလေး ဝေငှပေးခဲ့ပါတယ် ...

နဂိုကကို ဒီလို တတ်နိုင်သမျှ ဝေငှပေးချင်တဲ့စိတ်နဲ့ ကျနော် ဒီပို့စ်တွေကို ရေးခဲ့တာကြောင့် ဒါတွေကို ဆက်လက် လက်ဆင့်ကမ်းဖော်ပြတာကို ကျနော် ဘယ်တုန်းကမှ မကန့်ကွက်ခဲ့ပါဘူး ... ငွေကြေးအကျိုးအမြတ်တစုံတရာအတွက်မဟုတ်ဘဲ ရိုးရိုးသားသား ပြန်လည် ကူးယူဖော်ပြ ချင်ရင်လည်း ကျနော့်ဆီက ခွင့်ပြုချက်တောင် တောင်းဖို့မလိုပါဘူး လို့ ကျနော့် ဘလော့ဂ်မှာ အတိအလင်း ရေးထားပါတယ် ... ဒါပေမဲ့ Ethic အနေနဲ့တော့ ကျနော့် အမည်၊ Blog အမည်၊ မူရင်း Post အမည် တွေကိုပဲ Credit အနေနဲ့ ဖော်ပြပေးကြဖို့ ဒီလို မေတ္တာရပ်ခံထားပါတယ် ...

"ဤ Blog ရှိ Post များထဲမှ ရေးသားချက် အပြည့်အစုံ (သို့မဟုတ်) တစိတ်တပိုင်း ကို ငွေကြေး အကျိုးအမြတ် တစုံတရာ မရှိဘဲ မည်သည့် media တွင်မဆို ပြန်လည် ကူးယူ ဖော်ပြလိုပါက ဖြစ်စေ၊ ကိုးကား လိုပါက ဖြစ်စေ ကျနော့်ထံမှ ခွင့်ပြုချက် တောင်းရန် မလိုအပ်ပါ။ ကျနော်၏ အမည်၊ ဤ Blog အမည်၊ မူရင်း Post အမည် များကိုသာ Credit အနေဖြင့် ဖော်ပြပေးကြပါရန် မေတ္တာရပ်ခံ ပန်ကြားအပ်ပါတယ်။"

ဒီလို ကျနော်ရေးခဲ့သမျှတွေထဲက အချို့ကို Wikimyanmar က စာပေ၊ အနုပညာ Category အောက်က ကဗျာ ခေါင်းစဉ်မှာ ကူးယူဖော်ပြထားပါတယ် ... အောက်က လင့်ခ်မှာ ကြည့်နိုင်ပါတယ် ....
http://wikimyanmar.co.cc/wiki/index.php?title=%E1%80%80%E1%80%97%E1%80%BA%E1%80%AC

ဒီလိုဖော်ပြထားပြီး အောက်ဆုံးက "ကိုးကား" စာရင်းမှာ ကျနော့်ဘလော့ဂ်ကို Reference အနေနဲ့ ထည့်ပေးထားပါတယ် ...

ဒီလို ဖော်ပြတာကို ဘာမှ ကန့်ကွက်စရာ မရှိလို့ ကျနော် ဘာမှ မပြောပါဘူး ... မြန်မာကဗျာတွေနဲ့ ပတ်သက်ပြီး လူများများပိုသိသွားလို့ ကျေးဇူးတောင် တင်မိသလို ကိုယ်မြတ်နိုးတဲ့ မြန်မာကဗျာအတွက် တဖက်တလမ်းက တတ်နိုင်သလောက် တာဝန်ထမ်းပေးနိုင်တာမို့ ဝမ်းတောင် သာမိပါသေးတယ် ...

ဒါပေမဲ့ ... အခု အဖြူရောင်သံစဉ် ဆိုတဲ့ ဖိုရမ်မှာကတော့ ဒီ မြန်မာကဗျာဆိုတာ ဂျို(ချို)နဲ့လား (၁) ကနေ (၄) အထိမှာ ကျနော်ရေးထားသမျှကို ခပ်တည်တည်နဲ့ ဖိုရမ်စာတည်းချုပ် 'မင်းချစ်သူမောင် ' ဆိုသူက ယူတင်ထားတာကို အမှတ်မထင်တွေ့လိုက်မိပါတယ် ...

အဖြူရောင်သံစဉ် ဖိုရမ် >> စာပေ အနုပညာ နှင့် ဖျော်ဖြေရေး>>အဖြူရောင်သံစဉ် ကဗျာဥယျာဉ်>>ကဗျာ အကြောင်း စပ်မိစပ်ရာ>> ဆိုတဲ့ အောက်မှာ "မြန်မာကဗျာအစ" ဆိုတဲ့ thread တခု ဖွင့်ပြီး နောက်ထပ် ... အခြေခံအချက်များ၊ ကာရန် ၊ အသံ၊ အစပ်အဟပ် ... ဆိုတဲ့ ခေါင်းစဉ် ၃-ခု အောက်မှနဲ့ ပို့စ် ၄-ခု အဖြစ်ခွဲပြီး တင်ထားပါတယ်။ အောက်က လင့်ခ်မှာ ကြည့်နိုင်ပါတယ် ....

http://www.apytz.org/68/1248.html

အဲဒီ ပို့စ်တွေဟာ ကျနော်ရေးခဲ့တဲ့ ....
မြန်မာကဗျာဆိုတာ ဂျို(ချို)နဲ့လား (၁)
http://harrylwin.blogspot.com/2008/08/blog-post_26.html

မြန်မာကဗျာဆိုတာ ဂျို(ချို)နဲ့လား (၂)
http://harrylwin.blogspot.com/2008/08/blog-post_27.html

ဆိုတဲ့ ပို့စ် ၂-ခုက အကြောင်းအရာတွေထဲက တချို့ကို ချန်လှပ်ပြီး ကျန်တာကို ၏၊ သည်၊ ၍ မလွဲ၊ ခေါင်းစဉ်ပါ မပြောင်းဘဲ အတိအကျ ကူးတင်ထားတာ ဖြစ်ပါတယ် ...

ဒါ့အပြင် အဲဒီ အဖြူရောင်သံစဉ် ဖိုရမ်မှာပဲ
အဖြူရောင်သံစဉ် ဖိုရမ် >> စာပေ အနုပညာ နှင့် ဖျော်ဖြေရေး>>အဖြူရောင်သံစဉ် ကဗျာဥယျာဉ်>>ကဗျာ အကြောင်း စပ်မိစပ်ရာ>> ဆိုတဲ့ အောက်မှာ နောက်ထပ် thread တခု အနေနဲ့ "မြန်မာကဗျာစပ်နည်း များ" ဆိုပြီး ထပ်တင်ထားပါတယ် ... အောက်က လင့်ခ်မှာ ကြည့်နိုင်ပါတယ် ....
http://www.apytz.org/68/1253/Page-2.html

ဒီ thread ထဲမှာတော့ ...
(၁) နဘေစပ်နည်း
(၂) ပြန်ကဟပ် စပ်နည်း
(၃) ရွက်ချပ် စပ်နည်း
(၄) ကတ္တရာ စပ်နည်း
(၅) ချိန်ခွင်ညှာ စပ်နည်း
(၆) ခြင်္သေ့လည်ပြန် စပ်နည်း
(၇) တေ့ဆက် စပ်နည်း
(၈) နဘေပြန်ကဟပ် စပ်နည်း
ထိပ်ချင်းထပ် စပ်နည်း
ထိပ်ချင်းချွတ် (ထိပ်ချင်းလွှဲ) စပ်နည်း
ဦးတိုက် (ထိပ်ချင်းတိုက်) စပ်နည်း
ချိန်ခွင်လျှာ စပ်နည်း
ဘီလူးရယ် စပ်နည်း ... ဆိုတဲ့ ပို့စ်တွေအဖြစ် တင်ထားပါတယ် ... ဒါတွေ အားလုံးဟာ ကျနော် ရေးထားတဲ့ ...

မြန်မာကဗျာဆိုတာ ဂျို(ချို)နဲ့လား (၃)
http://harrylwin.blogspot.com/2008/08/blog-post_28.html

မြန်မာကဗျာဆိုတာ ဂျို(ချို)နဲ့လား (၄)
http://harrylwin.blogspot.com/2008/08/blog-post_29.html

.. အဲဒီ ပို့စ် ၂-ခု ထဲက အတိုင်း ထပ်တူ ကူးတူထားတာပါ ... ဇယားလေးတွေကိုသာ ချန်လှပ်ခဲ့တာ၊ ရှေ့နောက် အစီအစဉ် နည်းနည်းပြောင်းထားတာကလွဲပြီး ကျန်တာတွေက တသွေမတိမ်းပါပဲ ...

ဒီလိုတင်တာကို ကန့်ကွက်စရာမရှိပေမဲ့ မူရင်း Source ဖြစ်တဲ့ ကျနော့်အမည်၊ Blog ရဲ့ အမည်နဲ့လိပ်စာ၊ မူရင်းပို့စ် စတာတွေနဲ့ပတ်သက်ပြီး လေသံလေးတောင် ဟ, မထားတာ တွေ့ရတော့ စိတ်မကောင်းတော့ ဖြစ်မိပါတယ် ... အဖြူရောင်သံစဉ် ဆိုတဲ့ ဖိုရမ်ရဲ့ Ethic ပိုင်းဆိုင်ရာနဲ့ပတ်သက်တဲ့ မူကိုလည်း အံ့သြမိပါတယ် ... အထူးသဖြင့် သာမန်အဖွဲ့ဝင်တဦးတယောက်က တင်တာမဟုတ်ဘဲ စာတည်းချုပ် ဆိုသူ ပုဂ္ဂိုလ်ကိုယ်တိုင်က တင်ထားတာဆိုတော့ ပိုပြီး အံ့အားသင့်မိပါတယ် ...

ကိုးကားတယ်ဆိုတာက အဲဒီလို ထပ်တူပြန်ကူးချတာမျိုး မဟုတ်ပါဘူး ... quote လုပ်ပြီး ထပ်တူပြန်ဖော်ပြချင်ရင်လည်း ကိုးကားတဲ့ မူရင်းဇာစ်မြစ်ကို credit ပေးရပါတယ် ... ဒါဟာ ethic ပါ ...

ဒါပေမဲ့ ဒါမျိုး ခံခဲ့ရပေါင်းကလည်း များလာပြီဆိုတော့ နည်းနည်းတော့လည်း "အရေထူ" နေပါပြီ ... အဲဒီ ဖိုရမ်တခုတည်း မဟုတ်ပါဘူး ... တခြားဖိုရမ်တွေ၊ ဘလော့ဂ်တွေ ရှိပါသေးတယ် ... တချို့ကတော့ စာသားလေးတွေ နည်းနည်းပြောင်းထားကြပေမဲ့ ဥပမာတွေက ကျမ်းတွေထဲကအတိုင်း မဟုတ်ဘဲ ကျနော်ကိုယ်တိုင်သီးသန့်ပေးထားတဲ့ ဥပမာတွေနဲ့ ထပ်တူ ... သူတို့ကိုယ်တိုင်ပေးထားတဲ့ ဥပမာတွေကျပြန်တော့ တလွဲတချော် ... ကူးထားမှန်းက သိသာလွန်းပါရဲ့ ... အထူးသဖြင့် ကျနော်ရေးခဲ့ဖူးတဲ့ "ချစ်သူများနေ့တဲ့လား" ဆိုတဲ့ကဗျာကို "ညီမလေးရေ" ဆိုတဲ့နေရာမှာ "သူငယ်ချင်းရေ" လို့ ပြောင်းလိုပြောင်း၊ မပြောင်းချင်လည်း မပြောင်းဘဲနဲ့ သူတို့နာမည် ခပ်တည်တည် ကောက်တပ်ထားတာတွေကလည်း မနည်းလှဘူးပေါ့ ...

ဒီတော့လည်း ငယ်ငယ်က ကြည့်ခဲ့ရတဲ့ ရုပ်ရှင်ထဲက ဒေါ်မြလေး ပြောသလို "မပြောချင်ဘူးနော် .... မပြောချင်ဘူး ... ပြောကို မပြောချင်ဘူး ... " လို့လည်း မပြောတော့ပါဘူး ... ငယ်ငယ်က ရွတ်ဆိုခဲ့ဖူးတဲ့ ဆရာကြီး မင်းသုဝဏ်ရဲ့ သပြေသီးကောက် ကဗျာလေးကိုသာ စာသားပြောင်းပြီး ...
"Ethic ဆိုတာ ဂျို(ချို)နဲ့လားကွယ့် ... လေသံများတောင် ဟ,ဘူးကွယ်" လို့ ဆိုညည်းမိရုံမှတပါး ....

ရွှင်လန်းချမ်းမြေ့ကြပါစေ ....
ဟယ်ရီလွင်

Read More...

Tuesday 18 October 2011

တွေး

တွေးကြည့်စမ်းပါ ... မိုးတိမ်တွေ ယိုစီးကျလာတယ်
ဥယျာဉ်ထဲ တွင်းတတွင်း တူးလိုက်လေ
သူတို့ကို ထည့်ဖို့ ....

ဒီ စာသားလေးကတော့ ကမ္ဘာကျော် Imagine သီချင်းကို မွေးဖွားလာစေဖို့ John Lennon ရဲ့ အာရုံကို နှိုးဆွပေးလိုက်တဲ့ စာသားလေးတွေပါ ... ၁၉၆၃-ခုနှစ်၊ နွေဦးရာသီမှာ ထုတ်ဝေတဲ့ Yoko Ono ရဲ့ Grapefruit ဆိုတဲ့ စာအုပ်ထဲက Cloud Piece ဆိုတဲ့ ဆုံးမစာဆန်ဆန်ကဗျာလေးထဲက စာကြောင်းလေး သုံးကြောင်းပဲ ဖြစ်ပါတယ် .... မူရင်းစာသားက ဒီလိုပါ ...

"Imagine the clouds dripping.
Dig a hole in your garden to
put them in."
(Grapefruit - Yoko Ono)

အဲဒီကနေ ပေါက်ဖွားလာခဲ့တဲ့ Imagine ဟာ "အနီ" ဆန်ပေမဲ့လည်း သီချင်းအနေနဲ့တော့ ကျနော့်အသည်းစွဲဖြစ်ပါတယ် ... ဒါကြောင့် ဘာသာပြန်ပြီး ကဗျာအဖြစ် ရေးကြည့်မိပါတယ် ...

တွေး

တွေးကြည့်စမ်းပါ၊ နတ်ရွာမရှိ၊
ကြိုးစားကြည့်လေ၊ လွယ်ပေမည်ပဲ၊
မြေအောက်ထဲဝယ်၊ ငရဲနတ္ထိ၊
တို့၏ထက်တွင်၊ ကောင်းကင်သာရှိ၊
တွေးကြည့်ပါလား၊ လူသားအားလုံး၊
လှုပ်ရှားရုန်းကန်၊ ရှင်သန်နေကြ၊
ဒီဘဝသာ ပစ္စုပ္ပန်။

တွေးကြည့်စမ်းပါ၊ ပြည်ရွာမရှိ၊
လုပ်ကြည့်ဖို့လည်း၊ မခက်ခဲလှ၊
သတ်ကြသေကြေ၊ ဘာတွက်လေမှ၊
သေရာအကြောင်း၊ မရှိကောင်းဘူး၊
ခညောင်းကိုးကွယ်၊ ဘာသာရယ်လည်း၊
ဒီမယ်မရှိ၊ တကယ်ကြည့်လေ၊
လူတွေအားလုံး၊ ပေါင်းရုံးဝေခြမ်း၊
ငြိမ်းချမ်းယှဉ်တွဲ ဘဝထဲ။

အိပ်မက်နဲ့ရူး၊ စိတ်ကူးသမား၊
ထင်မှားငါ့ကို၊ ဆိုချင်ဆိုစေ၊
သို့ပေသော်လည်း၊ တယောက်တည်းငါ၊
မဟုတ်ပါ၍၊ တနေ့တော့လေ၊
သင်တို့တွေလည်း၊ မသွေပူးပေါင်း၊
စိတ်ပြောင်းလာမည်၊ ငါမျှော်ရည်၏၊
ဤကမ္ဘာသည် တဘုံတည်း။

တွေးလေကြည့်ရှု၊ ပိုင်ဆိုင်မှုကင်း၊
စဉ်းစားကြည့်လေ၊ ဖြစ်နိုင်ပေစွ၊
လောဘတဏှာ၊ ဆာလောင်ရမ္မက်၊
တပ်မက်မှုကင်း၊ ညီနောင်ရင်းသို့၊
ခပင်းလူပေါင်း၊ ခညောင်းမေတ္တာ၊
တွေးကြည့်ပါလေ၊ လူတွေအကုန်၊
လောကီဘုံအား ...
ပေါင်းခြုံဝေမျှစံစားနေ။

အိပ်မက်နဲ့ရူး၊ စိတ်ကူးသမား၊
ထင်မှားငါ့ကို၊ ဆိုချင်ဆိုစေ၊
သို့ပေသော်လည်း၊ တယောက်တည်းငါ၊
မဟုတ်ပါ၍၊ တနေ့တော့လေ၊
သင်တို့တွေလည်း၊ မသွေပူးပေါင်း၊
စိတ်ပြောင်းလာမည်၊ ငါမျှော်ရည်၏၊
ဤကမ္ဘာသည် ဘုံရိပ်သာ။ ။

ဒီသီချင်းဟာ Beatles အဖွဲ့အနေနဲ့ မဟုတ်ဘဲ John Lennon ရဲ့ ဒုတိယမြောက် တကိုယ်တော် (Single album) တေးစီးရီးအဖြစ် ၁၉၇၁-ခုနှစ်မှာ ထုတ်ဝေထားတာပါ။ စီးရီးခေါင်းစဉ်ကလည်း Imagine ပါပဲ။ သူကိုယ်တိုင် Piano တီးပြီး ဆိုထားတာမို့ သူ့ရဲ့ Piano လက်သံကိုပါ တပါတည်း နားဆင်နိုင်တဲ့ စီးရီးဖြစ်ပါတယ်။

Imagine ကို ကွန်မြူနစ်တွေရဲ့ "နိုင်ငံတော်သီချင်း" လို့တောင် ဝေဖန်ကြသူတွေရှိသလို ဒါဟာ သူ့အမြင်၊ သူ့ဒဿန သက်သက်ပါလို့ပြောကြတဲ့သူတွေလည်း ရှိပါတယ် ... John Lennon ရဲ့ အပြောင်မြောက်ဆုံး လက်ရာလို့ အများစုက ကျယ်ကျယ်ပြန့်ပြန့်သတ်မှတ်ကြပါတယ်။ John Lennon ကိုယ်တိုင်ကတော့ ဒီသီချင်းနဲ့ ပတ်သက်လို့ ...
"Imagine ဟာ ဘာသာအယူဝါဒ၊ အမျိုးသားရေးဝါဒ၊ ရိုးရာအစဉ်အလာ၊ အရင်းရှင်ဝါဒတွေအားလုံးကို ဆန့်ကျင်ထားပါတယ်။ ဒါပေမဲ့လည်း 'သကြားဖုံး' ထားတော့ လက်ခံကြတာပါပဲ ..." လို့ ပြောခဲ့ပါတယ်။

တခါ ပလေးဘွိုင်းမဂ္ဂဇင်းနဲ့ ၁၉၈၀-ခုနှစ်မှာ ပြုလုပ်ခဲ့တဲ့ အင်တာဗျူးမှာတော့ " ... 'နိုင်ငံတွေ ဘာသာတွေမရှိတဲ့ကမ္ဘာတခုကို တွေးကြည့်ကြပါ' လို့ Imagine သီချင်းနဲ့ ကျနော်တို့ တောင်းဆိုထားပါတယ် ... ဒါဟာ အပေါင်းလက္ခဏာဆောင်တဲ့သဘောပါ ..." လို့ အင်တာဗျူးလုပ်တဲ့ David Sheff ကို ဖြေထားပြန်ပါတယ် ...

ကမ္ဘာ့ငြိမ်းချမ်းရေးနဲ့ သဟဇာတအတွက် သူ့ရဲ့အာသီသကို စာသားပိုင်းမှာရော ဂီတပိုင်းမှာရော Imagine ဟာ ရိုးရိုးရှင်းရှင်းလေး ထင်ဟပ်ဆောင်ကြဉ်းလာတယ် လို့လည်း ဆိုပါတယ် ...

ဒီသီချင်းနဲ့ ပတ်သက်လို့ ၂၀၀၆-ခုနှစ်မှာ အမေရိကန်သမ္မတကြီး ဂျင်မီကာတာ က "ကမ္ဘာ့နိုင်ငံအများကြီးမှာ - ကျနော်နဲ့ ကျနော့်ဇနီး နိုင်ငံပေါင်း ၁၂၅-နိုင်ငံလောက် လှည့်လည်သွားရောက်ခဲ့ဖူးသမျှမှာတော့ ဂျွန်လင်နွန်ရဲ့ Imagine သီချင်းသံကို နိုင်ငံတော်သီချင်းတမျှ ဖွင့်နေကြတာကို ကြားရပါလိမ့်မယ် ..." လို့တောင် မှတ်ချက်ချခဲ့ရပါတယ် ...

John Lennon မွေးဖွားကြီးပြင်းခဲ့ရာ ဇာတိဖြစ်တဲ့ လီဗာပူးမြို့ရဲ့ "လီဗာပူးဂျွန်လင်နွန်လေဆိပ်" ရဲ့ ဆောင်ပုဒ်ကတော့ "Above Us Only Sky" ပါတဲ့ ... Imagine ရဲ့ ပထမအပိုဒ်က စာသားလေး ဖြစ်ပါတယ် ...

မူရင်းစာသားကိုပါ ခံစားနိုင်အောင် မျှဝေလိုက်ပါတယ် ...

Imagine

Imagine there's no heaven
It's easy if you try
No hell below us
Above us only sky
Imagine all the people
Living for today...

Imagine there's no countries
It isn't hard to do
Nothing to kill or die for
And no religion too
Imagine all the people
Living life in peace...

You may say I'm a dreamer
But I'm not the only one
I hope someday you'll join us
And the world will be as one

Imagine no possessions
I wonder if you can
No need for greed or hunger
A brotherhood of man
Imagine all the people
Sharing all the world...

You may say I'm a dreamer
But I'm not the only one
I hope someday you'll join us
And the world will live as one ...

သီချင်းကို နားဆင်လိုရင်တော့ ဒီမှာပါ ....


 John Lennon - Imagine .mp3
Found at bee mp3 search engine

ကဲ ... John Lennon နဲ့ အတူ တွေးကြည့်လိုက်ကြရအောင်လား ..

ဟယ်ရီ

Read More...

Sunday 16 October 2011

မိုးဖွဲလေးတွေ စွေလာလိမ့်မည်

ဒီကဗျာလေးက ကျနော် ဘာသာပြန်ထားတဲ့ ကဗျာဖြစ်ပါတယ် ... မူရင်းကဗျာက There Will Come Soft Rains ... ရေးဖွဲ့သူက Sara Teasdale ပါ။ 1920 က ထုတ်ဝေတဲ့ သူ့ရဲ့ Flame and Shadow ကဗျာစာအုပ်ထဲကလို့ ဆိုပါတယ်။ ပုံမှန်အားဖြင့် ကျနော် အင်္ဂလိပ်ကဗျာတွေ သိပ်ဖတ်လေ့မရှိပါဘူး ... ကဗျာဆိုတာက စကားလုံးအဓိကမို့ မူရင်းဘာသာစကားက ကိုယ့်မိခင် ဘာသာစကားမဟုတ်တဲ့အတွက် အပြည့်အဝ ခံစားလို့ မရနိုင်တာကြောင့်ပါ ...

ဒီကဗျာကိုတော့ Facebook Group တခုဖြစ်တဲ့ Meet the Poetry Group က ကျနော့်မိတ်ဆွေကြီး ကိုခွန်းချို
(Khun Cho) က ပို့စ်တခုမှာ မိတ်ဆက်ရေးထားတာလေး တွေ့တာနဲ့ ဖတ်ကြည့်မိရင်း သဘောကျသွားပါတယ် ... 'There Will Come Soft Rains' ဆိုတဲ့ဝတ္ထုတိုလေးထဲမှာ မျက်နှာကျက်စက်ရုပ်က အဲဒီကဗျာလေးကို အလိုအလျောက် ရွတ်ပြတဲ့ အရေးအသားတစ်ခု ကို သဘောကျသွားမိလို့ ဒီကဗျာလေးကို တင်ပေးတာလို့ ဆိုပါတယ် ... ဒါနဲ့ ဘာသာပြန်ချင်စိတ် ပေါက်လာလို့ ဘာသာပြန်ကြည့်ပါတယ် ...
ဒီလို ဘာသာပြန်ကြည့်တော့ ကျနော်တွေ့ကြုံခဲ့တာလေးတွေကို အရင်းအတိုင်း ဖောက်သည်ချချင်စိတ် ပေါ်လာတာနဲ့ နောက်ဆုံး အချောသပ် ကဗျာသက်သက်ကိုတင်မဟုတ်ဘဲ စရေးမိတဲ့ ပုံစံကနေ စပြီး အားလုံးကို ဝေငှတင်ပြလိုက်ပါတယ် ....
အရင်ဆုံးတော့ မော်ဒန်ပုံစံမျိုးဆန်ဆန် ဘာသာပြန်ရင်း ချရေးလိုက်မိတာက ဒီလိုပါ ...

မိုးဖွဲလေးတွေကျလာလိမ့်မယ်

မိုးဖွဲလေးတွေကျလာလိမ့်မယ်၊ မြေသင်းနံ့လေးတွေရောပေါ့
့ပျံလွှားငှက်တွေ ကျည်ကျည်ကျာကျာမြည်ရင်း လှည့်လည်ဝဲပျံကြ၊
ရေအိုင်ထဲက ဖားငယ်တွေလည်း ညအခါ တေးသီကြလိမ့်မယ်
မက်မန်းပင်ရိုင်းတွေက ဖြူဖျော့ဖျော့အလင်းအောက်
ရော်ဘင်တေးဆိုငှက်လေးတွေက မီးလျှံအမွှေးအတောင်တွေဝတ်ရုံရင်း
သံဆူးကြိုးစည်းရိုးနိမ့်နိမ့်တွေမှာ တေးချင်းတွေ ညည်းနေကြလိမ့်မယ်
သူတို့တွေ ဘယ်သူမှ စစ်ပွဲကို သိမှာမဟုတ်ကြပါဘူး
နောက်ဆုံးတော့ စစ်ပွဲကြီး ပြီးသွားပြီမှန်း ဘယ်သူမှလည်း ဂရုစိုက်ကြမှာမဟုတ်ပါဘူး
ငှက်တွေဖြစ်ဖြစ် သစ်ပင်တွေဖြစ်ဖြစ်
လူသားမျိုးနွယ်တခုလုံး အပြီးသတ်ချေမှုန်းခံလိုက်ရပြီမှန်းလည်း
ဘယ်သူမှ သတိထားမိကြမှာမဟုတ်ပါဘူး
နွေဦးပျိုမဟာ အရုဏ်ဦးမှာ နိုးထလာတဲ့အခါမှာလည်း
တို့တွေ မရှိတော့ပြီမှန်း သိနိုင်ခဲသားပါလားလေ .... ။ ။

ခေါင်းစဉ်ကိုတော့ ရိုးရိုးပဲ "မိုးဖွဲလေးတွေကျလာလိမ့်မယ်" ဆိုပြီး ပေးလိုက်ပါတယ် ... ဒါပေမဲ့ ဒီလိုရေးရတာ ကျနော့်စိတ်ထဲ ပေါ့နေသလို ဖြစ်နေပါတယ်။ ဒါနဲ့ ကာရန်ပါအောင် ရေးမယ်ဆိုပြီး စီနေရင်းနဲ့ အောက်က ကဗျာပုံစံမျိုး ဖြစ်သွားပါတယ် ...

မိုးဖွဲလေးတွေ စွေလာစဉ်

မိုးဖွဲလေးတွေ၊ စွေလာစဉ်၊ မြေသင်းနံ့တွေယဉ်၊
ပျံလွှားခင်တို့၊ ကျည်ကျာတေး၊ ပျံဝဲလှည့်လည်ကျွေး။
ရေအိုင်ထဲက ဖားငယ်တွေ၊ ညဥ့်ယံတေးသံချွေ၊
ဖြူဝေဖျော့လျ ကောင်းကင်အောက်၊ မက်မန်းရိုင်းတွေ ပေါက်။
မြေလူးငှက်တို့ မီးလျှံသွင်၊ မွှေးတောင်ဝတ်ရုံဆင်၊
ဆူးပြင်စည်းရိုး နိမ့်နိမ့်ထက်၊ တေးချင်းညည်းကာဆက်။
သူတို့အားလုံး မသိပေ၊ စစ်ပွဲဆိုတာလေ။
နောက်ဆုံးတော့လေ သည်စစ်ပွဲ၊ ပြီးလည်း မှုမဲ့ပဲ။
ငှက်နဲ့သစ်ပင် သိမမြင်၊ လူသားမျိုးနွယ်စဉ်၊
ကြမ္မာငင်လို့ ပျောက်ပျက်သွား၊ သူတို့ အလေးမထား။
နွေဦးပျိုမ နိုးထစဉ်၊ အရုဏ်ဦးနီလွင်။
တို့မျိုးစဉ်ဆက် ကွယ်ပျောက်ဝေး၊ သိမြင်ဖို့ခက်သေး။

ဒီတခါတော့ "မိုးဖွဲလေးတွေ စွေလာစဉ်" ဆိုပြီး ခေါင်းစဉ်တပ်လိုက်ပါတယ်။ တခါ ပြန်ဖတ်ကြည့်ပါတယ်။ ဒီတခါလည်း ကလေးကဗျာလို ဖြစ်နေတာနဲ့ သိပ်သဘောမတွေ့ပါဘူး ... ဘာဖြစ်လို့လဲ ဆိုတော့ မူရင်းကဗျာရဲ့ အနှစ်သာရ (main theme) က အလွန်လေးနက်နေလို့ပါ ... ဒါနဲ့ သူ့မူရင်းကဗျာဖွဲ့ပုံကို ပြန်ကြည့်မိပါတယ်။ ဒီတော့ တပိုဒ်မှာ နှစ်ပါဒစီကို အချအညီ (rhyming couplet) ရေးထားတဲ့ ၁၂-ကြောင်းကဗျာ (12-line poem with six stanzas) ဖြစ်နေတာကို တွေ့တာနဲ့ ဒွေးဆစ်ပုံစံ အချိုးတွဲ ပြောင်းရေးကြည့်တော့ ဒီလို ထွက်လာပါတယ် ...

မိုးဖွဲစွေ၊ မြေသင်းနံ့ကျဲ။
ပျံလွှားတွေကျည်ကျာမြည်ရင်း၊ လှည့်လည်ပျံဝဲ။
ရေအိုင်ဝယ်၊ ဖားငယ်တို့ ညဥ့်ယံတေး။
မက်မန်းရိုင်းပင်ပျိုတို့၊ ဖြူဖျော့စိုကောင်းကင်အောက်၊ ပေါက်ကြလိမ့်သေး။
မြေလူးငှက် မီးလျံသွင်၊ မွှေးတောင်ဆင် ဝတ်ရုံသွေး။
ဆူးကြိုးပြင်စည်းရိုးနိမ့်မှာ၊ တေးငြိမ့်သီကြွေး။
စစ်ပွဲတွေ၊ သူတို့လေ သိနိုင်ခဲ။
နောက်ဆုံးမှာ၊ ပျောက်ဆုံးကာ စစ်ရပ်စဲ၊ လေးမူမိဘဲ။
လူ့မျိုးနွယ်၊ တခုလုံးရယ် အပြီးသတ်၊ ပျက်သုဉ်းရပ်စဲ။
ငှက်နဲ့အပင်၊ တွေးစိတ်ဝင် ယှဉ်မမိ၊ သိမည်ဟုတ်ဘဲ။
နွေဦးပျို၊ နိုးထကြို အရုဏ်သွေး။
တို့မရှိပြီ၊ ပျို့အသိဆီ ဉာဏ်ထင်လျက်၊ မြင်ရန်ခက်သေး။

ဒါလည်း သိပ်စိတ်တိုင်းမကျသေးဘူး ဖြစ်နေပါတယ် ... ဒါနဲ့ ခေါင်းစဉ် မစဉ်းစားတော့ပါဘူး။ ဒီမှာတော့ အဓိကအားဖြင့် စိတ်တိုင်းမကျ ဖြစ်နေတာက Rhythm ပါ ... Rhythm ကို မကြိုက်ဘူး ဖြစ်နေပါတယ် ... ဒါနဲ့ ပုံစံကို ဂရုမစိုက် တော့ဘဲ လင်္ကာသွားနဲ့ ပြောင်းရေးကြည့်လိုက်ပါတယ် ...

မိုးဖွဲလေးတွေ စွေလာလိမ့်မည်

မိုးဖွဲလေးတွေ၊ စွေလာလိမ့်မည်၊
မြေဆီသင်းနံ့၊ ပျံ့လိမ့်မည်ပင်၊
ငှက်လျင်ပျံလွှား၊ ဝဲပျံသွားရင်း၊
တေးသွားကျည်ကျာ၊ မြည်ပါလိမ့်သေး၊
ဖားငယ်တေးသီ၊ ရေအိုင်ဆီမှ၊
ညလည်ယံနော့၊ တေးကျော့သီငင်၊
မက်မန်းပင်ရိုင်း၊ ဖြူဖျော့ဆိုင်းလွင်၊
ကောင်းကင်နောက်ခံ၊ ပေါက်လိမ့်မှန်သည်၊
မီးလျှံဆင်သွေး၊ မွှေးတောင်လှထူး၊
ငှက်မြေလူးတို့၊ သံဆူးစည်းရိုး၊
နိမ့်မျိုးထက်ဝယ်၊ တေးသံသွယ်လျ၊
ဆိုပါကြသေး၊ သူတို့တွေးဝယ်၊
စစ်ပွဲဘေးရန်၊ မသိပြန်တည့်၊
ဖန်ဖန်ဆင်နွှဲ၊ သည်စစ်ပွဲလည်း၊
မလွဲသွေပျောက်၊ နောက်ဆုံးရောက်သော်၊
ပြီးပျောက်ပြေငင်၊ သိမမြင်တည့်၊
သစ်ပင် ငှက်များ၊ မှုမထားသည်၊
လူသားသိကြွယ်၊ လူ့မျိုးနွယ်ဇာတ်၊
ပြီးပြတ်ချေမှုန်း၊ ပျက်သုဉ်းပျောက်ကွယ်၊
စိတ်ဝယ်မှန်းဆ၊ မသိကြပေ၊
နွေဦးပျိုမ၊ အရုဏ်ပျ၌၊
နိုးထခဲ့စဉ်၊ တို့မျိုးစဉ်ဆက်၊
ပျက်ငင်ပြိုကွဲ၊ သုဉ်းပြတ်စဲကြောင်း၊
သူလည်းသိခဲပေလိမ့်မည်။ ။

အခုနောက်ဆုံး လင်္ကာသွားနဲ့ ရေးလိုက်တာကို ကျနော့်စိတ်ထဲ ဘဝင်အကျဆုံးမို့ ဒီကဗျာကိုပဲ နောက်ဆုံးအတည်အဖြစ်ယူပြီး တင်ဆက်လိုက်ပါတယ် ... မူရင်းကဗျာကိုပါ ဖတ်ရှုခံစားနိုင်အောင် တဆက်တည်း တင်ပေးလိုက်ပါတယ် .... ဖတ်တဲ့သူတွေအနေနဲ့တော့ ဘယ်ဟာကို အကြိုက်ဆုံးလဲ မသိဘူးပေါ့နော် ... ဘယ်ဟာမှ မကြိုက်တာလည်း ဖြစ်နိုင်ပါရဲ့ ... :D

There Will Come Soft Rains (By Sara Teasdale)

There will come soft rains and the smell of the ground,
And swallows circling with their shimmering sound;
And frogs in the pools singing at night,
And wild plum trees in tremulous white;
Robins will wear their feathery fire,
Whistling their whims on a low fence-wire;
And not one will know of the war, not one
Will care at last when it is done.
Not one would mind, neither bird nor tree,
if mankind perished utterly;
And Spring herself, when she woke at dawn
Would scarcely know that we were gone.

ကျနော်လေရှည်မိသမျှ သည်းခံဖတ်ရှုပေးတဲ့အတွက် ကျေးဇူးအထူးတင်ပါတယ် ...

ဟယ်ရီ

Read More...

Saturday 8 October 2011

ဗေဒါလမ်းကဗျာများ၏ ပုံစံ

ဗေဒါလမ်းကဗျာများ၏ ပုံစံ

ဗေဒါလမ်းကဗျာတွေကို ဖွဲ့တဲ့ပုံစံက "အချိုးတွဲ" ကဗျာ အမျိုးအစား လို့ သတ်မှတ်ထားကြပါတယ် ...

အချိုးကဗျာဆိုတာ ဂန္ထဝင်ကဗျာပုံစံဖြစ်တဲ့ "ဒွေးချိုး" "တြိချိုး" "လေးချိုး" တို့ကို ခေါ်ပါတယ်။ တကယ်တော့ ဒီပုံစံတွေက သူ့ဟာသူ သီးသန့်ကို ကဗျာတပုဒ်အဖြစ်တည်ရှိနေပါတယ်။ ဒွေးချိုးတပုဒ်ကို ဥပမာ ပြရမယ်ဆိုရင် ...

ပစ်မခွါ၊
နှစ်တရာရှည်မြင့်အောင်ပ၊
တည်ခွင့်ပါဗျ။ ။

မေတ္တာငယ်လှိုင်၊
သစ္စာတိုင် ယိုင်မကျိုးပါနဲ့၊
ရိုးမြေပြာကျ။ ။

အချုပ်တန်းဆရာဖေရဲ့ အထက်ပါ ဒွေးချိုးဟာ သူ့ချည်းပဲကို ကဗျာတပုဒ် အဖြစ် သီးသန့်တည်ရှိနေပါတယ်။ ဒီလိုပါပဲ .. လေးချိုးတွေ ကိုကြည့်မယ်ဆိုရင်လည်း ...

ခလောက်လေးရယ်တဲ့ ဒိုးဒိုးဒေါင်။

ပျိုတို့လူ ယာမလုပ်တယ်၊
ဝါးခုတ်တဲ့တောင်။

နွားညီနောင်၊
စည်အောင်ပ ဖေကျောင်း။

မောင်နှင့်မယ် တူယှဉ်တွဲကာမှ၊‎
‎ယူငင်ကာ ခြူဆင်ဆွဲလို့ရယ်၊‎
လှည်းယာဉ်နဲ့မောင်း။ ။‎

ဒီ "လှည်းယာဉ်" ဆိုတဲ့ လေးဆစ်ကလေးကို အားလုံးကြားဖူးကြမယ်လို့ ထင်ပါတယ် .. သူ့ဟာသူကို ကဗျာတပုဒ်အဖြစ် သီးသန့်ရပ်တည်နေပါတယ် ... (လေးဆစ် ဆိုတာ လေးချိုးအတိုလေးကို ပြောတာပါ၊ လေးချိုးငယ် လို့လည်း ခေါ်ပါတယ်)

ဒါပေမဲ့ ဒီလိုပုံစံတွေကို တွဲစပ်ပြီး ကဗျာရှည်တပုဒ်အဖြစ် ခေတ်စမ်းကဗျာတွေမှာ ဆရာကြီးဇော်ဂျီ၊ ဆရာကြီးမင်းသုဝဏ် စတဲ့ ကဗျာကဝိများက ရေးသားခဲ့ကြပါတယ် ... "ဗေဒါလမ်း" တွေဟာ ဒီအမျိုးအစားထဲကပါ။ တခုသတိပြုဖို့ကတော့ အချိုးတွဲကဗျာတွေမှာ အချိုး ၂-မျိုး၊ ၃-မျိုးကို တွဲစပ်ရေးသားပေမဲ့ အကြောင်းအရာအားဖြင့်ကတော့ တခုတည်းပဲ ဖြစ်ပါတယ်။

ဒါကတော့ ဗေဒါလမ်းရဲ့ ဖွဲ့စည်းပုံကို တင်ပြခြင်း ဖြစ်ပါတယ် ... ဥပမာ အနေနဲ့ ဗေဒါလမ်း (၁၃) ဆိုင်ခင်းလျက်ပဲ ကို ပြပါမယ် .. ဒွေးချိုး ၄-ပုဒ် နဲ့ လေးဆစ် (လေးချိုး) ၁-ပုဒ်ကို တွဲစပ်ပြီး ကဗျာတပုဒ်အဖြစ် ရေးဖွဲ့ထားခြင်း ဖြစ်ပါတယ် ... အချိုးကဗျာတိုင်းရဲ့ ပဓာနကာရန်တွေကို လက်သည်းကွင်း ( )၊ ထောင့်ကွင်း [ ] တွေနဲ့ ပြထားပါတယ်။ ဒွေးချိုးတွေရဲ့ အချ (အဆုံးသတ်ကာရန်) ကို တွန့်ကွင်း { } နဲ့ပြထားပါတယ်။ လေးချိုး ရဲ့ ကာရန်ပြန် ကိုလည်း တွန့်ကွင်း { } နဲ့ပဲ ပြထားပါတယ်။ ဒါကြောင့် နောက်ဆုံးအုပ်ပိုဒ်ရဲ့ အချကို ထောင့်ကွင်း [ ] နဲ့ ပြန်ပြလိုက်ပါတယ်။ လေးချိုးမှာ ကာရန်ပြန် ဟာ သိပ်အရေးကြီးပါတယ်။ အများစု သတိမမူမိဘဲ အဲဒီနေရာမှာ ကာရန်လွတ်သွားလေ့ရှိပါတယ်။ အဲဒါဆိုရင် အချိုး ပျက်တော့တာပါပဲ။

ဒွေးချိုး (၁)
အညာ(လှေ)။
အညာ(မြေ)ကုန်[ရောင်း]ဖို့၊ ဒီ[ချောင်း]မှာ{နား}။

ထန်းလျက်(ခဲ)ရယ်နဲ့
(ပဲ)မျိုးစုံကြုံလေ[ခိုက်]၊ ဝယ်[လိုက်]ပါ{လား} ... တဲ့။

ဒွေးချိုး (၂)
တံငါ(လှေ)။
တံငါ(မြေ)ကုန်[ရောင်း]ဖို့၊ ဒီ[ချောင်း]မှာ{နား}။

ပုစွန်(ကျား)ရယ်နဲ့
(ငါး)မျိုးစုံကြုံလေ[ခိုက်]၊ ဝယ်[လိုက်]ပါ{လား} ... တဲ့။

ဒွေးချိုး (၃)
ကမ်းစပ်မှာ (မြှောင်)။
အိုး(ဖောင်) ကုန်[ရောင်း]ဖို့၊ ဒီ[ချောင်း]မှာ{နား}။

ရာဝင်(အိုး)ရယ်နဲ့
(အိုး)မျိုးစုံကြုံလေ[ခိုက်]၊ ဝယ်[လိုက်]ပါ{လား} ... တဲ့။

ဒွေးချိုး (၄)
ကမ်းစပ်မှာ(မြှောင်)။
ဝါး(ဖောင်) ကုန်[ရောင်း]ဖို့၊ ဒီ[ချောင်း]မှာ{နား}။

ခယင်(ဝါး)ရယ်နဲ့
(ဝါး)မျိုးစုံ ကြုံလေ[ခိုက်]၊ ဝယ်[လိုက်]ပါ{လား} ... တဲ့။

လေးချိုး (လေးဆစ်) (၅)

ဒီလမ်းက ပန်းဗေ{ဒါ}။

ဆန်ရေစုန်(ရေ)နဲ့
ထုံပေ(ပေ)သူမ[နား]၊ [သွား]ရခါ{ခါ}။

ပါပါစ ရောင်းစ{ရာ}၊ {ပါ}ရှာဘု သူတို့[နဲ]။

အပြာမှာ အဝါ(ကွက်)ကယ်နဲ့
အ(တက်)မှာသူရွှင်[ပြ]ပေမဲ့၊
[ကျ]လည်းလေ သူမ(ငြင်း)ရှာဘု
ဒီချောင်းရေ ကောက်က(စင်း)မှာ
ဆိုင်(ခင်း)လျက်[ပဲ]။ ။


ဒါလောက်ဆိုရင် ဗေဒါလမ်းရဲ့ ဖွဲ့စည်းပုံကို မြင်သာလောက်ပြီ လို့ ထင်ပါတယ် ... ကျန်တဲ့ ဗေဒါလမ်း ကဗျာအားလုံးဟာ လည်း ဒီလိုပဲ အချိုးတွဲပုံစံနဲ့ ရေးသားဖွဲ့ဆိုထားတာဖြစ်ပါတယ် ...

ဖတ်ရှုခံစားပေးတဲ့အတွက် ကျေးဇူးအထူးပါ ...

ဟယ်ရီ

Read More...

ဗေဒါလမ်း Ebook

ဗေဒါလမ်း ချစ်သူများအတွက် ဆရာဇော်ဂျီရဲ့ ဗေဒါလမ်းကဗျာများကို ကျနော် ebook လုပ်ပြီး တင်ပေးလိုက်ပါတယ် ... မြန်မာပြည်က လူတွေပါ download လုပ်လို့ရအောင် filefactory နဲ့ တင်လိုက်ပါတယ် ...

http://www.filefactory.com/file/ceb5def/n/Baydarlann__Zawgyi_ebook.pdf
စာအုပ်ကို ဖွင့်ဖို့အတွက်တော့ password လိုပါတယ် ...


password ကတော့ harrylwin ဖြစ်ပါတယ် ... :D

Download လုပ်ဖို့အတွက် လင့်ခ်အတိုင်းသွားလိုက်ပါ ... အဲဒါဆို Filefactory ရဲ့ Download page ကိုရောက်သွားပါလိမ့်မယ် ... အဲဒါဆို အောက်ဘက်ကို သွားပါ ... Slow Download ဆိုပြီး ဒိုင်ခွက်လေးအောက်မှာပေါ်နေတဲ့ အနီရောင်နဲ့စာတမ်း ကို click လုပ်လိုက်ပါ ... ပြီးရင် ထပ်ပေါ်လာတဲ့ အကွက်လေးထဲမှာ သူပြထားတဲ့ verification code ကို ရိုက်ထည့်ပြီး enter ခေါက်လိုက်ပါ ... "pleas wait 30 seconds .. " ဆိုတဲ့ စာတမ်းလေး ပေါ်လာပါမယ် ... စက္ကန့် ၃၀ စောင့်ပြီးရင် "Your download link is ready at the bottom of this page" ဆိုတဲ့ အစိမ်းရောင်စာတမ်းလေး ပေါ်လာပါလိမ့်မယ် ... အဲဒါဆိုရင် အဲဒီ page ရဲ့ အောက်ဆုံးကို သွားပြီး စောစောက Slow Download ဆိုတဲ့ ဒိုင်ခွက်လေးအောက်မှာပေါ်နေတဲ့ "Download" ဆိုတဲ့ အနီရောင်နဲ့စာတမ်းလေးကို Click လုပ်လိုက်ရင် ရပါပြီ ...


ဒီ ebook ထဲမှာ မာတိကာ ကနေ ကိုယ်ဖတ်ချင်တဲ့ ကဗျာကို click လုပ်ပြီး တိုက်ရိုက်သွားလို့ ရပါတယ် ...
မာတိကာ ကို ပြန်သွားချင်ရင် စာမျက်နှာတိုင်းရဲ့ အပေါ်ဆုံးမှာ ရှိတဲ့ အပြာရောင်မျဉ်းလေးပေါ်က" ဗေဒါလမ်း ...... ဇော်ဂျီ "ဆိုတဲ့ ဧရိယာ ဘယ်နေရာကို နှိပ်နှိပ် မာတိကာ စာမျက်နှာကို ပြန်ရောက်သွားမှာ ဖြစ်ပါတယ် ...
PDF Bookmark pane ကို ဖွင့်လိုက်ရင်လည်း မာတိကာ ပေါ်နေမှာ ဖြစ်ပြီး အဲဒီကနေလည်း ကြိုက်တဲ့ ကဗျာ ကို တိုက်ရိုက်သွားဖတ်လို့ရပါတယ် ...
အဆင်ပြေမယ်လို့ မျှော်လင့်ပါတယ် ...

Read More...

Sunday 2 October 2011

လမင်းပိုင်တဲ့ပန်း (Flor De Luna)

အို ကြာပွင့် ကုမုဒြာ
လရိပ်ဆမ်းဖြာ ပန်းပွင့်လာ
မဟူရာည တင့်တယ်ရာ၊
အပူဖြာသမျှ လွင့်ပြယ်သွား။
ဇာခြည်တန်းလွှမ်းခြုံ၊
နွမ်းအာရုံ ဝေးလွင့်သွေ၊
ပန်းကြာငုံထွေးပွင့်စေသား။

ပြာရီဝေသီ
ညှို့ချက်တွေဆန်း ကမ်းစပ်နားဆီ
မြူမှုန်တွေ ဝေ့ဝဲလည်
နီလာကြာနန်း
လရိပ်ဇာ အမျှင်တန်း
မှန်းကာသန်း ... လွမ်းခဲ့သည်
ညိုမှောင်လျ လင်းပြာရီ။ ။

Carlos Santana ရဲ့ Flor De Luna (Moon Flower) ကို ခံစားပြီးရေးလိုက်ပါတယ် ... တချိန်က ဂစ်တာသမားတွေ အားလုံးလိုလို အကြိုက်တွေ့ခဲ့တဲ့ ကမ္ဘာကျော်တေးသွားဖြစ်ပါတယ် ... ကျနော်ကိုယ်တိုင်လည်း အလွန်စွဲလမ်းခဲ့ဖူးတဲ့ တေးသွားပါ ... ဂစ်တာတီးသက်လေး နည်းနည်းလည်းရလာရော အရူးအမူးလေ့ကျင့်တီးခတ်ခဲ့ဖူးတဲ့ တေးသွားပါ ... ကျနော်တို့ အရွယ် ဂစ်တာသမားများ ပြန်လည်ရင်ခုန်ကြရအောင် ... နားမထောင်ဖူးသေးတဲ့သူများလည်း နားဆင်ခံစားရအောင် Carlos Santana ရဲ့ မူရင်းလက်သံကိုပါ ထည့်ပေးလိုက်ပါတယ် ...



ကျေးဇူးအထူးပါ ခင်ဗျ

ဟယ်ရီ

Read More...

Friday 30 September 2011

မဟူရာကဝေမလေး

ဘာဆိုဘာမှ မသိအောင်မှိုင်းဆင်
ငါ့ရင်ကိုခွင်း ...
မိစ္ဆာတကောင်ထုတ်ယူဖန်ဆင်းနေသလား ...
မဟူရာကဝေမလေးရေ။

ကျောခိုင်းမသွားပါနဲ့
ပဉ္စလက်မြားတွေနဲ့ ရီဝေမူးမော်
ငါ့မှော်နှင်တံကို ချိုးဖျက်ခဲ့လေသလား
မဟူရာကဝေမလေးရေ။

မန္တာန်တွေစုပ်
မန်းမှုတ် ဖမ်းစားလိုက်စမ်းပါ
ငါ့နှလုံးသားကို ကျောက်သားအဖြစ်ပြောင်းလဲ
အစွဲအမြဲတောင့်တပိုမိမှတော့
နင့်တကိုယ်တည်း မထားခဲ့နိုင်ပါ ...
မဟူရာကဝေမလေးရေ။

(Black Magic Woman - Carlos Santana)

အခုတလော Latin mood ဝင်ပြီး Santana သီချင်းတွေချည်းနားထောင်လိုက် တီးလိုက် လုပ်နေရာကနေ ခပ်ပျင်းပျင်းရှိတာနဲ့ Carlos Santana ရဲ့ Black Magic Woman ကို အရမ်း ဘာသာပြန်ပြီး ကဗျာလုပ်ရေးလိုက်ပါတယ် ...

  Download this mp3 from Beemp3.com

အချိန်ကုန်ခံပြီး ဖတ်ရှုခံစားအားပေးတဲ့အတွက် ကျေးဇူးအထူးပါခင်ဗျာ ...

ဟယ်ရီ

Read More...

Monday 26 September 2011

ချစ်သော မဟာနဒီသို့


သယံဇာတတွေ ကုန်ဆုံးသွားမလား
ရေချိုမြစ်ကြီး ပျောက်ကွယ်သွားမလား ...
စိုးထိတ်ရင်မော ...
ငါတို့တွေ ထိုင်ရာကနေတော့ မထနိုင်ခဲ့ကြ
ဖေးကူမယ့်လက်တွေ လိုတယ် ...
အသိပညာ
ဗဟုသုတ
စည်းလုံးမှုတွေ လိုတယ်..
နောင်အနာဂတ်မှာ ... မြန်မာပြည်မြေပုံ ကို အပြည့်အဝ ဆွဲချင်သေးတယ်
နောင်အနာဂတ်မှာ ... မြည်မာပြည်ကို လက်ညှိုးထိုးလို့ ပြချင်သေးတယ်
နောင်အနာဂတ်မှာ ... မြန်မာနိုင်ငံသားလို့ လက်မထောင်ပြီး
ကြွားချင်သေးတယ် ...
ဖြစ်နိုင်ပါ့မလား ... (စုလေး)

ငါထပ်တွေးတယ်
ရာဇဝင်ရဲ့ သတို့သမီးဆီမှာ
မရဏဖွားလက္ခဏာအပြည့်နဲ့
ဆည်တံတိုင်း တာတမံ
သူမအပေါ်တင်ကြ
သူမရင်ဝကိုပိတ်ဆို့ကြ
ငါကိုယ်ချင်းစာမိပါရဲ့ (kaung htet nay win)

သူမ အတွက် ...
ငါ့ ကမ္ဘာမှာ သက်ပြင်းချသံတွေ ဆူညံလို့နေခဲ့ပြီ ....
မနိုင်ဝန်ထမ်းရရှာတဲ့ သူမ ...
ဘယ်တော့များအရုပ်ကြိုးပြတ်ဖြစ်မလဲ
တထင့်ထင့်တွေးရင်း
အိပ်မက်တွေယောင်ခြောက်ဆယ်နဲ့
ဆုတောင်းသံတွေ ကမ္ဘာကို ညံခဲ့ပြီ .... (စုလေး)

သူ့အတွက် ရေကန်အသင့်၊ ကြာအသင့် မဖြစ်ခဲ့တာကြာပါပြီ
အခါလွန်မိုးတွေက သူ့အပေါ်အညှိုးကြီးစွာရွာချ
အညစ်အကြေးတွေ သူ့ကျောပေါ် လှုပ်ခါချမရ
အမှိုက်တွေက အသိုက်ဖွဲ့ပြီး နေထိုင်တတ်ကြလို့
တစ်ကယ်တမ်း ဖောက်ပြန်ရမှာက ရာသီဥတုရယ်ပါ
"... တစ်တောလုံးပြောင်၊ တစ်တောင်လုံးလင်း" ဆိုစကား
လူတွေလုပ်မိလို့ မှားတဲ့အမှားတွေနဲ့
လူတွေမလုပ်မိလို့ မှားတဲ့အမှားတွေ ...။ (Kyaw Myint Oo)

ကျောရိုးကိုဖြုတ်လိုက်သလို
ချိနဲ့သွားမယ့်အဖြစ်ကိုတွေးတိုင်း ရင်နာတယ်
ကန်းသွားပြီးခါမှ မီးထွန်းပေးမယ်ဆို
ငါမလင်းချင်တော့ဘူး
ကျိုးသွားပြီးမှ လမ်းခင်းပေးမယ်ဆို
ငါ မလျှောက်ချင်တော့ဘူး
သရဲသဘက်နဲ့မှ ပေးစားမယ်တဲ့
ဖြစ်ရလေခြင်းသတို့သမီးငယ်။ (သက္ကမိုးညို)

သူတို့နဲ့ငါတို့
ခေတ်ချင်းမတူခဲ့ကြ
စနစ်ချင်းမတူခဲ့ကြ
မျက်မှန်ပါဝါချင်းမတူကြ
ဖိနပ်ဆိုက်ချင်းမတူကြ
မိုးရေချိန်ချင်းမတူကြ
စိုးရိမ်ရေမှတ်ချင်းမတူကြ
ဒါပေမယ့်
နှလုံးသားရဲ့ ၀.၀၀၀၀၁%တူရုံမျှနဲ့
သူမကိုချစ်ကြတယ် ...။ (မှူးနေဝန်း)

ငါမမြင်ရဲဘူး...
အသွေးအသားကိုတောင် ရောင်းစားမယ့်အဖြစ်တွေ
ငါမယုံရဲဘူး...
ငါတို့ကို ရစ်ခွေထားတဲ့သူမ
ငါတို့ကို ထွေးပိုက်ထားတဲ့သူမ
ငါတို့ကချစ်တဲ့ သူမ
နောက်ပြီးတော့ နောက်ပြီးတော့...
ကမ္ဘာမကြေ ... (Paing Nyan Hein Aung )

ငါ့ရင်ခွင်မှာ ...
အားလုံးကိုထွေးပိုက်ရ...
အားလုံးကို ကြင်နာရ...
ကျွေးရမွေးရ...
လူလားမြောက်စေရနဲ့....
အခုအဖြစ်က....
အရွယ်ရောက်သားသမီးတစ်ချို့က
ငါ့ရင်ကဖြစ်တဲ့ နို့ရည်ကို
ခွက်နဲ့ခံပြီး ရောင်းစားသလိုမျိုး...
နောက်မွေးဖွားလာကြတဲ့..
လူမမယ် ဖတဆိုးလေးတွေရှင်သန်မှုအတွက်
လိုအပ်နေတဲ့အသွေးအသက်ကို
မစာမနာနဲ့ ဝင်နှုတ်သိမ်းတော့မယ့်ပုံမျိုး ...။ (သွေးခန့်)

မှတ်တမ်းမှတ်ရာဟောင်းကို ထုိုးခွဲပြီး
မှန်နန်းကန့်လန်ကာနောက်ထိ လက်ညှိုးငေါက်ငေါက်ထိုးတဲ့
မျက်နှာလွှဲခဲပစ် အဖြစ်မျိုးပဲ ။
ဆေးရှိပေမဲ့ ကုသခွင့်မရတဲ့အနာတစ်မျိုးပဲ
သူမ လူမဆန်စွာ ကျူးလွန်မှုကို ခံစားထားရတယ်
ရက်စက်နိုင်လိုက်တာ လို့ ဘယ်နှစ်ကြိမ်မြောက်မှန်းမသိရေရွတ်ပြီး
တာဝန်မဲ့တဲ့ လင်ယောက်ျားအပေါ်စိတ်နာပုံမျိုးနဲ့
စိုးရိမ်ရေမှတ်ရောက်တဲ့အထိ
နာနာကျည်းကျည်းငိုတယ် (အောင်ကိုကို)

ညတိုင်း ငါ့နားထဲမှာညံနေတဲ့
ဧရာဝတီရဲ့ ငိုကြွေးသံတွေ
ကန့်ကွက်ကြ ဆန့်ကျင်ကြ
သူမကိုဖျက်ဆီးသူမှန်သမျှ။
သူမရဲ့ နှလုံးသွေးနဲ့
ငါတို့ဘယ်လောက်တောင်များလုပ်ကျွေးခဲ့ပြီးပြီလဲ။
ထမင်းရှင်တင်မက သွေးရှင်သားရှင်
တိုင်းရင်းသားညီမောင်တို့ရင်မှာ
အစဉ်တည်တံ့စေ မြစ်ဧရာရေ ....။
သင့်အတွက် ဆုတောင်း သင့်အတွက် ကန့်ကွက်
သင့်အတွက် သင့်ဘက်က
ထာဝရရပ်တည်မယ်။ (မိုးသစ်လေပြည်)

ရာဇဝင်ထဲက သတို့သမီး
အခုတော့ ငိုညည်း နေရှာပြီလား
ငါ့သွေး ငါ့သား ငါ့ဧရာဝတီဆိုပြီး
ရင်ခွင်ထက်မှာ ကမ္ပည်း တင်ထားတယ်
ကျန်တာတွေ ဘာမှမပြောချင်ဘူး
ဘယ်သူပြောတာမှလည်း နားမထောင်ချင်ဘူး
ငါက သတို့သမီးရဲ့
ရယ်သံလေးတွေကိုပဲ မက်မက်မောမော နမ်းချင်နေသူပါ [ချီရွန် (ပုလဲ)]

သမိုင်း နဲ့  ရာဇဝင်နဲ့ 
ရာဇဝင်များရဲ့ သတို့ သမီး
ခေတ် အဆက်ဆက်
ပြည်သူတွေ ကို ရင်ဝယ်ပိုက် ပြီး
မမောနိုင် မပန်းနိုင်
တစ်နိုင်ငံလုံးကို စီးဆင်းနေတဲ့ 
ဘိုးဘေးဘီဘင် လက်ထက်ကအမွေ
ကျွန်တော်တို့ ခေတ်ရောက်မှ .......
ပျက်စီးရတော့ မယ် ဆို ရင် ........
ကျွန်တော်တို့ သမိုင်းမှာ ...... အမည်းစက် ကျန်ခဲ့လိမ့်မယ် (လုလင်ငယ်သွေး)

ရာဇဝင်ရဲ့သတို့သမီး..အပေါ်
မှောင်အောင်နေဝင်တော့မယ်တဲ့လား ...
တယ်လေ ..... ရိုင်းလိုက်လေခြင်း
ရင်နာတယ် ... ဧရာဝတီရယ်
အမြစ်တွယ်နေတဲ့ရင်ခွင်ထဲမှာ
အရင်အတိုင်းပဲ
...........
...........
လှပစီးဆင်းဆော့နေပါဦး ..........။ ။ (နေဝင့်မော်)

စီးစမ်း ....... စီး .....
ရဲရဲသာ .... စီး ..... ဧရာဝတီ ....
မင်းစီးစရာ နေရာမရှိရင်လေ ....
ငါတို့ ရဲ့ နှလုံးသွေးကြောတွေထဲက ဖြတ်ပြီး ... စီး ......
ငါတို့ ရဲ့ အသက်ဓာတ်ကို ဖြတ်ပြီး ... စီး .......
ပြီးတော့ .... အမှန်တရားကိုဖြတ်ပြီး ... စီး ...။
လူမဆန်ခြင်းတွေကို ကျော်ပြီး ... စီးကွာ ...
နောင် တစ်ခေတ်မှာ ........
ရှေးလူတွေကို ... မှတ်တမ်းပြုစုတဲ့ အချိန်...
မြို့ဟောင်းတွေကို ပြန်လည်တူးဖော်တဲ့ အချိန် ....
ရင်ဘတ်မှာ .... ဧရာဝတီ ဆိုတဲ့ နာမည်အထပ်ထပ်နဲ့
ကျောက်ဖြစ်ရုပ်ကြွင်းတွေဟာ ..... ငါတို့ပဲဖြစ်လိမ့်မယ် ... ဧရာဝတီ ....။ (ဟိန်း)

သတို့သမီးရဲ့ ဆည်းဆာချိန်ပေါ့ ...
နေဝင်လား ...
နေထွက်လား ...
ငါမဝေခွဲတတ်ပါ မဟာနဒီ ...
နေရယ် ...
မညိုပါနဲ့ဦး
မဝင်ပါနဲ့ဦး
သုံးပါးသော ဒုက္ခသစ္စာ တရားတွေ
ဝေးဝေးနေကြပါဦး ...
အရှေ့ဆီမှ ရောင်နီတို့ဆမ်းသော
နံနက်ဆည်းဆာသာ ဖြစ်ပါလေ
အို ... ချစ်သော မဟာနဒီ ...။ (ဟယ်ရီလွင်)


ကဗျာချစ်သူ (http://www.facebook.com/groups/206785939348399/) မှ ဧရာဝတီကို ချစ်သော ညီအကိုမောင်နှမများ စုပေါင်းရေးဖွဲ့ပါသည်။ ....

သရုပ်ဖော်ပုံအား ရေးဆွဲပေးသော ညီလေး Kyaw Myint Oo အား အထူးကျေးဇူးတင်ရှိပါသည်။

တတ်စွမ်းသမျှ ဆက်လက်ဖြန့်ဝေပေးကြပါရန် မေတ္တာရပ်ခံပါသည် ....

ဟယ်ရီ

Read More...

Friday 23 September 2011

ဘဝဆိပ်ကမ်း

အိပ်မက်တခု၊ အရင်းပြုရင်း၊
ထုဆစ်ခဲ့ကြ၊ တို့ဘဝတွေ၊
ညရိပ်ဝေရီ၊ နွေပီပီမှ၊
ရေကြည်မိုးပြောင်း၊ နှင်းဆောင်းငွေ့လျှံ၊
အမေ့ထံပါး၊ ဝေ့ပျံသွားခဲ့၊
စကားမဲ့ဒြပ်၊ တံလျှပ်ပန်းချီ၊
ချိုရီမြမြ၊ တသသနှင့်၊
ဘဝဆိပ်ကမ်း၊ နိမိတ်လွှမ်းချိန်၊
အိပ်တန်းပြန်ဖို့ အားဖြည့်နေ။ ။

ညီမလေး ဂျွန်မိုးအိမ်အတွက် မွေးနေ့လက်ဆောင် ရေးပေးခဲ့တဲ့ ကဗျာလေး အခုမှပဲ တင်ဖြစ်ပါတော့တယ် ....

ဟယ်ရီ

Read More...

Saturday 17 September 2011

မြန်မာကဗျာဆိုတာ ဂျို(ချို)နဲ့လား (၂၂)

တေးရိုး
တေးထပ် အကြောင်းပြီးတဲ့နောက်မှာ တေးထပ်နဲ့ ဆင်တူတဲ့ တေးရိုး နဲ့ တေးတွဲ့ အကြောင်း အနည်းငယ် ဖော်ပြချင်ပါတယ်။ ဒီခေတ်မှာ တေးရိုး၊ တေးတွဲ့ကို လုံးဝမတွေ့ရသလောက်ဖြစ်နေပါပြီ။ ဗဟုသုတ အဖြစ်နဲ့ပဲ ဖော်ပြလိုက်ပါတယ်။

တေးရိုးမှာ တေးရိုးငယ်နဲ့ တေးရိုးကြီး ဆိုပြီး နှစ်မျိုးရှိပါတယ်။
‎တေးထပ်ထက် ပိုပြီးရှေးကျတာကြောင့် တေးရိုးလို့ ခေါ်ဟန်တူတယ်လို့ ဆိုပါတယ်။ တေးရိုးကြီးနဲ့ တေးရိုးငယ်ဟာ ‎နည်းနည်းပဲ ကွာတာမို့ ကဗျာ့စွယ်စုံကျမ်းထဲမှာ တပေါင်းတည်း ပြထားပါတယ်။
လေးချိုးကို တပိုဒ်ဖြုတ်ပြီး အနည်းငယ် ပြင်ဆင်လိုက်ရင် တြိချိုးဖြစ်လာသလိုမျိုးပဲ တေးထပ်ကို ‎တချို့အပိုဒ်တွေ ဖြုတ်ပြီး နည်းနည်း ပြင်ဆင်လိုက်ရင် တေးရိုးငယ်-တေးရိုးကြီး ဖြစ်လာတယ် လို့ ဆိုထားပါတယ်။
‎အောက်က နမူနာ တေးရိုးငယ်ပုံစံ နဲ့ တေးရိုးကြီး ပုံစံကို ကြည့်လိုက်ကြရအောင်။

‎“တေးရိုးငယ် ပုံစံ”
မနှုန်းတန် စိန္တေယျမို့၊ အနန္တဘုန်းတော်ဂုဏ်၊
မြှောက်ဝှဲချီး အံ့မကုန်သည်၊ မြေဝသုန် တုနှိုင်း၊
သဗ္ဗညု ထွတ်ဘုန်းသည်ကို၊ ငါဇာနည် ဦးညွတ်လို့ကိုင်း။
စောမြတ်စွာ ထွဋ်ရှိုင်းသည့်၊ မနှိုင်းတန့် တရားတော်၊
ဂိုဏ်းရှစ်ဘို့ သံဃာတော်ကို၊ ရှိပူဇော် ဦးတင်၏လေး။

‎“ရှေးရေး တန်ခူးလဖွဲ့ တေးရိုးကြီးပုံစံ”
တန်ခူးဂိမှမှာ၊ ဓာတ်တေဇ ယှဉ်မှီ၊
ခါမိဿ အချိန်ညီ၊ သဝဏီနက္ခတ်၊
စိတြ မည်မကွာသည်၊ တာရမှာ ကေဝဋ္ဋမှတ်၊
ပန်းကံ့ကော် ရင်ခတ်တို့၊ ပွင့်ချပ်ကဲ့စုံလင်၊
သင်းရနံ့ ပျံ့ရွှင်၊ ရေသဘင်ပွဲလမ်း၊
ထိန့်ရိုက်ဆင့် ကျူးကျော်တယ်၊ သင်္ကြန်တော် ကြူးရင့်သည့်တမ်း။ ... ။

‎(တေးရိုးငယ်မှာ ‘လေး’ ဆိုပြီး တေးထပ်ချသလိုမျိုး ချပေမဲ့ တေးရိုးကြီးကတော့ အထက်အပိုဒ်ရဲ့ အချ‎ကာရန်အတိုင်း သံပြင်း လဟုသံနဲ့ ချတာကို သတိပြုပါ။)
ဒီခေတ်မှာ စပ်ဆိုမှု လုံးဝမရှိသလောက်ဖြစ်နေပြီမို့ ဒီလောက်နဲ့ပဲ တေးရိုးအကြောင်းကို ရပ်နားလိုက်ပါတယ်။

Read More...

Friday 16 September 2011

မြန်မာကဗျာဆိုတာ ဂျို(ချို)နဲ့လား (၂၁)

ရှစ်ဆယ်ပေါ်တေးထပ်

ရှစ်ဆယ်ပေါ်တေးထပ် ဆိုတာက တေးထပ်အကြီးစား တမျိုး ဖြစ်ပါတယ်။ တေးထပ်ကိုပဲ အဆန်းကွန့်၊ အညွန့်တပ်ပြီး ရေးတဲ့နည်းပါ။ ဘိုးတော်ဘုရားလက်ထက် ‎‎(၁၁၈၀)ပြည့်နှစ်က စပြီးပေါ်ပေါက် လာတဲ့တေးထပ်ဖြစ်လို့ ရှစ်ဆယ်ပေါ်လို့ ခေါ်တယ်လို့ ‎သိရပါတယ်။ ‎‎(၁၀၈၀)ပြည့်နှစ်က စတင်ပေါ်ပေါက်တယ် လို့လည်း တချို့စာအုပ်တွေမှာ တွေ့ရပါတယ်။ အမျိုးအစားအနေနဲ့ကတော့ အရင် ဖော်ပြခဲ့ပြီး ဖြစ်တဲ့ အရိုးခံ၊ သာမည၊ သုံးချက်ညီဆိုတဲ့ တေးထပ် အမျိုးအစားတွေအပြင် ထပ်တွန့် ရှစ်ဆယ်ပေါ်၊ ထပ်ကွန့် ‎ရှစ်ဆယ်ပေါ် ဆိုပြီး ထပ်မံ ကွဲပြားတယ်လို့လည်း ဆိုထားပါတယ်။ အင်မတန်မှ အသံပြေပြစ်ပြီး ဆိုလို့ကောင်းတဲ့ တေးထပ် အမျိုးအစားပါ။ အသံပြေသလို ဂီတရစ်သမ်လည်း မိပါတယ်။ ဟစ်ပ်ဟော့ပ် (Hip hop) လုပ်ဆိုလို့ရတဲ့ တေးထပ်မျိုးဖြစ်ပါတယ် ....

အပိုဒ်ရေ၊ အခံအအုပ်၊ အပြစ်ဒေါသတွေ အနေနဲ့ကတော့ အရင်ပြခဲ့ပြီးတဲ့ တေးထပ် ‎စပ်နည်းတွေနဲ့ အတူတူပါပဲ။
အက္ခရာ လုံးရေအနေနဲ့တော့ အပိုဒ် (၁၈)ပိုဒ်ရဲ့ အပိုဒ်တိုင်းမှာ အရင်တေးထပ် အက္ခရာတွေထက် ၂ ‎လုံးစီ၊ ၂ လုံးစီ ပိုပြီး ရေးသားရပါမယ်။ အပိုဒ်-၁၆ မှာတော့ စာလုံးရေ ၅-လုံး အတိအကျ အမြဲတမ်းထားရပါမယ်။ မပို၊ မလျော့ရပါ။
အစပ်ကာရန် နဲ့ လေပြင်းလေလျော့ (ဂရု၊ လဟု) ယူရာမှာတော့ အရင်တေးထပ်တွေထက် ၂ ‎လုံးစီပိုထားတဲ့အတွက်ကြောင့် တလုံးစီ နောက်ဆုတ်ပြီး စပ်မိ ဟပ်မိ ထပ်မိ စေရပါမယ်။
သဘောကတော့ သာမည၊ အရိုးခံနဲ့ သုံးချက်ညီတေးထပ်တွေမှာ ၁-အပိုဒ်ရဲ့ အဆုံးလုံးနဲ့ ၂-အပိုဒ်ရဲ့ တတိယလုံးကို စပ်ရပေမဲ့ ‎ဒီ ရှစ်ဆယ်ပေါ်တေးထပ်မှာတော့ ၁-အပိုဒ်ရဲ့ အဆုံးလုံးနဲ့ ၂-အပိုဒ်ရဲ့ စတုတ္ထလုံးကို စပ်ရမယ်လို့ ဆိုလိုတာပါ။ ကျန်တာက အတူတူပါပဲ။
ကဗျာစွယ်စုံကျမ်းကြီးထဲက ဥပဒေသ ဆောင်ပုဒ် ရှစ်ဆယ်ပေါ် တေးထပ်ကို အရင်ကြည့်ပါ ...




နမူနာ ရှစ်ဆယ်ပေါ်တေးထပ်လေးတွေကို ဖော်ပြလိုက်ပါတယ်။

အရိုးခံ ရှစ်ဆယ်ပေါ်တေးထပ် (မြှောက်ပင့်မယ်ဖွဲ့)

ရှေ့ဟောင်းကုသိုလ် ဆုဆိုသမျှကြောင့်၊ ခုလိုဘဝ တုမမြင်၊
နုပျိုအလှ သူ့အသွင်မှာ၊ မပြုမပြင် ယဉ်ပါပေ့၊
ကေသာဆံညွန့် သုံးတောင်ကျော်တယ်၊ ပိတုန်းရောင်နော် ညိုမှိုင်းပြာရီစွေ့။

သုံးရက်ပေါ်စ လရေးသွင်လို၊ မကဆေးမင် မျက်တောင်ကွေ့၊
သောက်ရှုးကြယ်ထင် လုံးမျက်စေ့နှင့်၊ ပြုံးလျက်ကလေ့ ပြုမူရာ၊
သွယ်ညွတ်နှာတံ မို့တမို့၊ မခို့တရို့ ကြော့ရှင်းရုပ်ရွှေဝါ။

နှုတ်ခမ်းဝါဖန့် နီမြန်းစွာငယ်၊ စီတန်းဒန္တာ ပုလဲအဖွဲ့သို့၊
မရဲတရဲ့ ပြုံးတော့မလိုလို၊ နှုံးကြော့ ကပိုကရို၊
ခါးတံသေးလို့ ရင်ချီပိုတယ်၊ သွင်မဒီအပျို နတ်နန်းရွှေကိုယ့်လေး။ ။

ရှုလေယဉ်လေ (သိကြားမှိုင်) သာမည ရှစ်ဆယ်ပေါ် တေးထပ် – (အမြှောက်ဖွဲ့၊ စလေဦးပုည-ရေး)

နန်းရံတရာ ပဏ္ဏာခ၊
မန်းမန္တလ ဗွေရိပ်စံ၊
စန်းစန္ဒရ ငွေဗိမာန်လို၊
ပင်ရွှေထိပ်ပန် ယဉ်မျာ့းပန်း၊
ဂုဏ်ထူးကေလျော့ တကြော့မှန်ငယ်၊
မဟော့်သက်နှံ တော်လေးအမရာ့ငြမ်း။

ကပိုကရို့ သူ့အမူငယ်၊
ဇမ္ဗု့မတူ ပြိုင်သူလျှမ်း၊
အမူ့အယူ လှိုင်ကြူပန်းသို့၊ (အမှု့အတူ လှိုင်ကြူပန်းဘို့)
ဆန်းဆိုသမျှ ခေါင်ထက်ခေါင်၊
ရှုလေယဉ်လေ မြင်သူငေး၊
ခင်လေးခင်ခင့် ယဉ်လေးယဉ်ယဥ့်၊
ယဉ်တတ်ပါတဲ့နောင်။

ပန်းချီရှုံးတဲ့ တော့်ဘုန်းခေါင်ငယ်၊
တကျော့ထုံးနှောင် ကေသီလျော့နှင့်၊
သုံးထောင်ထွာကြော့ လျော့ရွှေကေခိုင်၊ (သုံးထောင်ထွာကြော့ တော့ရော့ရွှေကေခိုင်)
ပိတုန်းမင်ညွန့်ဆိုင်၊
စံပုံရှားတဲ့ သိကြားမှိုင်ငယ်၊
သနားပိုင်ပိုင် ခံစမ်းချင်လှလေး (သနားပိုင်ပိုင် စံစားချင်လှလေး)။ ။
(ကွင်းအတွင်းက စာသားတွေက မူကွဲဖြစ်ပါတယ်၊ ကွန့်ပိုဒ် မဟုတ်ပါဘူး)

သုံးချက်ညီ ရှစ်ဆယ်ပေါ်တေးထပ် (တောဖွဲ့-မယ်ဆို)

တချုံ နှစ်ခြုံ အရုံဆင့်၊ ရဂုံအမြင့် ကမ်းသာယာ၊
ဖုံဖုံအပွင့် ပန်းမာလာကို၊ မှန်းကာတမ်းကာ လှမ်းကာခူး၊
လှိုင်ပေ့ကြိုင်ပေ့ မြိုင်ကွေ့ဝနာမှာ၊ ထိုင်၍ကညာ သီကုံးကာပ မြူး။
စမ်းရေအေးစက် ပြေးထွက်ချုံမှာ၊ ထွေးယှက်အရုံ ငုံအဖူး၊
ကျေးငှက်ဖုံဖုံ စုံစုံကူးလို့၊ ကြုံကြုံပါဘူး ထူးသည့်ဟန်၊
ချောက်ဝယ် မျောက်ငယ် ပျောက်ကွယ်ကြ၊ ကြောက်ဖွယ်ရာပ ခေါ်ကြ အော်ကြသံ။
ယုန်လားကြောင်လား ခုန်သွားပြန်တယ်၊ ချုံနားကမ္ဘယံ ငူအကွေ့၌၊
ပြူစေ့ပြူစေ့ လူငွေ့ရှာ၊ ကျားကြီးထင်လှပါ၊
မောင်တော်ရိုက်လှဲ့ ကိုက်မဲ့လာတယ်၊ မိုက်တဲ့သတ္တဝါ-သေသွားအောင်ပလေး။ ။

သုံးချက်ညီ ရှစ်ဆယ်ပေါ်တေးထပ် (ရွှေတိဂုဏ်စေတီဖွဲ့- ပါဠိဆရာကြီး ဦးဝေ-ရေး)

ဂီဝါ နီလာ ရီကာတန်း၊ ညီညာယှက်သန်း ကွက်ဆန်းခြယ်၊
ဋီကာလက်သန်း ထွက်ကျမ်းသွယ်လျှင်၊ ပန်းဘွယ် မှန်းရွယ် ဆန်းကြယ်တောင်း၊
မြိုင်ရပ် ဆိုင်ပတ် ခိုင်ချပ်ရုံတယ်၊ လှိုင်ထပ်အငုံ ကိုက်ဖူးတန်ကလှောင်း။ ။

ဂေါ်ပွင့် ဖေါ်ရင့် မြှော်လင့်ဝေတယ်၊ မော်မြင့်နဘေ မဝေဆောင်း၊
လှော်ပွင့်အရွှေ သရေညောင်းလို့၊ သပြေတောင်စောင်း မြလက်ျာ၊
ကိုးဂုဏ် ဖြိုးစုံ စိုးခြုံလျှမ်း၊ မိုးဘုံကြငှန်း စံမြန်းကွန့်ချက်ညှာ။ ။

ထိန်လျှပ် ရှိန်မြတ် တိမ်ချပ်လွှာမှာ၊ သိရ်မြတ်ရတနာ ကြူကြူသင်းလို့၊
ထူ,ထူပါမင်း သန့်ခင်းငြိမ့်ဖော်စည်၊ ဗျာရင်းမိန့်တော်တည်၊
ဆောင်ကွန့် ရောင်ဝှန့် တောင်ညွန့်လည်မှာ၊ နောင်အဓွန့်ရှည် ရွှေတိဂုဏ်ပလေး။ ။

သာမည ရှစ်ဆယ်ပေါ်တေးထပ် (မယ်ဖွဲ့ - ရဝေထွန်း - ရေး)

နွဲ့တဲ့နွဲ့တီ ပလီညှိလို့၊ မပီတပီ့ ပီ့တပီ၊
ကသီကရီ့ တီ့တတီငယ်၊ မချီ့တချီ ချီပုံနှင့်၊
နှုတ်စုံတွဲ့တွဲ့ နွဲ့နွဲ့ဖန်တယ်၊ ရွဲ့တဲ့အဟန် မူမျိုးစုံလျက်ဖွင့်။

မျက်လုံးညီညီ့ ချီချီ့တင်ကာ၊ ရီမည့်အသွင် မူမှန်ဆင့်၊
ကြည်လိကြည်လင် ကြူဟန်တင့်သည့်၊ တူဟန်သနှင့် သောက်ရှုးရောင်၊
မျက်နက်အကြည် ဒေါင့်မှာချိတ်လို့၊ ကြောင့်ရာနိမိတ် မုန်းတဲ့ ဟန်ပန်ဆောင်။

မပွင့်တပွင့် တမင့်ကြောင်ကာ၊ “အဟင့်-ဟင့်-မောင်” ကိုယ်ကိုလွန့်လို့၊
ပျိုပျိုအညွန့် ရွံ့ရွံ့ရို့ရရို၊ တွန့်တွန့် တို့တတို၊
ကပိုကရို့ အို-အို့ ဆိုကာ၊ ငိုမသို့လို ပျိုလေးဖန်တော့လေး။
ကတီခင်းစက် သင်းညက်ထုံမှာ၊ နှင်းဆက်ခြုံရုံ မြှူချော့ပြန်ရလေး။ ။

ထပ်တွန့် ရှစ်ဆယ်ပေါ် တေးထပ်

“သိကြားဆွေ” ထပ်တွန့် သုံးချက်ညီ ရှစ်ဆယ်ပေါ် တေးထပ် (ဘုန်းတော်ဖွဲ့၊ အချုပ်တန်းဆရာဖေ - ရေး)

နန်းပုံ ဆန်းစုံ ပန်းခုံမြင့်၊ စန်းယုန်နေပွင့် မခြားသွင်၊ (စန်းယုန်ငွေသွင့် မခြားသွင် - မူကွဲ)
မြန်းလှုံဝေတင့် ပတ္တမြားပလ္လင်ဝယ်၊ နှစ်ပါးအရှင် စံပြိုင်ထွန်း၊
(ဝေရောစန ရဝေသောမ)
ပရမေစောလှ နတ်နှစ်ဆူမှာ၊ မြတ်ပါရဂူ ဆုကြီးရည်လို့ညွှန်း။

(မဟီမြေတပြန့် ဝသီနေရဗန့်)
မဒီဝေသန့် ခုငြမ်းဆင်သည်၊ ဥဒါန်းရာဇဝင် နောင်မော်ကွန်း၊
ဋ္ဌာနီ ရာသီ ပါရမီမွှန်း၊ သဒ္ဓါစည်ရွှန်း အောင်မောင်းသံ၊
နတ်ဒေဝရာ ဗြဟ္မာအံ့၊ ကုသိုလ်တော်ဖြန့် ကောင်းချီးသာဓုခံ။

(ကြငှန်းဆင့်ဆင့် အလျှမ်းစွင့်စွင့်)
အဆန်းတင့်တင့် နန်းမြင့်ယံမှာ၊ စန်းပွင့်ရှင်ထံ ခိုလှုံခ,လို့၊
ဗိုလ်ပုံသကလ စွေကြိုး ဝေဖြိုးကာ၊ ရွှေမိုးငွေမိုးရွာ။
(လောကိအာသဘ စောဝိနာယက)
ဗောဓိလျာဖျာ့ အလှူ့သဒ္ဓါသည်၊ ဇမ္ဗူ့ပထဗျာ မြေလုံးတုန်ရလေး။ ။
(ရွှေနန်းဘောင်မြင့် ငွေစန်းရောင်ပွင့်)
မြေနန်းပြောင်မြင့် သကြာ့းဆွေမှာ၊ ဗြဟ္မာ့ကြက်သရေ ထက်ဖြိုးဝေလို့လေး။ ။

ဒီ ရှစ်ဆယ်ပေါ်တေးထပ်ဟာ အချုပ်တန်းဆရာဖေရဲ့ လက်စွမ်းပြလက်ရာလို့ သိရပါတယ်။ သူ့ရဲ့ တပည့်ဖြစ်သူ စင်တော်ကြီး မင်းသမီးကိုင် ဦးသာဇံ (ရုပ်သေးမင်းသမီး ဖြစ်ပါတယ်) အတွက် ရေးဖွဲ့ပေးခြင်း ဖြစ်ပါတယ်။


ထပ်တွန့် ရှစ်ဆယ်ပေါ် တေးထပ် (မိုးဖွဲ့-မောင်ဆို)

ဗိန္ဒုံ ဗိန္ဒုံ ငွေအမ္ဗု၊ ရေသံအစု ထစ်မြည်ကာ၊
ဝေလျှံအထု စစ်ချီလာတယ်၊ မလစ်ပြည်ရွာ-ညီညာဝိုင်း၊
‎(ကြိမ်ပန်းယှက်သို့ တိမ်မကန်းကွက်တို့)
ထိန်သန်းလက်လို့ မြူးကွန့်စွာငယ်၊ လူးလွန့်ဘယ်ညာ ညိုမဲပြာလို့မှိုင်း။
‎(နာကိတ်လျှမ်းပြု အပြာချိပ်မရမ်းနု)
ဇာမိတ်ပန်းအတု လိမ်တွန့်ကာငယ်၊ တိမ်ညွန့်မာလာ ရစ်ဆင်သိုင်း၊
ရှိန်ဝှန့်ဖြာဖြာ ရှစ်ခွင်တိုင်းသို့၊ သစ်လွင်မဆိုင်း လျှပ်စစ်ရုံ၊
ဖြိုးလျှံ ကျိုးသံ မိုးနဘံကွဲသို့၊ ငြိုးရန်အခဲ သဲတော့ မဲတော့ပုံ။
‎(မာန်တင်းစွာပ-ထန်ပြင်းပါလှ)
ရန်ခွင်းမှာလ မိုးပဇ္ဖုန်ရယ်၊ ကြိုးထစ်အကုန် တကယ်သဲချတော့၊
အလယ်လဲဗျ အေးလို့စက်ခိုက်တွင်၊ လွေးဖို့-ဖက်လိုက်ချင်။
‎(ဧကစာချမ်းဖို့ လေပါဖျန်းသမို့)
ခွေကာလွမ်းလို့ တပါးမရွှင်တယ်၊ သိကြားဘုရင် ရှော့ဘူးထင်ငဲ့လေး။ ။

ကွင်းစကွင်းပိတ်နဲ့ ရေးထားတဲ့ စာလုံးတွေက ထပ်တွန့်ကာရန် ခေါ်ပါတယ်။ ဒီလို ကာရန်မျိုးကို (၁၊ ၃၊ ၅၊ ၇ ... အစရှိတဲ့) မ ပိုဒ် ၉-ပိုဒ်ရဲ့ ကြိုက်တဲ့ အပိုဒ်မှာ ထည့်နိုင်ပြီး ‎ကျန်အပိုဒ် တွေမှာတော့ တွန့်ရိုးထုံးစံ မရှိဘူးလို့ ဆိုပါတယ်။ တွန့်ပုံကတော့ ထပ်တွန့်ကာရန် ထည့်ချင်တဲ့အပိုဒ်ရဲ့ ‎ရှေ့ထက်ဝက် အက္ခရာ ၄-လုံးကို ကာရန်တူ လုံးရေတူ ယူပြီး တကြိမ်ဖြစ်စေ နှစ်ကြိမ်ဖြစ်စေ ‎အပိုထည့်လိုက်ခြင်းပါပဲ။ ဒီတော့ မူရင်းအပိုဒ်က နောက်ကို ဆုတ်သွားလို့ ကြောက်ရွံ့ နောက်တွန့် သွားတဲ့ သဘော ဖြစ်တဲ့အတွက် “တွန့်” တယ် ခေါ်တာပါ။ အထက်ပါ ရှစ်ဆယ်ပေါ်တေးထပ်တွေရဲ့ အတွန့်ကတော့ နှစ်ဆ ‎တွန့်ထား တာပါ။ တဆပဲ တွန့်ချင်ရင်လည်း ရပါတယ်။ ဝေဿန္တရာအလှူဖွဲ့တေးထပ်မှာတော့ နှစ်ထပ်ကျော့ ချထားတာကို တွေ့နိုင်ပါတယ်။

ထပ်ကွန့် ရှစ်ဆယ်ပေါ် တေးထပ်
အတွန့်ပြီးတော့ အကွန့်ဖြစ်ပါတယ်။ အဆန်းထွင် ကွန့်ညွန့်ခြင်းသဘောနဲ့ မူလရှစ်ဆယ်ပေါ်တေးထပ်ကနေ အပိုပိုဒ်တွေ ထပ်ဖြည့်ပြီး စပ်ဆိုခြင်းပဲဖြစ်ပါတယ်။ နမူနာတေးထပ်တွေကို အရင်ကြည့်ပါ ...

ထပ်ကွန့် ရှစ်ဆယ်ပေါ် တေးထပ် (ပန်းဖွဲ့-မယ်ဆို)

အစီအရီ ပြိုင်အပြိုင့်၊ အခိုင်အခိုင့် ဆန်းတကြယ်၊
တလှိုင်တလှိုင့် ပန်းစပယ်ကို၊ နန်းမယ်ပန်မယ် ကြံရွယ်တုံး၊
ဇီဇဝါ ဒေါန ပန်းစူကာကို၊ လှမ်းချူအသာ စီလို့သီလို့ကုံး။
‎(ဇော်မွှား,သော်က,မြတ်လေးငုံရယ်၊ မပြတ်မွှေးထုံ ကြယ်နှင့် ဇွန်ကြက်ရုံး)။

တိုက်ပန်း, ဒန့်ဒလိပ် နွယ်ဘိန်းဖြာတယ်၊ ချယ်သိန်းမာလာ မညိုလုံး၊
စကားစိမ်း စကားဝါ အပျိုသုံးဘို့တဲ့၊ (အလိုဘာတဲ့ ...) အဖိုဂမုန်း ဆန်းလှသနော်၊
နှင်းဆီမိုးဆွေ ဆောင်တော်ကူး၊ ယောင်သော်အထူး ပန်းခက် နမ်းလျှက်မျှော်။
‎(ခေါင်ရမ်းခွာညို ဒဟတ်ခရားနှင့်၊ ဇလပ် စကား ဆတ်သွားမြတ်စွယ်တော်)။

ပုန်းညက်, အင်ကြင်း ရင်ခတ်ပေါ်တယ်၊ သဇင်, ဂန့်ဂေါ် ပေါက်နီ, လဲနှင့်၊
ပိတောက်, သရဖီ, ခဝဲ ကရမက် သင်းပျံ့ထုံ၊ ပန်းရင့်ပန်းဥစုံ၊
ပင်တိုင်နန်းမြင့် ခန်းသဥ့်ဘုံမှာ၊ ပန်းပွင့်ဖုံဖုံ ကိုယ်လုံးဝေလို့လေး။ ။
‎(သို့ကလောက်ပန်းနှင့် ဆန္ဒမကုန်တယ်၊ ပန်ရ ဘယ်ပုံ ဘယ်ပန်းလေသိလေး။)
‎(ပျိုတိုင်းချစ်တဲ့ ပန်းခက်တခိုင်ကို၊ နမ်းလျက်အပြိုင် ပန်စမ်းချင်ငဲ့လေး။)

ကွင်းထဲက အပိုဒ်တွေကို အကွန့်ပိုဒ်တွေလို့ ခေါ်ပါတယ်။ “ရွှေဉာဏ်တော် ကွန့်မြူးတယ်” ဆိုတဲ့ စကားအသုံးလိုပဲ ဖြစ်မြဲထက် ပိုမိုလွန်ကဲတာကို ‎ကွန့်တယ် လို့ ပြောကြသလိုပဲ ပုံမှန်ရေးရိုးရေးစဉ်ဖြစ်တဲ့ ၁၈-ပိုဒ်မှာ အပိုပိုဒ်တွေထပ်ထည့်ပြီး “ကွန့်” လိုက်တာမို့ ဒါမျိုးကို အကွန့်ပိုဒ်လို့ ‎ခေါ်တာဖြစ်ပါတယ်။ များသောအားဖြင့် ၁၈-ပိုဒ်ရဲ့ အဆုံးမှာသာ ကွန့်လေ့ ကွန့်ထ ရှိတယ်လို့ ‎သိရပါတယ်။ ဒါပေမဲ့ ၆-ပိုဒ် နဲ့ ၁၂-ပိုဒ် အဆုံးတွေမှာလည်း အကွန့်ထည့်လို့ရပါတယ်။ ၁၈-ပိုဒ်ရဲ့ အဆုံး၊ တနည်းအားဖြင့် တေးထပ်တပုဒ်လုံးရဲ့ အဆုံးမှာတော့ တပိုဒ်မက ၂-ပိုဒ် ကွန့်လည်း ရပါတယ်။

အတွန့်က မ-ပိုဒ်တွေရဲ့ ရှေ့ထက်ဝက်မှာပဲ တွန့်ပါတယ်။ အဆုံးမှာ မတွန့်ပါဘူး။
အကွန့်ကတော့ ဘယ်အပိုဒ်မဆို ကွန့်လို့ရတယ်လို့ ဆိုပါတယ်။ ဒါပေမဲ့ အဆုံးမှာပဲ ကွန့်ရမှာဖြစ်ပြီး တပိုဒ်လုံး ကွန့်ရပါမယ်။ တဝက် ကွန့်လို့ မရပါဘူး။‎
တေးထပ်ကြီး အခန်းမှာလည်း အတွန့်၊ အကွန့် အကြောင်း ဖော်ပြခဲ့ပြီး ဖြစ်ပါတယ်။
နမူနာ ရှစ်ဆယ်ပေါ် တေးထပ်များကို ဆက်လက် လေ့လာကြည့်ကြပါ ...

သုံးချက်ညီ ထပ်တွန့် နှစ်ထပ်ချ ရှစ်ဆယ်ပေါ်တေးထပ် (နိဗ္ဗိန္ဒဖွဲ့ - နာခံတော် ဝေါမှူးကြီး ဦးချို-ရေး)

ပိသုံ ပိသုံ ငြိဆုံရ၊ တိဘုမ္မက သင်္ခါရေ၊
ရှိကြုံသမျှ မြင်ရာတွေကို၊ မခင်သာချေ မည်သန့်ရှင်း၊
(ချုပ်လျှောရှည် မစောင့်၊ ပုပ်ပေါမည်တမှောင့်)
ရုပ်ချောကြည်အဖြောင့် သနားစရာကိုမြော်သည်၊ ဇယားမရဏာတွင် ကွက်ပြီးမှန်ပြသွင်း။
(အများဓမ္မတာပင် ပျက်စီးပြန်ရခြင်း)။

(လောက်ပိုးအတိပ၊ ဖောက်ထိုးကလိကြ)
ကြောက်စိုး မချိစရာ့ နွံညစ်ညှီတွင်၊ ကျွံနစ်ကသီ ရောင်ဇွတ်ဆင်း၊
ညွံပျစ်မသတီ နှောင်ညွှတ်ကွင်းမှ၊ မှောင်ဝဋ်အတွင်း ပျော်မွေ့ပုံ၊
ပျူငှာ မူရာ အူမှာဆွလို့၊ ရူပါရမ္မဏ တကွငါးအာရုံ။
(သူငါအစ ဘဝများစွာထုံ)။

(မိုက်ဆိုးဓလေ့၊ လိုက်ဘိုးမမေ့)
စိုက်ပျိုးသရွေ့ မျိုးစေ့စုံပြီ၊ ခိုးငွေ့မကုန် ပါဝင်ကြသမို့၊
မဟာသင်္ခတ ကျွတ်တန်းမြင့်အညာ၊ လွတ်လမ်းခွင့်မသာ၊
(စစ်ကျုံးတွက်မဖဲ့၊ ရစ်ဆုံးဆက်အသွဲ့)
ချစ်လုံးမက်စဖွဲ့ မြှူချော့လာသလို၊ ထူတော့မာယာ ငင်ဆွဲဟန်သို့လေး။ ။
(ငါးခန္ဓာ ပဉ္စက ခြားမကွာခင်ခဏ)
ပွားတဏှာယှဉ်သမျှ အပေါင်းစိတ်ကိုလွှာလျှင်၊ မကောင်းအနိဋ္ဌာ ဆင်လွဲကန်လို့လေး။ ။
(ခက်ခဲသတိပဋ္ဌာန နက်နဲအဘိဓမ္မာနယ)
လက်လွှဲတြိဘဝါသဝ ပြတ်ထွက်ပါအောင်၊ မြတ်စက်ရတနာ တွင်မြဲရန်ဘို့လေး။ ။

လူးတားညှပ် ရှစ်ဆယ်ပေါ်တေးထပ်

လူးတားညှပ် ရှစ်ဆယ်ပေါ်တေးထပ် ဆိုတာကတော့ သူ့နာမည်အတိုင်းပဲ ရှစ်ဆယ်ပေါ်တေးထပ်ထဲမှာ “လူးတား” ဆိုတဲ့ ကဗျာအမျိုးအစားတပုဒ်လောက်ညှပ်ပြီးရေးထားခြင်း ဖြစ်ပါတယ်။ ဘယ်နေရာမှာ ညှပ်ရသလဲဆိုရင် ပထမအပိုဒ်ကြီး (ပထမ ခြောက်ပိုဒ်အဆုံး) နဲ့ ဒုတိယ အပိုဒ်ကြီး ကြားမှာ ညှပ်ရေးရပါတယ်။
နမူနာတေးထပ်တွေကို ကြည့်လိုက်ရင် ရှင်းပါတယ်။ လူးတားညှပ်ရေးချင်ရင် လူးတားရေးနည်းကိုတော့ သိထားဖို့ လိုပါလိမ့် မယ်။ လူးတားဟာ ရတုတို့၊ ပျို့တို့လိုပဲ လေးလုံးစပ်လင်္ကာဖြစ်ပါတယ်။ အချမှာ နှစ်ကျော့ချပါတယ်။ ပထမအချပိုဒ်ကို “ ... တည့်လေ” နဲ့ဆုံးပြီး ဒုတိယအချပိုဒ်ကိုတော့ နှစ်သက်ရာချလို့ရပါတယ်။ လူးတား ကို အခုခေတ်မှာ ရေးတာ မရှိသလောက် ရှားသွားပါပြီ။ လူးတားရေးနည်းကို အလျဉ်းသင့်ရင် သီးသန့်တင်ပြပါမယ် ...

လူးတားညှပ် ရှစ်ဆယ်ပေါ်တေးထပ် (ဘုန်းတော်ဖွဲ့၊ အကြီးချုပ်ဝန်ဟောင်း မင်းကြီးမင်းလှ ဥစနာ-ရေး)

ဖလ်ဥဏ္ဏမူ ဟန်မြူပ,သလို၊ ရန်ဟူသမျှ ဘာသာငြိမ်၊
စံတူမရ အာဏာနှိမ်သည်၊ သမ္ဘာတော်ရှိန် ထိန်ထိန်လင်း၊
ဓညပုည ဖြိုးလက်စီသည်၊ မျိုးဆက်သန့်ရည် နိမိတ်မူသည့်မင်း။
(သတိုးသက်ရှည် ဗျာဒိတ်ကျူသည့်မင်း)။

လူးတားညှပ်။ ။ ယုဂန္ဓိုရ်နောင်၊ တောင်ဥသျှောင်ကို၊ မိုက်မှောင်စတေ၊ လေဖြင့်ချွေလည်း၊ လွင့်ကြွေမရှိ၊ ပကတိသို့၊ ဓိတိမဏ္ဍိုင်၊ ကြံ့ကြံ့ခိုင်လျက်၊ မယိုင်နဂိုရ်၊ ကြီးကုသိုလ်ကြောင့်၊ လူဗိုလ်ဝှဲ့ချီး၊ အံ့မငြီးသည် ... မင်းကြီးမင်းခေါင် ရာဇာတည့်လေ။ ။ ပုညာဘိ စက်တန်ခိုး - တင့်တင့်တိုး။ ။

တေးပြန်ကောက်။ ။ ရှင့်ကျိုးတော်ရှိ စေတိုင်းတွင်သည်၊ မဟေကျိုင်းတင် အစဉ်စိုး၊
နေနွယ်ဂိုဏ်းဝင် ဘုရင်မျိုးမို့၊ သနင်္ကူမိုး ဗွေထက်စွန်၊
လက်ညှိုးတော်ညွှန် ယူစေချီးလျှင်၊ ဓူဝံကြယ်ကြီး ချွေဆက်နိုင်မည့်ကျွန်။

လူလွန်တထီး တမူချွန်သည်၊ ဇမ္ဗူအဝှန် တံခွန်စိုက်မို့၊
တွန်ရိုက်တုန်လွှင့် ဂုဏ်မြင့်မြေခံ၊ နတ်ကျွန်းဘူမိမှန်၊
သုံးနှစ်ပြီးလို့ သုံးသီးခံတယ်၊ ကောင်းချီးတိတ်သံ နိမိတ်တော်ရလေး။ ။
(ရွှေလွှတ်နှင်းမည့် တြင်းငြာသည်၊ မယွင်းမင်္ဂလာ အောင်ဟိတ်တော်ရလေး)။ ။

အချုပ်တန်းဆရာဖေနဲ့ ခေတ်ပြိုင်စာဆိုကြီး စလေဦးပုညမှာလည်း ဆရာဖေလိုပဲ ဇာတ်သဘင်ဘက်က တပည့်ရှိပါတယ်။ သူက ရုပ်သေးစင်တော် ဦးသာဗျော ပါ။ ဆရာဖေက ဦးသာဇံအတွက် မင်းတုန်းမင်းဘုန်းတော်ဖွဲ့ကို လက်စွမ်းပြ သီကုံးပေးလိုက်လို့ ဦးပုညကလည်း သူ့တပည့်အတွက် အားကျမခံ လူးတားညှပ် ဘုန်းတော်ဖွဲ့ ရှစ်ဆယ်ပေါ် တေးထပ်တပုဒ်ကို ရေးပေးလိုက်ပါတယ်။

လူးတားညှပ် ရှစ်ဆယ်ပေါ်တေးထပ် (ဘုန်းတော်ဖွဲ့၊ စလေဦးပုည-ရေး)

သုံးသိန်းသုံးသောင်း လေးထောင်ထိပ်၊ နှစ်ကျိပ်ရှစ်ဆက် မဟာဝင်၊
အတိတ်ဖြစ်ပျက် ကမ္ဘာတွင်အောင်၊ ဘယ်ရာဇာလျှင် မစံမြန်း။
လေးဆယ်ရှစ်ရပ် ပြာသာဒ်ရံသည်၊ နတ်ဝိသုကံ သစ်လောင်းဖန်သည့်နန်း။

လူးတားညှပ်။ ။ ရှစ်သောင်းလေးထောင်၊ နှစ်ပြန်ဆောင်သား၊ ရန်အောင်ဗဟို၊ မြမြင့်မိုဝယ်၊ ရေညိုခွေချပ်၊ ဂဟေထပ်လျက်၊ မြေစပ်ခန်းဝါ၊ ကဲ့ပမာသို့၊ မန္ဓာဘူတပတ်၊ မြေဥက္ကဋ္ဌ်လည်း၊ လူနတ်ချီးပင့်၊ ပလ္လင့်သဏ္ဌာန်၊ ဘုံဗိမာန်ဝယ်၊ ဝေယန်ကြငှန်း၊ သိကြားနန်းသို့၊ တသန်းခြည်ရောင်၊ သုံးတိုက်လှောင်သည် ... အခေါင်သေဋ္ဌမန့်တည့်လေ၊ ဝိသုဒ္ဓိပန်း တည့်သည့်နန်း။

တေးပြန်ကောက်။ ။ ရေယဉ်နဝရတ်နှုန်းတန္တီလို၊ ရွှေကျုံးဂမ္ဘီကာရံသန်း။
ပြည်ကြီးမွန်ဘောင် လောင်ထမန်း၊ ရွှေဆောင်ရွှေနန်း အထွေထွေ။
ရွှေလောင်း ရွှေလှေ ပွေပွေရှက်၊ တေဇာတွေဖက် ရေလက်ယာရစ်ခွေ။

ရတနာဘုမ္မိ တိုင်းဌာနေမှာ၊ သမိုင်းစာခွေ ထိန့်ထိန့်သစ်လို့၊
နေဣန္ဒရာဇ် နတ်ရှင်ခေတ်ပေ၊ သာမျိုးစုံစွထွေ။
ရွှေနန်းစုံဆက် ဂဂ္ဃဒေလို၊ ပုံကောင်းခက်ရွှေ ဆက်ပွဲခံလို့လေး။"

အခုဆိုရင် တေးထပ်နဲ့ ပတ်သက်သမျှ အားလုံးပြီးဆုံးသွားပြီ ဖြစ်ပါတယ်။ တေးထပ်များ ရေးစပ်ပြီး ရွှင်လန်းကြပါစေ ....

တေးထပ်အကြောင်း ပြီးပြီဖြစ်တဲ့အတွက် တေးရိုးနဲ့ တေးတွဲ့အကြောင်း ဆက်ပါဦးမယ် ....

ဟယ်ရီလွင်

Read More...

Sunday 4 September 2011

လာဗားနာ ရဲ့ ပုံပြင်


ငါသည် ...
အမှောင်နတ်မိမယ်
အစ၏အစ ...
အနှေး နှင့် အမှောင်သာ
ကမ္ဘာကိုထုဆစ်ကြချိန် ...
ရှင်သန်ခြင်းများသည်
မြှုပ်နှံခံထားရ၏ ...
ရတနာတို့မူ
တူးဖော်ယူငင်မှုဝေး၏ ...
ကြွယ်ဝမှုအလုံးစုံသည်
ဖုံးကွယ်ခံထားရ၏ ...
ဆွဲလုယူငင်သွားတတ်သည့်
လက်အစုံပိုင်ရှင်
ငါလျှင်ဖြစ်သတည်း ...

ခိုးဝှက်ယူငင်ခြင်းခံရသော ငွေအိတ်
ပျောက်ဆုံးသွားသော ဒင်္ဂါး ...
အမှောင်ရိပ်တွင်းမှ မိန်းမသား
ငါတပါးလျှင်တည်း ...
သင်တို့အား စောင့်ကြည့်နေပါ၏ ...
ငါ အမြဲတည်ရှိရင်း
ထာဝစဉ် ...
စောင့်ကြည့်နေပါ၏ ....
အလင်းတို့ဖြင့် အတိလွှမ်းသော
လမ်းများပေါ်တွင်ပင်
ငါ ရှင်သန်တည်ရှိနေ၏ ...
သို့ဆိုစေလျှင်မူ ...
အလင်းသည်ကား ...
အမှောင်အား ပိုမိုနက်ရှိုင်းစေခြင်းသာတကား။
လွှင့်ပစ်ခံ ရတနာများ
ဝေမျှခံစားခြင်း မဲ့ကင်းလေသော စည်းစိမ်များ
ဘေးဖယ်ထားကြလေသော ...
သိမ်းထားကြလေသော ...
နောက်ဆုံး မေ့လျော့သွားကြလေသော ...
အဖိုးအနဂ္ဃထိုက်သည့် အရာများ
ငါ မြင်လေသည်သာတကား ...

ခန္ဓာဝန်၏ နောက်ဆုံးထွက်သက်အား
ကြိုးဖြည်လွှတ်လေသော ...
အရွတ်နှောင်ထုံးများအား
ဖြေလျော့ရှင်းလင်းပစ်လေသော ...
ထို့ထက်ပို၍ ...
အမတအရိုးများကိုပင်
တစစီ ဆွဲဖြဲချိုးဖဲ့ပစ်လေသော ...
ကာလတရား၏
အသနားမဲ့ ခိုးဝှက်မှုကံအစဉ်မှာ ...
ငါသာလျှင်တည်း ...
ငရဲအသွားလမ်းတွင်
ခလုတ်ကန်သင်း ရှင်းစေရေး
"ခယ်ရန်" (Charon) အား ပေးရမည့် ကူးတို့ခ
သင့်အိတ်တွင်းမှ
နောက်ဆုံးလက်ကျန် ခြူးပြားတစ ကို
လက်ရကုန်စင်
ခိုးဝှက်ယူငင်သွားသောနတ်သမီးသည်
ငါလျှင်ဖြစ်သတည်း ...
အမှန်အားဖြင့်
သင့်အတွက်
လိုအပ်သည်မဟုတ်ချေတကား ...

ငါ့အား ...
ကြောက်ရွံ့ရိုသေခြင်းသည်
သင်၌ ရှိသည်ဖြစ်စေ ...
မရှိသည်ဖြစ်စေ ...
အကြံတခုတော့
ပေးရပေလိမ့်မည် ....
ခိုးဝှက်ခံရခြင်း ကင်းဝေးရန်
ရှင်သန်နေထိုင်တတ်ပါလေ
တောက်ပသော ...
လှပသော ...
အဖိုးအနဂ္ဃထိုက်သော ...
ရတနာအသွယ်သွယ်
စီခြယ်သည့် ဘဝတခု
နေမှုဖြစ်စေ ...
သို့မူကား ...
သေရာညောင်စောင်းတွင်
အသင် လဲလျောင်းရချိန်
ဖြားယောင်းလုယက်
သင့်ထံမှ ခိုးဝှက်၍မရသော
ဧကဘူတ တည်း ...
မုချဧကန် အမှန်ဖြစ်လာမည့်
သင့်အသက်ကို
လှည့်ဖျားလုယက်ခံရချိန်
စံစားရမည်မှာ
ဤအရာတခုသာတည်း ...

ဂူသင်္ချိုင်းအားလုံးသည်
အမှတ်အသားမဲ့ကင်းလေ၏
သုဿန်အားလုံး ပြည့်နှက်နေသလောက်
လူသူမဲ့ကင်းနေလေ၏။
စားပွဲတော်ညတွင် ...
ဝိဉာဉ်အကကို
လှလှပပ ကပြနေသော အရိုးစုမှာ
ငါသာလျှင်တည်း ...

"ငါ့အား သတိရလေ
မရဏတရားအား သတိရလေ
သို့မှတစေ အသင် မည်သို့ရှင်သန်နေရမည်ကို
နားလည်ပေမည်တည်း ..."
အောင်ပွဲခံနေလျက်နေဆဲ
စစ်သူကြီး၏နားထဲမှ
တီးတိုးသံတစ သည်ပင်
ငါလျှင်ဖြစ်ပေတကား ...

(The Tale of Laverna ကို ဆီလျော်အောင် ခံစားပြန်ဆိုရေးဖွဲ့ခြင်းဖြစ်ပါသည် ...)

ခိုင်စိုးလင်း စီစဉ်တဲ့ The Dark Side စာအုပ်အတွက် ရေးပေးထားတဲ့ ကဗျာပါ ... သူခိုးအကြောင်းရေးပါဆိုလို့ ဒီကဗျာကို ရေးဖြစ်ပါတယ် ...
သရုပ်ဖော်ပုံ ဆွဲပေးတဲ့ မလေးမေ ကိုလည်း ကျေးဇူးအထူးတင်ပါတယ် ...


ဖတ်ရှုခံစားအားပေးတဲ့အတွက် ကျေးဇူးအထူးပါ ခင်ဗျာ ...

ဟယ်ရီ

Read More...

Friday 12 August 2011

မဟာနဒီ၏ ဈာပန နိဒါန်း

အကြေအညာဆက်ပေး၊
ပြေ(ပြည်)မြန်မာအသက်သွေးမို့၊
ရတက်မအေးပါ မဟာနဒီ။

မြစ်နှစ်စင်းဟာ၊
မြစ်မင်းမဟာဖြစ်၊
ကြာရစ်လေပြီ။

ခင်ဝမ်းရဲ့ ဧရာဝတီ၊
ရွှေဝါပြည်ရဲ့ ဇာတိသမိုင်း။

မပြစ်မှားလေနဲ့၊
မြစ်ဖျားမှာ ဆည်တွေပိတ်ရင်ဖြင့်၊
အပြစ်များစွာ ကြွယ်နေလိမ့်ပေမပေါ့၊
ရေဆိပ်တွေ မသွေခမ်းပါလို့၊
ရေလမ်းတွေ တွင်တွင်ကျဉ်းပါလိမ့်၊
ရေဆင်းဟာ အလျဉ်နှေးကာပ၊
ရင်သွေးတွေ ရေမဝနိုင်ဘူး၊
ဂေဟတွေ ဖြစ်စဉ်ပျက်ရုံမက၊
မြစ်ပြင်နက် တိမ်ကောကာ၊
ကျိန်ပြောပါမှ “မြစ်” ဆိုရပါလျှင်၊
ခေတ်ကိုပြတဲ့ ကြေးမုံအင်မှာ၊
တေးပုံပြင် စာတင်နှိုင်းလာသမျှဟာ
ကွယ် ... ရာဇဝင်ရိုင်း။ ။

မြစ်မင်းကို ကယ်တင်ကြပါစို့ ... တတ်နိုင်သမျှ လက်ဆင့်ကမ်းပေးကြပါရန် အထူးပန်ကြားအပ်ပါသည် ...

ဟယ်ရီလွင်

Read More...

Wednesday 3 August 2011

ဥဒါန်းကို အစာမကြေသူများသို့

"ကမ္ဘာကြေသော်လည်း ဥဒါန်းမကျေ"

ဒီစကားကို အားလုံးလိုလို ကြားဖူးနေကျ ဖြစ်လိမ့်မယ်လို့ ထင်ပါတယ်။ ဒါနဲ့ပတ်သက်ပြီး ညီလေး Ye Thurein Min က Facebook မှာ မေးမြန်းလာပါတယ်။ ဒီစကားနဲ့ပတ်သက်ပြီး သူငယ်ငယ်က ကြုံတွေ့ခဲ့ရတာကို အစာမကြေလို့ပါတဲ့ ... ဖြစ်ပုံက ဒီလိုပါ ...

သူခပ်ငယ်ငယ်တုန်းက သမိုင်းထဲမှာ သိပ္ပံပညာရှင်ကြီး တယောက်အကြောင်း (သောမတ်စ် အက်ဒီဆင်ထင်ပါတယ်) သင်ရတဲ့ စာထဲမှာ သူရဲ့ငယ်စဉ်ဘဝ၊ ကြီးပြင်းလာတော့ တီထွင်မှုတွေ အကြောင်း လေးစားလောက်အောင် ရေးထားပါတယ်။ အဲဒီမှာ သူနဲ့ စတွေ့တဲ့ ပြဿနာက စာအဆုံးမှာ အက်ဒီဆင်သည် ကမ္ဘာကြေသော်လည်း ဥဒါန်းမကျေသော ပုဂ္ဂိုလ်ကြီးဖြစ်လေသည် လို့ အဆုံးသတ်ထားပါသတဲ့။ ဒါကို သူ့အနေနဲ့ တော်တော်ကို ခံစားခဲ့ရပါတယ် လို့ ဆိုပါတယ်။ ကမ္ဘာကြေသော်လည်း ဥဒါန်းမကျေ ဆိုတဲ့ စကားလုံးဟာ ဘာကိုဆိုလိုမှန်းမသိခဲ့လို့ပါ။ ဒါနဲ့ ဆရာမကိုမေးမိတဲ့အခါ ဆရာမက "ဟဲ့ ... နင်တော်တော်လျှာရှည်တာပဲ၊ အဲ့လိုပဲ မှတ်ထားပေါ့" လို့ ပြန်ဆူတာကို ခံလိုက်ရပါတယ်တဲ့။ ဆရာ၊ ဆရာမတွေရဲ့ ဒီလို အမူအကျင့်တွေဟာ ကလေးအရွယ် ပညာသင်နေဆဲအရွယ် လူငယ်တွေရဲ့ သိလိုစိတ်၊ တတ်လိုစိတ် ကို လျော့ပါးစေပါတယ်။ ဒါတွင်မက မေးသင့်မေးထိုက်တာကို ရဲရဲဝံ့ဝံ့ မေးမြန်းလိုစိတ်ကိုလည်း ပျောက်ကွယ်သွားစေပါတယ်။ အဲဒီကနေ ဆက်ပြီး ပြောသင့်ပြောထိုက်တာကို ရဲရဲရင့်ရင့် ပြောဆိုရဲတဲ့ စိတ်ကို ထပ်ပြီး လျော့ပါးစေပါတယ်။ ဒါမျိုးတွေများလာတဲ့အခါ ကျနော်တို့ generation တခုလုံးမှာ လုပ်သင့်လုပ်ထိုက်တာကို ရဲရဲဝံ့ဝံ့ သတ္တိရှိရှိ လုပ်ရဲကိုင်ရဲတဲ့ စိတ်တွေ ပျောက်ပြီး ကြောက်စိတ်တွေကြီးစိုးကာ လူပျော့လူညံ့တွေ များသထက်များလာတဲ့အထိ မျိုးဆက်တခုလုံး ထိခိုက်စေပါတယ်။
ကဲ ဒါတွေ ထားပါတော့လေ ... စကားစပ်မိလို့ အတွေးမျှင်ဆက်ရင်းကနေ လမ်းကြောင်းလွဲကုန်လို့ မူရင်း အကြောင်းအရာကို ပြန်ဆက်ပါ့မယ် ... သူ ဒီကိစ္စကို မေ့မေ့ပျောက်ပျောက် ဖြစ်သွားပေမဲ့ အဲဒီလို အသုံးအနှုံးကို တွေ့တိုင်း သိလိုစိတ်က ပေါ်လာပြန်ပါသတဲ့ ... သူ့အနေနဲ့ နားလည်မိတာက
ကမ္ဘာကြီးသာ ကြေပျက်သွားချင် ကြေပျက်သွားမယ်၊ ထိုသူ့ရဲ့ အကြောင်း ဥဒါန်းကျူးရင့်မှုကတော့ ကျေပျက် ပျောက်ပျက် သွားမှာ မဟုတ်ဘူးလို့ပဲ နားလည်ထားပါတယ်လို့ ဆိုပါတယ်။ ဒါပေမဲ့ ဒီလိုရှင်းပြထားတဲ့ စာရယ်လို့လည်း ဘယ်မှာမှ ရှာမတွေ့ခဲ့ဖူးသလို ဘယ်သူ့ထံကမှလည်း ရှင်းပြတာကိုလည်း နားမထောင်ခဲ့ဖူးတဲ့အပြင် ထပ်မံ ရှုပ်ထွေးစေတာက ဗုဒ္ဓစာပေတွေကို ဖတ်မိတော့
"သဗ္ဗညုတဉာဏ်တော်ရှင် ဗုဒ္ဓအဖြစ် ရောက်တော်မူ၏၊ ထိုစဉ် နှစ်သက်ဝမ်းမြောက်တော်မူသော ရွှေစိတ်တော် လှုံ့ဆော်သဖြင့် ရှေးရှေးသော နောင်တော်ဘုရားရှင်များနည်းတူ ဥဒါန်းကျူးရင့်တော် မူလေသည်။" ... လို့ ထပ်တွေ့တဲ့အခါကျတော့ သိချင်စိတ်တွေ ပိုများလာပေမဲ့ ထပ်မရှာဖြစ်တော့ပါဘူးတဲ့။
ဥဒါန်းမကြေမဟုတ်ဘဲ ဥဒါန်းကျူးရင့်ဆိုတဲ့ အသုံးကသာ ပိုအသုံးများတာ သတိထားမိလာပြန်တာကြောင့် ကမ္ဘာကြေသော်လည်း ဥဒါန်းမကျေ ဆိုတဲ့ စကားလုံးကို ရှင်းပြထားတာလေး ဖတ်ဖူးသူများရှိရင် ပြောပြပေးကြဖို့ Facebook က “စာပေစကားဝိုင်း” Group မှာတောင်းဆိုထားပါတယ် ...

ဒီစကားစုဟာ မကြာခဏ တွေ့ဖူးနေကျ ဖြစ်တဲ့အပြင် ဒီစကားစုရဲ့ အဓိပ္ပာယ်အပေါ် အစာမကြေ ဖြစ်နေကြသူ အများလည်း ရှိနိုင်တာကြောင့် ဒီ စကားရဲ့ အဓိပ္ပာယ်ကို ရှင်းလင်းဆွေးနွေးသွားပါရစေ ... ပညာရှင်များ၊ သိရှိနားလည်ပြီးသားသူများအတွက် ရည်ရွယ်တာမဟုတ်ဘဲ မသိသေးတဲ့ သူများ သိရှိနားလည်သွားစေဖို့သာ ရည်ရွယ်ပါတယ်။

ဒီနေရာမှာ ကမ္ဘာကြေသော်လည်း ဥဒါန်းမကျေ ဆိုတဲ့ စကားစုတခုလုံးရဲ့ အဓိပ္ပာယ်ကို ပညာရှင်များ တသီးတသန့် ရှင်းပြထားတဲ့ အထောက်အထား အကိုးအကားကိုတော့ ကျနော် မတွေ့ဖူးပါဘူး။ စကားစုတခုရဲ့ အဓိပ္ပာယ်ကို သိချင်ရင် တခုလုံးကို တိုက်ရိုက်ရှင်းပြထားတာမျိုး အကိုးအကားရှာဖွေဖို့ ဆိုတာကလည်း တကယ်တော့ အင်မတန်ခက်ခဲပါတယ် ... ပုံမှန်အားဖြင့်တော့ အဲဒီ စကားစုထဲက ဝေါဟာရ တခုခြင်းရဲ့ မူလအဓိပ္ပာယ်ကို ရှာဖွေပြီး တခုလုံးကို ပေါင်းစပ် ယူမှရပါတယ် ... ဒီတော့ ဒီစကားစုရဲ့ အဓိပ္ပာယ် ကို ကြည့်မယ်ဆိုရင် ...
"ဥဒါန်း" ဆိုတာ ပါဠိသက် စကားပါ ... ပါဠိသက်ဝေါဟာရ အဘိဓါန်ထဲမှာ ဥဒါန်းရဲ့ အဓိပ္ပာယ် နှစ်မျိုး ဖော်ပြထားပါတယ် ...

ပထမအဓိပ္ပာယ်က 'ဝမ်းမြောက်ခြင်းကြောင့် မြွက်ဆိုကျူးရင့်သောစကား၊ ပီတိအဟုန်ကြောင့် ထွက်လာသောစကား' လို့ အဓိပ္ပာယ်ရပါတယ် .... "ဥဒါန်းကျူးတယ်" ဆိုတာ ဒီအဓိပ္ပာယ် ဖြစ်ပါတယ်။ မြတ်စွာဘုရားရှင်တို့ သဗ္ဗညုတဉာဏ်တော်ကို ရရှိလို့ ဘုရားအဖြစ်ရောက်ပြီဆိုရင် "အနေကဇာတိ သံသာရံ ... " အစချီတဲ့ ဥဒါန်းဂါထာတော်ကို ကျူးရင့်ကြမြဲဖြစ်ပါတယ် ... ကြုံလို့ပြောရရင် ဥဒါန်းကျူးရင့်ခြင်း ဆိုတဲ့ အဓိပ္ပာယ်နဲ့ သုံးစွဲတဲ့အခါ (အသံမထွက်ဘဲ) စိတ်ထဲမှာပဲ ကျူးရင့်တဲ့ "မနသာဥဒါန်း" နဲ့ (အသံထွက်ပြီး) နှုတ်ကထုတ်ဖော်ကျူးရင့်တဲ့ "ဝစသာဥဒါန်း" ဆိုပြီးရှိပါတယ်။ ဒီ "အနေကဇာတိ သံသာရံ ... " အစချီတဲ့ ဥဒါန်းဂါထာတော်ကတော့ စိတ်ထဲကသာ ကျူးရင့်တဲ့ မနသာဥဒါန်း ဖြစ်ကြောင်း မှတ်သားဖူးပါတယ်။

ဒုတိယအဓိပ္ပာယ်က 'အစဉ်အလာပြောစမှတ်ပြုရမည့်စကား' လို့ အဓိပ္ပာယ်ရပါတယ် .... "ဥဒါန်းမကျေ" ဆိုတာ ဒီအဓိပ္ပာယ် ဖြစ်ပါတယ်။ "ရှည်လျားသက်သေ၊ ကမ္ဘာကြေလည်း၊ မကျေတို့ဘဲ၊ ဥဒါန်းစွဲလျက် ... " (သခင်ကြီးဧချင်း)၊ "ကမ္ဘာကျွန်းလည်း၊ ဥဒါန်းမကျေ၊ ထွန်းရစ်စေလိမ့် ... " (ဥမ္မာဒန္တီပျို့)

ဒါဆို "ဥဒါန်း" ဆိုတဲ့ စကားဟာ တစုံတခုကို ဝမ်းမြောက်ကျူးရင့်ခြင်း ဆိုတဲ့ သဘောရတဲ့ အဓိပ္ပာယ်ရော၊ အစဉ်အလာမှတ်သားရမည့်စကား ဆိုတဲ့ အဓိပ္ပာယ်ရော နှစ်မျိုးလုံး သုံးလို့ရကြောင်း သိသာမြင်သာ လောက်ပါပြီ။ ဒီစကားစုမှာတော့ ဒုတိယအဓိပ္ပာယ်ဖြစ်တဲ့ 'အစဉ်အလာပြောစမှတ်ပြုရမည့်စကား' ဆိုတဲ့ အဓိပ္ပာယ်နဲ့ သုံးစွဲထားကြောင်း သခင်ကြီးဧချင်းနဲ့ ဥမ္မာဒန္တီပျို့ တို့မှာ ရေးထားတဲ့ အထောက်အထားတွေ အရ သိရှိနိုင်ပါတယ်။
ဥဒါန်း ဆိုတဲ့စကားပြီးတော့ "ကျေ" နဲ့ "ကြေ" ကို ဆက်ကြည့်ပါမယ်။ ကျေ နဲ့ ကြေ အသုံးကို သိချင်ရင် မြန်မာစာလုံးပေါင်း သတ်ပုံကျမ်းနဲ့ မြန်မာအဘိဓာန် မှာ တွေ့နိုင်ပါတယ်။ ဒီနေရာမှာ ...
"ကျေ" ဆိုတာ ကျေပျက်ပျောက်ကွယ် သွားခြင်းကို ဆိုလိုပါတယ် ...
"ကြေ" ကတော့ မှုန့်မှုန့်ညက်ညက် ကြေမွပျက်စီး သွားခြင်းကို ဆိုလိုပါတယ် ...

ဒီတော့ ဒီစကားစု တခုလုံးရဲ့ ဆိုလိုရင်း အဓိပ္ပာယ်ကို ခြုံငုံပြီး သုံးသပ်ဖွင့်ဆိုရမယ်ဆိုရင် ...
ကမ္ဘာကြေသော်လည်း = ကမ္ဘာကြီး တခုလုံး ကြေမွပျက်စီးသွားရင်တောင်မှ
ဥဒါန်းမကျေ = အစဉ်အလာပြောစမှတ်ပြုရမည့်စကား (ဥဒါန်း) ဟာ ကျေပျက်ပျောက်ကွယ် မသွားနိုင်ဘူး လို့ ဆိုလိုရင်းဖြစ်ပါတယ်။ (ဥဒါန်းကျူးရင့်မှု ပျောက်ပျက်မသွားဘူးလို့ မယူဆနိုင်ပါဘူး။)

ဒါကြောင့် ဒီစကားစု တခုလုံးဟာ "ကမ္ဘာကြီး တခုလုံး ကြေမွပျက်စီးသွားရင်တောင်မှ အစဉ်အလာပြောစမှတ်ပြုရမည့်စကား (ဥဒါန်း) ဟာ ကျေပျက်ပျောက်ကွယ် မသွားနိုင်ဘူး" လို့ ဆိုလိုကြောင်း တင်ပြလိုက်ပါတယ် ...

မေတ္တာဖြင့် ...
ဟယ်ရီ

Read More...

Tuesday 2 August 2011

မြစ်ကော

မြစ်မကောအောင်လို့၊
သစ်တောတို့ စိမ်းရပေမည်။

ရေဝေတောတွေ ဆိုင်းစို့စို့၊
မှိုင်းညို့ညို့မှုန်ရီ။

ချင်းတွင်းနှင့်ဧရာဝတီ၊
ရေပြာကြည်သမျှ မြန်မာ့သွေးဟေ့။

တတောလုံးပြောင်၊
တတောင်လုံးလင်း၊
မြစ်ကျဉ်းကာသောင်တွေပေါ်တော့၊
နောင်အရှည်မမျှော် မြန်မာပျောက်အောင်လို့၊
ကိုယ့်သွေးကို ကိုယ်ပြန်သောက်နေကြ၊
စိုးကြောက်ဖွယ် အပြစ်သဘောနဲ့၊
မြစ်ကောမယ့်နေ့။ ။

မောင်စိန်ဝင်း (ပုတီးကုန်း)

Read More...

Friday 29 July 2011

ကြယ်ကြွေမိုး

စပယ်တွေ၊
တကယ်ကြွေကြပြီပေါ့၊
ကြယ်ချွေညဆိုး။

ရင်ခွင်မှာ၊
မြင်မြင်ရာ မိုးတွေက၊
တွင်တွင်ရွာ ဖြိုးနေမြဲပါပဲ၊
ညှိုးကြွေဆဲ စိတ်အစဉ်မှာ၊
အရိပ်ထင်လာ အိပ်မက်ဆိုးသာပေါ့၊
သြော် ... တိမ်ထက်မိုးမှာ ပျော်ပါမေရယ်၊
မျှော်ကာဖွေ တထောင့်ကွယ်က၊
စောင့်မယ်လေ စပယ်တွေပျိုးပါလို့၊
မောင့်ကြယ်ကြွေမိုး။ ။


ညီလေး John (John Yoharmar) အတွက် ....
မိုးတွေစဲပါစေတော့ ညီလေးရေ ...

မေတ္တာဖြင့် ....
အကိုဟယ်ရီ

Read More...

Friday 1 July 2011

အာဇာနည် စာဆိုအကျော် ဆီးဘန်နီ (ဆီးပန်းနီ) ဆရာတော် ၏ ပါတော်မူတမ်းချင်း

သိင်္ဃတန်ဆောင်၊ ဘုန်းတော်မှောင်၍၊
ကုန်းဘောင်နေမီး၊ မထိန်ညီးက၊
တိုင်းကြီးပြည်ကြီး၊ အချည်းနှီးလျှင် (တည့်)၊
ထီးသုဉ်း နန်းသုဉ်း၊ မြို့သုဉ်းသုည၊
သုဉ်းသုံးဝဖြင့်၊ သုဉ်းရပြန်လစ် (သုညရလစ်)၊
သုညခေတ်ဝယ်၊ ဖြစ်လာရလေ၊
ဒို့တတွေသည် ...
သေသော်မှတည့် သြော် ကောင်း၏ ... ။

ဒီ လင်္ကာပိုဒ်လေးကို အားလုံး သိကြမယ်လို့ ထင်ပါတယ်။ ဆီးဘန်နီ (ဆီးပန်းနီ) ဆရာတော်ရဲ့ အလွန်ကျော်ကြားတဲ့ ကဗျာလင်္ကာ စာသားတွေဖြစ်ပါတယ်။ တကယ်တော့ ဒီစာသားတွေဟာ ဆရာတော်ကြီးရေးခဲ့တဲ့ “ပါတော်မူတမ်းချင်း” ရဲ့ အချပါဒ တွေပဲဖြစ်ပါတယ်။

ဒီ အချပိုဒ်တွေကိုပဲ လူသိများပြီး မူရင်း “ပါတော်မူတမ်းချင်း” အပြည့်အစုံကို လူသိနည်းပါးတဲ့အပြင် ရှာဖွေရခက်တာမို့ အားလုံးသိရအောင် မျှဝေလိုက်ပါတယ်။ အလျဉ်းသင့်တဲ့အတွက် ဆီးဘန်နီဆရာတော်ကြီးအကြောင်းကိုပါ တပါတည်း အနည်းငယ် တင်ပြပါရစေ ...

ဆီးဘန်နီ နှင့် ဆီးပန်းနီ
ဆီးဘန်နီဆရာတော်ကို ဆီးပန်းနီ ဆရာတော် လို့လည်း ရေးကြပါတယ်။ ကဗျာသင်္ဂဟ မေဒနီကျမ်းထဲမှာတော့ ဆီးဘန်နီ ဆရာတော် လို့ ဖော်ပြပါရှိပြီး မြန်မာ့စွယ်စုံကျမ်း၊ အတွဲ-၄၊ အပိုင်း(က) မှာတော့ ဆီးပန်းနီဆရာတော်လို့ ဖော်ပြပါတယ်။ ကျနော်တို့ ငယ်ငယ်က သင်ရတဲ့ မြန်မာကဗျာလက်ရွေးစင်ထဲမှာတော့ ဆီးဘန်နီဆရာတော်လို့ ပါရှိပါတယ်။


ဆရာတော်၏ ထေရုပ္ပတ္တိအကျဉ်း
ဆီးဘန်နီဆရာတော်ကို အနောက်မင်းကွန်းဆက်၊ မြန်မာသက္ကရာဇ် ၁၁၇၃-ခုနှစ် ပြာသိုလပြည့်ကျော် ၁-ရက်၊ စနေနေ့ မှာ ဖွားမြင်ပါတယ်။ ခမည်းတော်က အမရပူရ ပထမမြို့တည်နန်းတည် ဘိုးတော်မင်းတရားကြီးလက်ထက် အတိုင်ပင်ခံ အမတ်ကြီး မဟာရာဇသင်္ကြံ ဖြစ်ပါတယ်။ မယ်တော်ရဲ့ အမည်ကိုတော့မသိရပါ။ ငယ်နာမည် မောင်မှော် လို့ ခေါ်တွင်ပါတယ်။ ရတနာပူရ စတုတ္ထမြို့တည်နန်းတည် ဘကြီးတော်ဘုရား (စစ်ကိုင်းမင်း) လက်ထက်မှာ စလင်း မင်းသားကြီး ဆရာတော်နဲ့ မြသိန်းတန်ဆရာတော် တို့ထံမှာ ကျောင်းသားဘဝကနေ ရှင်သာမဏေဘဝအထိ နည်းခံသင်ကြားခဲ့ပါတယ်။ သာမဏေဘွဲ့ကတော့ ရှင်နရိန္ဒ ဖြစ်ပါတယ်။
ဆရာတော်ဟာ ပိဋကတ်စာပေပညာမှာ အလွန်ပဲ ထူးချွန်ထက်မြက်လှတဲ့အတွက် ကျောင်းသားအဖြစ်နဲ့ တကြိမ်၊ သာမဏေအဖြစ်နဲ့ နှစ်ကြိမ်၊ ပေါင်းသုံးကြိမ်တိတိ ပထမစာတော်ပြန်ပွဲမှာ ငယ်စဉ်ကတည်းက ဝင်နွှဲပြန်ဆို အောင်မြင်တော် မူပါတယ်။
ရဟန်းအဖြစ်ကိုရောက်ပြီးတဲ့နောက် ရွှေဘိုမင်းနှင့် ပုဂံမင်းတို့ လက်ထက်၊ အမရပူရမြို့ မိုးထိတိုက်မှာ နေထိုင်ပြီး ပြည်ဆရာတော်ဘုရားကြီးနဲ့ မိုးထိဆရာတော် ဘုရားကြီးတို့ထံမှောက်မှာ ဆက်လက် ပညာဆည်းပူးတော်မူပါတယ်။
ဒီလိုနဲ့ ဆရာတော်ဟာ ပိဋကတ်စာပေပညာမှာ ပါရဂူရောက် ထူးချွန်တတ်မြောက်တဲ့အတွက် ပဉ္စမသင်္ဂါယနာတင် ဘဝရှင် မင်းတုန်းမင်းတရားကြီး လက်ထက်မှာ ‘နရိန္ဒာဘိသီရိ သဒ္ဓမ္မဓဇ မဟာဓမ္မရာဇာဓိရာဇဂုရု’ ဆိုတဲ့ ပထတံဆိပ်တော်၊ ‘နရိန္ဒာဘိသီရိသဒ္ဓမ္မဇောတိပါလဓဇ မဟာဓမ္မရာဇာဓိရာဇဂုရု’ ဆိုတဲ့ ဒုတိယတံဆိပ်တော်တို့ကို ခံယူရရှိသည်။ (မှတ်ချက် - မြန်မာ့စွယ်စုံကျမ်း အတွဲ ၄ မှာ ဒီဘွဲ့ ၂-ခုကို ဖော်ပြရာမှာ ‘နရိန္ဒာဘိသီရိသဒ္ဓမ္မဇောတိပါလဓဇ မဟာဓမ္မရာဇာဓိရာဇဂုရု’ ဆိုပြီး တခုတည်းဖြစ်နေပါတယ်။ ‘... သတိချွတ်ဟန်တူ၏ ...’ လို့ ဆရာကြီး နန်းညွန့်ဆွေ ရေးသားတဲ့ ဆောင်းပါးမှာ ပါရှိပါတယ်။) ပဉ္စမ သင်္ဂါယနာ တင်တဲ့အခါမှာလည်း ပိဋကတ်သုံးပုံကို သုတ်သင်ကြီးကြပ်တည်းဖြတ်တော်မူခဲ့ပါတယ်။ သားတော် သီပေါမင်းလက်ထက်ရောက်တော့လည်း ‘နရိန္ဒာဘိဓဇ အတုလိဓိပတိ သီရိပဝရ မဟာဓမ္မရာဇာဓိရာဇဂုရု’ ဆိုတဲ့ တတိယ ဘွဲ့တံဆိပ်တော်ကို ခံယူတော်မူရပြန်ပါတယ်။
ဆရာတော်ဟာ ကဗျာလင်္ကာဖွဲ့ဆိုမှုမှာလည်း လေ့လာကျွမ်းကျင်တော်မူပါတယ်။ ‘ကဝိမဏ္ဍနမေဒနီကျမ်း’ ကို ရဟန်းဝါတော် တစ်ဆယ်ကျော်လောက်ကစပြီး တဖြည်းဖြည်း တစတစ ရေးသားပြုစုတော်မူခဲ့ရာမှ ဆရာတော် ရေးသား ခဲ့တဲ့ စာပေတွေကို ဆရာတော်ဘုရား၏ မြေးတော် ဦးကလျာဏက စနစ်တကျ စီစဉ်ပြီး မန္တလေးမြို့ ဆိုင်းတန်းရပ် ရတနာသိဒ္ဓိ ပုံနှိပ်တိုက်ကနေ ၁၂၆၉-ခု ကဆုန်လက ပုံနှိပ် ထုတ်ဝေခဲ့ဖူးတယ်လို့ သိရပါတယ်။
မင်းတုန်းမင်းတရားကြီး မန္တလေးရွှေမြို့တော်ကြီးကို မြို့သစ်တည်ထောင်တဲ့အခါမှာလည်း ရပ်ကွက်အမည်တွေကို ရွေးချယ်ပေးခဲ့ပါတယ်။ ပြည်ကြီးကျက်သရေ၊ ပြည်ကြီးပျော်ဘွယ်၊ ကျွန်းလုံးဥသျှောင်၊ ချမ်းမြသာစည်၊ ပတ်ကုံးဝန်းကျင်၊ မဟာနွယ်စဉ်၊ ပုလဲငွေရောင် စတဲ့ ၄၉-ရပ်ကွက်တို့ရဲ့ အမည်တွေဟာ ဆရာတော်ပေးခဲ့တာဖြစ်ပါတယ်။
ဆရာတော်ဟာ သက်တော် ၇၇-နှစ်၊ ဝါတော် ၅၇-ဝါ၊ သက္ကရာဇ်-၁၂၅ဝပြည့်၊ ကဆုန်လပြည့်ကျော် ၁-ရက် ဗုဒ္ဓဟူးနေ့မှာ ဘဝနတ်ထံ ပျံလွန်တော်မူပါတယ်။


ပါတော်မူတမ်းခြင်း
သီပေါမင်းတရား ပါတော်မူသွားတဲ့အခါ ဆရာတော်ဟာ လွန်စွာမှပဲ စိတ်လက် မရွှင်မလန်း၊ မချမ်းမမြေ့ ခံစားခဲ့ရပါတယ်။ တရားတော်နဲ့ ဖြေလည်း မပြေ၊ လျစ်လျူရှုပြီးလည်း မနေတတ်၊ မျက်မှောက်တွင် တွေ့ကြုံရှုမြင်နေရတဲ့ အဖြစ်အပျက်တွေ ကလည်း အမျိုးသားစိတ်ဓါတ်ကို ရိုက်ခတ်လာတာနဲ့အမျှ အဗျာကတာဓမ္မာနှင့်ဝေးပြီး ဒေါသရိပ်ကလေးများ ပြေးလာပါတယ်။ ဒါကြောင့်ပဲ မြန်မာဦးစွန်း ညှိုးနွမ်းတိမ်မြုပ်ခြင်းအကြောင်းကို သံဝေဂရတု ဧကပိုဒ် အဖြစ် ဖွဲ့ဆိုလိုက်ပါတယ်။ ကဗျာသင်္ဂဟမေဒနီ ကျမ်းနဲ့ အခြားစာတွေမှာတော့ တမ်းချင်းအဖြစ် ဖော်ပြကြပါတယ်။ ဒီတမ်းချင်းကတော့ ...
မြန်မာဦးစွန်း ညှိုးနွမ်းတိမ်မြုပ်ခြင်းအကြောင်းကို ဆီးဘန်နီ ဆရာတော်ဘုရား ဆို ဧကပိုဒ် တမ်းချင်း။

မှတ်ပါရစ်စေ၊ မှာခဲ့ပေအံ့၊ သံဝေဓမ္မ၊ ယူကုန်ကြလော့၊ သုဒဿန၊ မြို့မသခင်၊ သူရာစင်လျက်၊ လုလင်မာဃ၊ ဦးစောက်ချ၍့၊ အမရဝတီ၊ ပူရီပြဉ်လုံး၊ လက်ရကျုံးသို့၊ ထုံးနှင့်တူလစ်၊ ဂေါဇာခေတ်မူ၊ ဧက်ဒွေးဇောသတ်၊ လမြတ်ထွန်းပြောင်၊ တန်ဆောင်မါသ၊ သရဒ၏၊ ကဏှပက္ခ၊ ဆဋ္ဌပူးရက်၊ နေဝန်းထွက်အောင်၊ ရှစ်မျက်လောကဓာတ်၊ ကောင်းကင်ရပ်မှ၊ ပြာသာဒ်ကုဋေ၊ ကြယ်ကျွတ်ကြွေရှင့်၊ နေတဘန်ထွက်၊ သတ္တရက်ဝယ်၊ လက်နက်လျှံထိန်၊ စွဲကိုင်ချိန်သား၊ ဣန္ဒြိယတိုင်းသား၊ ရဲ့ယောက်ျားတို့၊ ပတ္တမြားခယံ၊ ရွှေနန်းရံသို့၊ ချွံချွံဝင်ရောက်၊ ရှစ်ရက်မြောက်က၊ အနောက်ဂေါရာ၊ နေဝါလျှောသက်၊ ဂဠုန်ရက်တွင်၊ သုံးချက်ကျော်ပြီ၊ ဒွါဒသီဝယ်၊ မှီသည်ဗြိစ္ဆာ၊ ဂရုဠှာမှတ်၊ အစွန်မြတ်မှ၊ ပူးနတ်ဓနု၊ ရာဟုစန္ဒာ၊ သိဟ်သီဟာဝယ်၊ ဗြိစ္ဆာကံနေ၊ နဂါးမြွေလည်း၊ မေဓုန်ပျော်လျက်၊ ပြိဿလဂ်တွင်၊ နက္ခတ်စဉ်ရုံး၊ ဆယ်လုံးတပါဒ်၊ လေးမှတ်ဗီဇနာ၊ ဖွားလာရက်ချိန်၊ ရွေ့ရွေ့ထိန်သား၊ သုဒ္ဓိန်နှစ်ရာ၊ နောဝီသာ၌၊ မြန်မာဘုရင်၊ ဇာတာပြင်လည်း၊ မစင်သန့်ကြိုက်၊ နိစ်ပြဆိုက်လျက် (နိစ်ပြဆိုက်က)၊ မှားမိုက်လှစွာ၊ ကိုယ့်မှီရာကို၊ ကိုယ်သာဖျက်ဆီး၊ ဖိကာစီးသည်၊ မတ်ကြီးဉာဏ်ဝယ် (မှူးကြီးမတ်ငယ်)၊ မာလောနွယ်တို့၊ (ဝှက်)ရှက်ကွယ်လှည့်ဝိုက်၊ သူ့ဘက်လိုက်၍့၊ စရိုက်စောင်းငဲ့၊ သစ္စာမဲ့ကြောင့်၊ နှစ်ဆဲ့ခုနစ်၊ နန်းစံရှစ်တွင်၊ ကသစ်ဘုံနေ၊ သိကြားကြွေသို့၊ ချက်ရွှေသိုရာ၊ မန်းပြည်သာမှ၊ မဟာဣန္ဒြိယ၊ မိုက်မဲလှသည်၊ (မိစ္ဆာမောဟ၊ ပြွမ်းပြွမ်းထသည့်) ကုလာ့နိုင်ငံ၊ လွှဲပြောင်းစံရှင့်၊ လောကဓံအရ၊ သဘာဝကြောင့်၊ ဂေါတမဘုန်းခေါင်၊ သာနာရောင်လည်း၊ မပြောင်မထွန်း၊ အမှောင်စွန်းခဲ့၊ ကျွန်းသပြေဒီ၊ ဓရဏီထက်၊ ခိုမှီနေရိုး၊ မြန်လူမျိုးတို့၊ လန့်နှိုးထိပ်လှ၊ သံဝေဂဖြင့်၊ ဖြစ်ကပျက်မြဲ၊ မလွဲစသာ၊ ကြုံကြလာသား၊ သံသရာသဘော၊ တွေ့ရာသောဟု၊ စိတ်ဇောသိမ်မွေ့၊ တတေ့တေ့ဖြင့်၊ စေ့စေ့မှန်သား၊ ထပ်ထပ်ပွား၍့။ ။ တရားသံဝေယူကြလေ။ ။
(ကွင်းအတွင်းစာသားများမှာ ဆရာကြီး နန်းညွန့်ဆွေ ၏ ၁၉၆၁-ခုနှစ် နိုဝင်ဘာလ ထုတ် ရှုမဝမဂ္ဂဇင်းပါ ဆီးပန်းနီဆရာတော် ဆောင်းပါးမှ ကောက်နှုတ်ထားသော မူကွဲများဖြစ်ပါသည်။)

ဒီအထဲက ‘မိုက်မှားလှစွာ၊ ကိုယ့်မှီရာကို၊ ကိုယ်သာဖျက်ဆီး၊ ဖိကာစီးသည်၊ မတ်ကြီးဉာဏ်ဝယ် (မှူးကြီးမတ်ငယ်)၊ မာလောနွယ်တို့’ ဆိုတဲ့အပိုဒ်ဟာ လူကြိုက်များလာပါတယ်။ မှူးကြီးမတ်ရာတွေက ကိုယ့်အမှီသဟဲ ရှင်ဘုရင်ကို ကိုယ့်ဟာကိုယ် ပြန်ဖျက်ဆီးတယ် ဆိုတဲ့ သဘောရပါတယ်။ အဲဒီအချိန်က “ဦးကောင်းလိမ်ထုတ်၊ သီပေါပြုတ်” ဆိုပြီး ကင်းဝန်မင်းကြီး ဦးကောင်း လ်ိမ်ဉာဏ်ဆင်ပြီး မြန်မာဘုရင်ကို နန်းချတယ်လို့ လူအများက ပြောဆိုပြစ်တင်နေကြတဲ့ အချိန် ဖြစ်ပါတယ်။ ဆရာတော်ကလည်း မြန်မာဝန်ကြီး မှူးကြီးမတ်ရာတွေ ဂိုဏ်းဂဏအသီးသီးကွဲပြီး ထင်ရာစိုင်းနေကြပုံ၊ အာဏာရှိသူကိုပဲ မျက်နှာလိုမျက်နှာရ ကပ်ပါးရပ်ပါးပြုမူနေကြပုံ စတဲ့ အချင်းအရာတွေကိုမြင်ပြီး စိတ်ပျက်ပျက်နဲ့ ရေးလိုက်ပုံရပါတယ်။ ဒီစာဟာ ကင်းဝန်မင်းကြီးကို အတော်ကလေး ထိခိုက်သွားပုံရပါတယ်။ ဒါကြောင့် ကင်းဝန်မင်းကြီးက “မန်းမကိုဋ်မှာမှ ...” အစချီတဲ့ လေးချိုးကြီးနဲ့ ပြန်လည်ချေပပါတယ်။ ကဗျာသင်္ဂဟမေဒနီ ကျမ်းထဲမှာတော့ မဟာဒါဏ်ဝန်မင်း ဦးရွှေဝ က ပြန်လည်ချေပရေးသားတဲ့ လေးချိုးကြီးလို့ ဖော်ပြထားတာကြောင့် ဒီကျမ်းကိုပဲ မူတည်ပြီး မဟာဒါဏ်ဝန်မင်း ဦးရွှေဝဆို လေးချိုးကြီး အဖြစ် ဖော်ပြလိုက်ပါတယ်။ (ဒီလေးချိုးကြီး ရေးစပ်ပုံကို ရှေးရိုးလေးချိုးကြီး၊ ဒါမှ မဟုတ် လင်္ကာသွားပုံစံနဲ့ ရေးစပ်တဲ့အတွက် လင်္ကာလေးချိုးကြီး လို့လည်း ခေါ်ပါတယ်။ မြန်မာကဗျာ ရေးထုံးတွေကို စိတ်ဝင်စားသူများအတွက် ကျနော် ရေးထားတဲ့ “မြန်မာကဗျာဆိုတာ ဂျို(ချို)နဲ့လား (၁၅)” (http://harrylwin.blogspot.com/2009/05/blog-post_08.html) မှာ အသေးစိတ် ဖော်ပြထားပါတယ်။ ဒီအထဲက ကာရန်ယူထားပုံတွေကို ခြင်္သေ့လည်ပြန် နဘေစပ်နည်း လို့ ခေါ်ပါတယ် - စကားချပ်)

ဆီးဘန်နီ ဆရာတော်ဘုရား ဆို မှတ်ပါရစ်စေ-ချီ ဧကပိုဒ် တမ်းချင်းကို ချေဆိုရာဖြစ်သော မဟာဒါဏ်ဝန်မင်း ဦးရွှေဝဆို လေးချိုးကြီး။

မန်းမကိုဋ်မှာမှ၊ နန်းသိုက်ရ ရွှေဘုံကို၊
မြေဝသုန်ကပ်ဆုံးအောင်ပ၊ မှတ်ထုံးနောင်ပေါ်ထွန်းဘို့၊
မော်ကွန်းတင်ဆက်တဲ့ မင်ရွက်စာ။

သမ္မတနှုန်းဆောင်၊ ရွှေဘုန်းငယ်ပြောင်သည့် ကုန်းဘောင်ပဝရ၊
နေသမ္ဘိန်ငယ် အာဟိန္ဒမှ၊ ဝံသလှစ်စေ၊ ဆယ်ဆက်နေလျှင်၊
မြေဇမ္ဗူစိုး၊ မြို့နန်းငယ်ထူသည် ရိပ်ဖြူမိုးက၊
ရှေးရိုးစဉ်ဆက်၊ ထုံးမပျက်၍့၊ နှုန်းဘက်ကယ်စံမကွာ၊ ဘုန်းအာဏာဖြင့်၊
ရေစာမရှား၊ မိစ္ဆာရာန်ငယ် မာန်မထား၍့၊ ဖြစ်ပွားသာသနာ၊ ပွင့်လင်းသာဖြာတော့ပ၊
ရေကြာတွေ့ ပုံတူလို၊ များဗိုလ်လူရှင်ရဟန်းငယ်တို့၊ နိဗ္ဗူ စိတ်ယူမှန်းရှာကြ၊
ချမ်းမြကြည်စွာ။

ဆဲ့တဖြာငယ်၊ နေအာဒိစစ် ဘ-ရာစိုးသည့်၊ ဖြူစင်လှစ်က၊
အနှစ်ပညာ၊ အရှင်းကွာ၍့၊ စဉ်လာမင်းသုံး၊ ရှေးကျင့်ထုံးကို၊ လုံးလုံးပစ်လွှဲ၊
ငွေနှင့်မြှူလျှင် လူပေပဲဟု၊ စိတ်စွဲမှတ်ကျုံး၊ တိုင်းအလုံးကို၊ ဈေးနှုန်းနှင့်ထပ်၊ အမွေအပ်သော်၊
မကပ်တရား၊ ရှေ့ဆောင်နွားကြောင့်၊ နောက်နွားတဝိုက်၊ လမ်းကောက်လိုက်သို့၊
အမိုက်ဖြင့်ပြွမ်း၊ လူရဟန်းတို့၊ မချမ်းမသာ၊ ရေစာမွတ်ရှား၊ ခိုးသားမုဒိမ်း၊ တရားမမှန် ကျင့်ဖောက်ပြန်သဉ်၊
ရာန်မငြိမ်း၍့၊ ကိန်းနှင့်တမျှ။ ကောသလ၏့၊ သောဠသ-စာ၊ ဤရာဇာကို၊
မြတ်စွာရှင်စောက၊ ဟောမြွက်ဘိ။

စိန္တေငယ်ထွဋ်ဖျား၊ မိန့်တော်ထားသည်၊ ထင်ရှားရှိလျက်၊ မည်သူတွက်ဟု၊ ငဲ့ကွက်ပစ္ဆာ၊ မတင်သာတည့်၊ ဂေါဇာနှစ်တုံ၊ ဂဠုန်နှင့်ကျား၊ ဆင်နဂါးတို့၊ ပျော်ပါးစဉ်ပ၊ ကြာငါးစုံဝယ် ကြိုင်ထုံခသည့်၊ လ-ကျတ္ထိကာ၊ ပုဏ္ဏာကျော်တက်၊ ဆဋ္ဌရက်တွင်၊ ထက်အာကာကြီး၊ လေခရီးမှာ၊ မီးလျှံသဘွယ်၊ ဥဂ္ဂါကြယ်တို့၊ သွယ်လှယ်ကူးလတ်၊ တိထီသတ်ဘွင့်၊ဖြတ်ရွှေနန်းတွင်း၊ ရာန်စစ်ချဉ်း၍့၊ မင်းကိုကိုင်မြောက်၊ ရှစ်ရက်ရောက်မှ၊ အနောက်ဂေါရာ၊ နေဝါလျှံလန်း၊ မှောင်ချိန်ယွန်းဝယ်၊ မြန်းဇမ္ဗူလုံး၊ ကံမထူသည် ရာန်သူမှုန်း၍၊ ကိုင်းလုံးပြစ်ခွာ၊ သူဆောင်ရာသို့၊ ပါရှာတော့ပ၊ သင်္ခါရဖြစ်ပုံကို၊ စိတ်အာရုံ- ထင်နောငယ်နှင့်၊ စောတော့ဉာဏ်ရှိ။ ။

(‘ဆီးဘန်နီဆရာတော်၏ မြေး ဦးကလျာဏ ကိုယ်တိုင်က ကင်းဝန်မင်းကြီးရေးသည်ဟု မှတ်သားထားသည်’ လို့ဆရာကြီး နန်းညွန့်ဆွေရဲ့ ၁၉၆၁-ခုနှစ် နိုဝင်ဘာလ ထုတ် ရှုမဝမဂ္ဂဇင်းပါ ဆောင်းပါးမှာ ဖော်ပြထားပါတယ်။)

ဒီလေးချိုးကြီးမှာ ကောသာလ၏ သောဠာသ-စာ လို့ပါတဲ့အတိုင်း မှူးမတ်တွေရဲ့ အပြစ်မဟုတ်ဘဲ ကောသလအိမ်မက် ၁၆-ချက်အရ ခေတ်ကြီးဟာ ဖောက်ပြန်တဲ့ခေတ်ဖြစ်ကြောင်း၊ ရှေးထုံးကို ပယ်ပြီး ရှေ့ဆောင်နွားလား အကောက် သွားလို့ နောက်နွားစဉ်ဆိုက် လမ်းကောက်လိုက်ကြပုံ၊ ပျက်ချိန်ကျပြီမို့ ကောင်းကင်နက္ခတ်တာရာတွေ ဖောက်ပြန်နေကြပုံ တွေကို တွေးဆကြည့်ရင် ပျက်ချိန်တန်၍ ပျက်ရကြောင်း စသည်ဖြင့် ချေပ ရေးသား ထားတာကို တွေ့ရပါမယ်။
ဒါကြောင့် ဆရာတော်က တဖန် ထပ်ပြီး ဒီလေးချိုးကြီးကို ချေပဖြေဆိုတဲ့ တမ်းချင်းဧကပိုဒ်လင်္ကာကို ထပ်ရေးသား လိုက်ပါတယ်။

ဆီးဘန်နီ ဆရာတော်ဘုရား ထပ်မံ၍ ဆိုတော်မူပြန်သော ဧကပိုဒ် တမ်းချင်း။

တဖန်မှတ်စေ၊ ထပ်၍ဖြေပိမ့်၊ သံဝေရမှု၊ ရှေးကပြုသည်၊ ရတုဖိုးထိုက်၊ ဧကပိုဒ်ကို၊ လိုက်၍ဖြေပေ၊ ဉာဏ်ကဝေတို့၊ ဖြစ်လေရှေးက၊ ကောသလ၏၊ သောဠသဇာတ် (သုဝိန္နဇာတ်)၊ အတ္ထုပ္ပတ်နှင့်၊ သတ္တဝါ့ကြမ္မာ၊ သင်္ခါ(ရ)တရား၊ နွားလားရှေ့ဆောင်၊ ပမာမြှောင်လျက်(၍့)၊ မင်းခေါင်ကိုသာ၊ ပြစ်ရှာဖန်ဖန်၊ ဆိုပြန်ဘိဘိ၊ ထိထိပါးပါး၊ စကားဖောက်လှဲ၊ ကိုယ်ကိုလွှဲလည်း၊ မလွှဲစသာ၊ ဤအရာဝယ် (မှာ)၊ ပမာထင်ထင်၊ ကဗျာတင်က(မူ)၊ ပေါက်ပင်ကိုင်းငြိတ်၊ ဗျိုင်းနိမိတ်ကို၊ ဖိုလ်ဟိတ်ခတ်(စပ်)ကာ၊ စပ်(ဟတ်)၍ရှာမူ၊ သတ္တဝါဘူဇဂ၊ ချင်းမူလဟု (ချင့်မူလကို)၊ သိရသောနှယ်၊ မလွတ်ဘွယ်တည့်၊ နွယ်မာလောညွန့်၊ ဆင်ခြေကွန့်လည်း၊ မလွန့်မသာ (မလွန့်စသာ)၊ အကြောင်းမှာကား၊ (ရွယ်)ငယ်စွာနုမြစ်၊ ကြလိုမျှစ်သို့၊ မြေးမြစ်အလား၊ မင်းနှစ်ပါးတို့၊ တိုင်းကားနှင်းထပ်၊ ကိုယ်ကိုအပ်၍၊ ပညာတ်စေကြောင်း၊ မှူးမတ်ပေါင်းအား၊ ဆိုးကောင်းအရေး၊ လွှဲဝေပေးလျက် (လွှဲအပ်ပေးလျက်)၊ တရွေးတရတီ၊ တဗီဇဝါ (တဗီဇနာ)၊ တမြူလွှာမျှ၊ ရသာအထူး၊ ဂုဏ်ကျေးဇူးကို (သည်)၊ မှူးမတ်ထံမှ၊ မခံရရှင့်၊ သိင်္ဃတန်ဆောင်၊ ဘုန်းတော်မှောင်၍၊ ကုန်းဘောင်နေမီး၊ မထိန်ညီးက၊ တိုင်းကြီးပြည်ကြီး၊ အချည်းနှီးလျှင် (တည့်)၊ ထီးသုဉ်း နန်းသုဉ်း၊ မြို့သုဉ်းသုည၊ သုဉ်းသုံးဝဖြင့်၊ သုဉ်းရပြန်လစ် (သုညရလစ်) [သုဉ်းနှင့်ရလစ်]၊ သုညခေတ်ဝယ်၊ ဖြစ်လာရလေ၊ ဒို့တတွေသည်၊ သေသော်မှတည့် သြော် ကောင်း၏ ... ။

မှတ်ချက်။ ။ လက်သည်းကွင်း (..) အတွင်းစာသားများမှာ ကဗျာသင်္ဂဟမေဒနီ ကျမ်းပါ စာသားများဖြစ်ပါသည်။ ထောင့်ကွင်း [..] အတွင်းရှိ စာသားမှာ မြန်မာ့စွယ်စုံကျမ်း၊ အတွဲ-၄ တွင်ဖော်ပြထားသော မူကွဲ ဖြစ်ပါသည်။ သုဝိန္နဇာတ်ဟု ကဗျာသင်္ဂဟမေဒနီ ကျမ်းတွင် ဖော်ပြပါရှိသော်လည်း မူရင်းပထမ မှတ်ပါရစ်စေ-ချီ ဧကပိုဒ် တမ်းချင်းကို မဟာဒါဏ်ဝန်မင်း ဦးရွှေဝ (ကင်းဝန်မင်းကြီး - မူကွဲ) ချေပရေးသားသည့်လေးချိုးကြီးတွင် "သောဠသ-စာ၊ ဤရာဇာကို ..." ဟု ပါရှိသောကြောင့် သောဠသဇာတ် မှာ ပို၍ သင့်လျော်သော စာသားဖြစ်မည်ဟု ယူဆပါသည်။

မင်းတုန်းမင်းတရားကြီး လက်ထက်ကစလို့ မင်းဆရာဖြစ်ခဲ့တဲ့ ဆရာတော်ဟာ အတွင်းသိ၊ အပြင်သိ၊ ဓာတ်သိရပ်သိ ဆိုသလို ဖြစ်နေတာမို့ ဆရာတော်ကို ဆင်ခြေကန်လို့ မလွယ်လှပါဘူး။ နီးစပ်ရာကိုကပ်ပြီး တွယ်တက်တတ်တဲ့ သစ်တက်နွယ်လို မှူးကြီးမတ်ကြီး ဝန်ကြီးဆိုတဲ့ ပုဂ္ဂိုလ်ကြီးတွေကို ဆရာတော်ဟာ အတော်ပဲ မကျေမနပ် ဖြစ်နေဟန်တူပါတယ်။ မာလောနွယ်တွေ (သို့မဟုတ်) ကပ်ပါးရပ်ပါး ဖော်လံဖား ဝန်ကြီးတွေက ကောသလမင်းအိပ်မက်တွေ၊ သင်္ခါရတရားတွေ၊ ရှေ့ဆောင်နွားလားတွေ ဘာတွေနဲ့ ဘယ်လိုပဲ ဆင်ခြေဆင်လက်တွေ ပေးပြီး ဘုရင်ကို အပြစ်ပုံချလို့ ကိုယ့်ကိုယ်ကိုယ် ရှောင်လွှဲနေပေမဲ့ ပေါက်ပင်ဘာကြောင့် ကိုင်းရတယ်၊ ဗျိုင်းနားလို့ ကိုင်းရတယ် ... ဆိုတဲ့စကားအတိုင်း မှူးမတ်ဝန်ကြီးတွေ အပေါ်မှာပဲ တာဝန်ရှိတယ်။ မလိမ္မာသေးတဲ့ အကလေးအရွယ် မြေးသဖွယ်ဖြစ်သော မင်းနှစ်ပါးကို တာဝန်ပုံပြီး လွှဲမချပါနဲ့။ မင်းနှစ်ပါးတို့က အစစ အရာရာ တိုင်းရေးပြည်ရေးဟူသမျှကို မင်းကြီးတို့ထံ အပ်နှံထားပါလျှက်နှင့် မင်းနှစ်ပါးခမျာမှာ မှူးကြီးမတ်ကြီး ဝန်ကြီးဆိုတဲ့ ပုဂ္ဂိုလ်ကြီးတွေဆီက ကျေးဇူးကို တပြားသား တရွေးသားမျှ မခံစားရဘဲ ဒုက္ခခံစရာရှိတော့သာ ၄င်းတို့ခံသွားရရှာတယ်၊ နောက်ဆုံးတော့ ထီးနန်းလည်း ဆိတ်သုဉ်း၊ မင်းလည်း ဆိတ်သုဉ်း၊ တိုင်းပြည်လည်း ဆိတ်သုဉ်း ရတဲ့ “သုဉ်းသုံးဝ” နဲ့ တွေ့ကြုံနေရတဲ့ “သုညခေတ်” ကြီးမှာ လူဖြစ်နေရတာနဲ့စာရင် သေရတာကမှ ပိုပြီး ကောင်းပါသေးရဲ့ ဆိုပြီး ဆရာတော်က မကျေနိုင် မချမ်းနိုင်သည့် စိတ်ရင်းကို ရှင်းထုတ် ရေးသားပြီး သံဝေဂ ပွားများထားတာကို တွေ့နိုင်ပါတယ်။

(ဆရာကြီးနန်းညွန့်ဆွေရဲ့ ဆောင်းပါးကို ဖော်ပြပေးတဲ့ ကို စောသက်လင်းကို အထူးကျေးဇူးတင်ပါတယ် ခင်ဗျာ)

ဟယ်ရီ


အကိုးအကားများ
၁) မြန်မာ့စွယ်စုံကျမ်း၊ အတွဲ-၄ (စောင်း-တူ)၊ အပိုင်း (က)၊ စာမျက်နှာ-၁၅၃။ ဆီးပန်းနီဆရာတော်။
၂) ဖတ်မိဖတ်ရာ....ဆရာကြီးနန်းညွန့်ဆွေ၊ ဆီးပန်းနီ ဆရာတော်။ (http://sawthetlin.blogspot.com/2011/06/blog-post_14.html)

Read More...