ဗေဒါလမ်း (၄၁) - တလှည့်စီ စုန်ဆန်မြဲ

မနက်ခင်းဆီက၊ စုန်ဆင်းခဲ့ မဗေဒါ။
မွန်းတည့်ချိန် နေ့လယ်ခင်း
သင်း ပြန်တက်လာ။
ညနေ စောင်းလာတော့
ချောင်းဖျားရောက် ဆိတ်ငြိမ်ရာ
မဗေဒါ မအိပ်။
စုန်ချိန်မှာ စုန်ပြန်ရပေါ့
ချောင်းဝမှာ ပြန်စည်ကား
ချောင်းဖျားမှာ တိတ်။

အို အချင်း မဗေဒါ။
ကျူရိုးရှင် ကျူတံသေးနဲ့
တေးချိုလို့သာ။
ဆိတ်ငြိမ်ရာ စည်ကားရာ
ရောက်ရာမှာ မယ်မစွဲ။
ကပ်ချည် ခွာချည်နဲ့
တစ်လှည့်စီ စုန်ဆန်မြဲ
ညည်းတတ်ပါပဲ။ ။

ဇော်ဂျီ
(ဖျာပုံ စာပေလုပ်သား မဂ္ဂဇင်း၊ ၁၉၈၁)

မနက်ခင်းဆီတုန်းက စုန်ဆင်းသွားခဲ့တဲ့ မဗေဒါဟာ မွန်းတည့်ချိန်နေ့လယ်ခင်းမှာ ပြန်ဆန်တက်လာပါတယ်။ ညနေလည်း စောင်းလာရော ချောင်းဖျားကိုတောင်ရောက်နေပေမယ့် ဆိတ်ငြိမ်ရာချောင်းဖျားမှာ မအိပ်ဘဲ စုန်ချိန်ကျတော့ ပြန်စုန်ဆင်းရပြီး စည်ကားတဲ့ချောင်းဝကို ရောက်နေရပြန်ကာ ချောင်းဖျားမှာ ပြန်တိတ်ဆိတ်လို့နေပြန်ပါတယ်။
အို .. မဗေဒါရယ်၊ ကျူရိုးရှင်ကတော့ ကျူတံသေးနဲ့ တေးချိုချိုတွေသီပြီးနေဆဲပါ။ ဆိတ်ငြိမ်ရာအရပ်၊ စည်ကားရာအရပ်ရယ်လို့ ရောက်တဲ့ အရပ်ကို အစွဲမရှိပဲ ကပ်ချည်ခွာချည်နဲ့ စုန်တစ်ခါဆန်တစ်လှည့်နဲ့ မညည်းမညူဘဲ တစ်လှည့်စီသာ စုန်နေဆန်နေမြဲပါလား .. လို့ ကျူရိုးရှင်က ပြောလိုက်ပါတော့တယ်။

အခု ဆရာကြီးရဲ့ ဗေဒါလမ်းကဗျာစု ၄၁ပုဒ်လုံး ဒီမှာဆုံးသွားပါပြီ။ အားလုံး ဖတ်ရှုခံစားပြီး ကျေနပ်နိုင်ကြပါစေ။ နားလည်နိုင်ကြလိမ့်မယ်လို့ လဲ ထင်ပါတယ်။ တစ်စုံတစ်ရာကို ခံစားရရှိနိုင်ကြမယ်လို့လဲ မျှော်လင့်ပါတယ်။ ကျနော့်ဘ၀မှာ ဒီ ဗေဒါလမ်းကဗျာလေးတွေဟာ တစ်စုံတစ်ခုသော အတိုင်းအတာအထိ ခံစားချက်၊ အတွေးအမြင်နဲ့ အားအင်တွေ ပေးခဲ့ပါတယ်။ ဒီ ဗေဒါလမ်းကဗျာလေးတွေကိုဖတ်ပြီး ဘ၀အတွက် အသုံးဝင်မယ့် အတွေးအမြင်တွေ၊ အားမာန်တွေ ရရှိလာကြမယ်ဆိုရင် ကျနော့်အနေနဲ့ မျှဝေရကျိုးနပ်ပါပြီ။

ခံစားရတဲ့ ခံစားချက်တွေ၊ မြင်တဲ့အမြင်တွေကိုလည်း ပြန်လည်ဆွေးနွေးပြောပြပေးစေလိုပါတယ်။

ကျနော်ရေးထားတာတွေဟာ ကျနော်တစ်ဦးတည်းခံစားရတဲ့ခံစားမှုကို ကျနော်နားလည်သလို မျှဝေခံစား ရေးပြ ဆွေးနွေးခြင်းသာဖြစ်ပါတယ်။ ဒီအတိုင်းမှန်တယ်လို့မဆိုလိုပါဘူး။ ဆရာကြီး ဇော်ဂျီလို ပါရမီရှင် ကဗျာက၀ိကြီးတစ်ဦးအနေနဲ့ တွေးသွား၊ ရေးသွားတဲ့ မူလခံစားမှုကို ကျနော်ဘယ်လိုမှ လိုက်မမီနိုင်သလို အလွန်အဆင့်အတန်းမြင့်တဲ့ ကဗျာတွေမို့ အပြည့်အ၀ပီပြင်မှန်ကန်အောင်လည်း ကျနော့်အဆင့်လောက်နဲ့ ဖေါ်ပြဖို့ လုံးဝမဖြစ်နိုင်ပါဘူး။ ဒါကြောင့် ကျနော်နဲ့ မတူတဲ့၊ ကွဲပြားခြားနားတဲ့ အမြင်များရှိမယ်ဆိုရင် ကဗျာကို ရင်ထဲက လှိုက်လှိုက်လှဲလှဲ ချစ်မြတ်နိုးကြတဲ့သူများအနေနဲ့ ဆွေးနွေးပေးကြဖို့ အလေးအနက် မေတ္တာရပ်ခံဖိတ်ခေါ်ပါတယ်။

ဖတ်ရှုခံစားပေးတဲ့အတွက် ကျေးဇူးအထူးပါ ...
ဟယ်ရီ